بۇل تۋرالى جانە جالپى كۇن تارتىبىندەگى باسقا دا وزەكتى ماسەلەلەر بويىنشا بۇگىن قر پرەمەر-ءمينيسترىنىڭ ورىنباسارى – سىرتقى ىستەر ءمينيسترى مۇحتار تىلەۋبەردىنىڭ قازاقستاندا اككرەديتتەلگەن ەۋروپالىق وداققا مۇشە مەملەكەتتەردىڭ ەلشىلەرىمەن كەزدەسۋىندە ايتىلدى.
كەزدەسۋدىڭ نەگىزگى تاقىرىپتارى ينۆەستيتسيالىق, ساۋدا-ەكونوميكالىق, ساياسي جانە مادەني-گۋمانيتارلىق ىنتىماقتاستىقتى جانداندىرۋ, اعىمداعى جىلعى قاڭتارداعى قايعىلى وقيعالاردان كەيىنگى قازاقستانداعى قازىرگى احۋال, سونداي-اق ودان ءارى ەكىجاقتى جانە كوپجاقتى ءوزارا ءىس-قيمىلدىڭ باسىمدىقتارىن تالقىلاۋ بولدى.
ءوز سوزىندە مينيستر ەۋروپالىق تاراپتى ەل باسشىلىعىنىڭ «قايعىلى قاڭتار» سالدارى اياسىندا جاڭا قازاقستاندى قۇرۋداعى نەگىزگى تاسىلدەرى تۋرالى حاباردار ەتتى جانە مەملەكەتتىڭ ودان ءارى دەموكراتيالىق قايتا قۇرۋ باعىتىنا بەيىلدىلىگىن راستادى.
«ەۋروپالىق وداقپەن ءبىز سەنىمگە, ءوزارا قۇرمەتكە جانە ورتاق باسىمدىقتارعا نەگىزدەلگەن بەرىك قاتىناستار ورناتتىق. بۇل قاتىناستار جاھاندىق جانە وڭىرلىك قاۋىپسىزدىكتى قامتاماسىز ەتۋدەگى سەنىمدى سەرىكتەستىكپەن, سەرپىندى ساۋدا ىنتىماقتاستىعىمەن, سونداي-اق بەرىك ساياسي بايلانىستارمەن نىعايتىلۋدا», دەپ اتاپ ءوتتى مينيستر.
ءىس-شارا اياسىندا قازاقستاننىڭ ۇلتتىق ەكونوميكا ءبىرىنشى ۆيتسە-ءمينيسترى تيمۋر جاقسىلىقوۆ ەۋروپالىق ديپلوماتتاردى ەلىمىزدىڭ 2021 جىلعى ەكونوميكالىق دامۋىنىڭ نەگىزگى قورىتىندىلارى تۋرالى حاباردار ەتىپ, سونداي-اق ەلدەگى قاڭتار ايىنداعى وقيعالار اياسىندا ۇكىمەت الدىنا قويىلعان وزەكتى مىندەتتەرگە جەكە توقتالدى.
«پرەزيدەنت ق.توقاەۆ بىرقاتار ماڭىزدى باستامالاردى ۇسىندى, ولاردى ىسكە اسىرۋ ەلىمىزدىڭ جاڭا ەكونوميكالىق ىرگەتاسىن قالىپتاستىرۋعا مۇمكىندىك بەرەدى. قازىرگى ۋاقىتتا ۇلتتىق ەكونوميكا مينيسترلىگى ينكليۋزيۆتى ەكونوميكالىق ءوسۋدى ىنتالاندىرۋعا, ماكروەكونوميكالىق تۇراقتىلىقتى قامتاماسىز ەتۋگە جانە كاسىپكەرلىكتى دامىتۋعا باعىتتالعان «قر ۇكىمەتىنىڭ 2022 جىلعا ارنالعان ءىس-قيمىل باعدارلاماسىن» كەلىسۋ جانە بەكىتۋ بويىنشا بەلسەندى جۇمىس ىستەۋدە», دەدى ۆيتسە-مينيستر.
ەو-نىڭ قازاقستانداعى وكىلدىگىنىڭ باسشىسى ەلشى كەستاس يانكاۋسكاس اتاپ وتكەندەي, «قازاقستان ەۋروپالىق وداقتىڭ ورتالىق ازياداعى وتە ماڭىزدى ارىپتەسى جانە ەلدىڭ ودان ءارى دامۋىنا, اسىرەسە ساياسي رەفورمالار مەن دەموكراتيالاندىرۋعا قاتىستى ماسەلەلەردى بەرىك قولداۋعا نيەتتىمىز».
