تىنىشتىق – الاڭسىز دامۋ العىشارتى

اقتاۋ قالاسىندا بىرنەشە ۇلتتىڭ وكىلدەرى بار. ولاردىڭ اراسىندا قازاق ءتىلىن ءوز انا تىلىندەي مەڭگەرىپ, ۇلتارا­­­­­لىق دوستىقتى تۇراقتاندىرا تۇسۋگە اتسالىسىپ جۇرگەن بەلسەندىلەر از ەمەس. سولاردىڭ ءبىرى – «سامۋر» لەزگين ەتنومادەني بىرلەستىگىنىڭ مۇشەسى, ءورت ءسوندىرۋ جانە اۆا­­ريالىق قۇتقارۋ جۇمىستارى باسقارماسىنىڭ باسشى­سى, ورتكە قارسى قىزمەت كاپيتانى نازارالي سەليموۆ. – نازارالي, قازاق تىلىندە جاتىق سويلەيدى ەكەنسىز؟.. – مەن 1985 جىلى داعىستاندا تۋدىم, سول جىلى وتباسىمىز اقتاۋعا كوشىپ كەلىپتى. اياعىمدى قاز باسىپ, اۋلاعا شىققاننان كورگەنىم, ەسىمدى ءبىلىپ ويناۋعا جاراعاننان ق ۇلىن-تايداي تەبىسىپ, شۇرقىراسىپ بىرگە وسكەن دوستارىم دەپ ايتسام, قاتەلەسپەيمىن – ءبارى قازاق بالالارى بولدى. وزگە دە بىرنەشە ۇلتتىڭ بالالارى ماڭىمىزدان تابىلدى. بىزدە ۇلتقا ءبولىنۋ ول كەزدە جوق ەدى, قازىر دە جوق. بۇعان قۋانۋعا بولادى. مەن قازاق تىلىنەن مەكتەپىشىلىك, اقتاۋ قالالىق جانە ماڭعىستاۋ وبلىستىق وليمپيادالارىندا الدىما قارا سالماي, 1-ورىندى جەڭىپ الاتىنمىن. رەسپۋبليكالىق جارىسقا ەكى رەت قاتىستىم, 100 ۇپايدىڭ 96-سىن جيناپ, تەك نوميناتسيالار بويىنشا جۇلدەگەر اتاندىم. مەنەن دە جۇيرىكتەر بار ەكەن. قازاقستاندا تۇرعان سوڭ, قازاق ءتىلىن ءبىلۋدى مىندەت سانايمىن. حالىقارالىق قاتىناس ءتىلىن دە بىلگەن دۇرىس. مەن ءوزىمنىڭ انا ءتىلىمدى, قازاق جانە ورىس تىلدەرىن جاقسى بىلەمىن. ەلباسى نۇرسۇلتان نازارباەۆتىڭ «ۇشتۇعىرلى ءتىل» باستاماسى دۇرىس, ەلدىڭ, جەكە ادامنىڭ دۇنيەتانىمى كەڭ بولۋى ءۇشىن ءتىل ءبىلۋ قاجەت-اق. اسىرەسە, تاۋەلسىز قازاقستاننىڭ جاستارى ءۇشىن بۇل وتە-موتە قاجەت. – ءوز ورتاڭىز – دوستىق ۇياسى ەكەن, ال قوعامدا, كۇندەلىكتى ءومىر­­­دە ءسىز ۇلتارالىق دوستىقتىڭ تۇ­­راق­­­تىلىعىنا قالاي ۇلەس قوسار ەدىڭىز؟ – مەنىڭ اكەم گادجيموگاممەد سەليموۆ – «سامۋر» لەزگين ەتنو­­­­مادەني بىرلەستىگىنىڭ توراعاسى, ماڭ­عىستاۋدا شامامەن 4 مىڭعا تارتا لەزگين بارمىز. قازاقستان رەس­پۋبليكاسىنىڭ مەملەكەتتىك جانە وزگە دە مەرەكەلەرى قارسا­ڭىن­­دا مۇمكىندىگىنشە ورتالىقتان تابى­لۋعا تىرىسامىن. وزگە ەتنو­مادەني بىرلەستىكتەرمەن بىرگە ءتۇرلى مادەني شارالار ۇيىمداستىرىپ, ۇلتتىق جادىگەرلەردەن كورمە دايىندايمىز. مەن 2003-2007 جىلدار ارا­لى­عىندا ەلىمىزدىڭ توتەنشە جاع­دايلار مينيسترلىگىنە قاراستى وقۋ ورنىندا ءبىلىم الدىم. سول كەزدە اقمولا وبلىسى جاستارىنان قۇرىلعان كتك كومانداسى ساپىندا ونەر كورسەتتىم. فۋتبول – مەنىڭ سۇيىكتى سپورتىم. قازىر ءسال باسقاشالاۋ. وقۋ بىتىرگەن سوڭ تۋعان قالام اقتاۋعا كەلىپ, ءورت ءسوندىرۋ قىزمەتىنە جۇمىسقا تۇردىم. جۇمىس ءتارتىبى بويىنشا بوساڭسۋعا, بۇرىنعىداي ويىن ويناپ, قالاعانىڭشا كوڭىل كوتەرىپ جۇرۋگە مۇمكىندىك جوق. تۇرعىنداردىڭ قاۋىپسىزدىگى, ءورت­تىڭ الدىن الۋ, بولا قالعان جاع­دايدا ونى شاما كەلگەنشە شى­عىنسىز اۋىزدىقتاۋ – ەڭ باستى مىندەت, جاۋاپكەرشىلىك. قازاقستان رەسپۋبليكاسىنا ءمىنسىز قىزمەت ەتۋىمدى, مەملەكەتتىك ءتىلدى ءبىلۋىمدى, سونداي-اق, ءار ۇلتتان قۇرالعان دوس­تارىممەن سىيلاستىقتا بولۋىمدى ۇلتارالىق دوستىققا قوسقان ۇلەسىم ءارى ازاماتتىق بورىشىم دەپ ەسەپتەيمىن. – وتانداستارىڭىزعا تىلەگىڭىز. – قازاقستان – كوپۇلتتى ءارى تاۋەلسىزدىگىن العانىنا كوپ بولا قويماعان جاس مەملەكەت. سون­­­­دىق­تان, ونىڭ الاڭسىز دامۋى, جار­قىن بولاشاعى ءۇشىن تىنىشتىق, تاتۋ­لىق قاجەت. قازاقتىڭ كەڭ دالاسىن مەكەن ەتۋشى ءارتۇرلى ۇلت ورتاق وتانىمىزدىڭ كەلەشەگى ءۇشىن وسى تاتۋلىققا ۇيىتقى بولۋى كەرەك دەپ ويلايمىن. قازاقتا «كەمەدەگىنىڭ جانى ءبىر» دەگەن جاقسى ماقال بار, وتان ورتاق, شاڭىراق ءبىر بولعان سوڭ, تاعدىرىمىز دا بىرگە ءوربيدى. وزگە ۇلتتاردىڭ ءوز سالت-ءداستۇر, مادەنيەتى مەن ءتىلىن جوعالتىپ الماي, ءارى ءبىر-ءبىرىن سىيلاپ, ءبارى ءبىر شاڭىراق استىنان تابىلۋى ءۇشىن اسسامبلەيا قۇرىپ, جاقسى ىسكە باس­­تاما بەرگەن پرەزيدەنتىمىزگە العى­سىم شەكسىز. دوستىق, تاتۋلىق, تۇراق­­­­­تىلىقتى تۋ ەتكەن ساياساتى مەنى سۇيسىندىرەدى جانە ءاردايىم قول­داي­مىن. تاۋەلسىز قازاقستاننىڭ دامۋى ءۇشىن قىزمەت ەتە بەرەتىن بولامىن. – راحمەت. اڭگىمەلەسكەن گۇلايىم شىنتەمىرقىزى, «ەگەمەن قازاقستان». ماڭعىستاۋ وبلىسى.