ەلشىنىڭ ايتۋىنشا, ەۋروپالىق ارىپتەستەر جاقىندا بولعان وقيعالاردىڭ كەشەندى سيپاتىن دا تۇسىنەدى.
وسىعان بايلانىستى وبەكتيۆتى تەرگەۋ جۇرگىزۋدىڭ ماڭىزدىلىعىن اتاپ ءوتتى جانە قازاقستاننىڭ ۋاكىلەتتى مەملەكەتتىك ورگاندارىنىڭ تەرگەۋدىڭ الدىن الا ناتيجەلەرىن جاريا ەتۋىن كۇتۋدە. وسى تۇرعىدا كەزدەسۋدە باس پروكۋراتۋرا تەرگەۋ ءىس-شارالارىن جۇرگىزۋ كەزىندە جول بەرىلگەن بۇزۋشىلىقتار تۋرالى شاعىمدار بويىنشا 170 قىلمىستىق ءىس قوزعاعانى تۋرالى اقپاراتتى ەرەكشە اتاپ ءوتتى.
فرانتسيا ەلشىسى ديدە كانەسستىڭ ايتۋىنشا, «ەۋروپالىق كەڭەستەگى فرانتسۋز توراعالىعى (2022 جىلدىڭ ءبىرىنشى جارتىسىندا) ءبىز ءۇشىن ورتالىق ازياداعى نەگىزگى ارىپتەس بولىپ تابىلاتىن قازاقستانمەن ىنتىماقتاستىقتى نىعايتۋعا باعىتتالعان». توراعالىقتىڭ وڭىرلىك باسىمدىقتارى اراسىندا ول قازاقستانداعى ودان ارعى دەموكراتيالىق وزگەرىستەر سالاسىنداعى كۇن ءتارتىبىن قوسا العاندا, ەو مەن قازاقستان اراسىنداعى كەڭەيتىلگەن ارىپتەستىك پەن ىنتىماقتاستىق تۋرالى كەلىسىمنىڭ ەرەجەلەرىن تولىق ىسكە اسىرۋدى; «كوۆيدتان كەيىنگى» ەكونوميكا مەن ينۆەستيتسيالىق احۋالدى قالپىنا كەلتىرۋدى; «جاسىل» ەكونوميكانى قۇرۋدى; ورتالىق ازيادا جانە ەۋروپامەن كولىك سالاسىنداعى تۇراقتى ءوزارا بايلانىستى قامتاماسىز ەتۋدى اتادى.
ودان ءارى پىكىر الماسۋ بارىسىندا ەۋروپالىق ديپلوماتتار ەلىمىزدەگى الەۋمەتتىك-ەكونوميكالىق جانە ساياسي رەفورمالار باعدارلاماسىنا قولداۋ ءبىلدىرىپ, ەو-نىڭ قازاقستان-ەۋروپالىق ارىپتەستىكتى نىعايتۋ ءۇشىن زاڭ ۇستەمدىگى مەن دەموكراتيالاندىرۋ ماسەلەلەرىندە قازاقستانمەن ودان ءارى سىندارلى ديالوگ جۇرگىزۋگە ءازىر ەكەنىن اتاپ ءوتتى.
وسى تۇرعىدا بيلىك پەن ازاماتتىق قوعامنىڭ, ونىڭ ىشىندە ۇلتتىق قوعامدىق سەنىم كەڭەسى جانە قر ءسىم جانىنداعى كونسۋلتاتيۆتىك-كەڭەسشى ورگان «ادامي ولشەم جونىندەگى ديالوگ الاڭى» سياقتى الاڭداردى قولدانۋ ارقىلى ءتيىمدى ءوزارا ءىس-قيمىلىنىڭ ماڭىزدى ءرولى اتالىپ ءوتىلدى. جالپى العاندا, كەزدەسۋ ەكىجاقتى جانە كوپجاقتى ىنتىماقتاستىقتىڭ كەڭ اۋقىمدى ماسەلەلەرىن تالقىلاۋعا جانە ساياسي ديالوگتى ودان ءارى تەرەڭدەتۋگە, ساۋدا-ەكونوميكالىق جانە ينۆەستيتسيالىق ءوزارا ءىس-قيمىلدى كەڭەيتۋ جونىندە پىكىر الماسۋعا مۇمكىندىك بەردى.
