القالى جيىنعا قازاقستان تاراپىنان وسى كەڭەستىڭ مۇشەسى يكرام ادىربەكوۆ قاتىستى. تۇركيا پرەزيدەنتى ر.ەردوعان اقساقالدار كەڭەسىنىڭ مۇشەلەرىن جىلى ىقىلاسپەن قارسى الىپ, كەڭەستىڭ ءرولى مەن اتقاراتىن جۇمىسى تۋرالى پىكىرىمەن ءبولىستى. تۇركيا پرەزيدەنتى ءوز سوزىندە 2021 جىلى قاراشادا ىستانبۇلدا وتكەن تۇركى مەملەكەتتەرى باسشىلارىنىڭ سامميتىندە اقساقالدار كەڭەسىنىڭ دارەجەسىن كوتەرىپ, جۇمىسىن جانداندىرۋ تۋرالى ورتاق شەشىم قابىلدانعانىن جانە وسى كەڭەسكە جەتەكشىلىك ەتۋ سەنىمدى ارىپتەسى, تۇركيانىڭ بۇرىنعى پرەمەر-ءمينيسترى بينالي يىلدىرىمعا تاپسىرىلعانىن اتاپ ءوتتى.
جيىندا تۇركى حالىقتارىنىڭ ەجەلدەن تابيعاتىندا بار ۇلكەندى سىيلاۋ, ءسوزىن, اقىل-كەڭەسىن تىڭداۋ ءداستۇرىن, مادەنيەتى مەن قۇندىلىقتارىن ساقتاۋ, دارىپتەۋ, دامىتۋ ورتاق پارىزىمىز ەكەنى ايتىلدى. سونىمەن قاتار الەمدە بارلىق باعىتتا كۇردەلى, شيەلەنىسكەن ماسەلەلەر كوبەيگەنىن العا تارتقان تۇركيا باسشىسى بۇل سىن-تەگەۋرىندەردى تۇركى مەملەكەتتەرى ۇيىمى مۇشەلەرى بىرلەسىپ شەشكەنى دۇرىس دەگەن پىكىر ءبىلدىردى. ول ءۇشىن باۋىرلاس ەلدەر اراسىنداعى دوستىقتى, ىنتىماقتاستىقتى ارتتىرىپ, دامىتۋ كەرەك. ر.ەردوعان تۇركيا ۇيىمنىڭ بۇگىنگى توراعاسى رەتىندە وسى باعىتتا قارقىندى جۇمىس اتقاراتىنىن ايتىپ, ءسوزىن قورىتىندىلادى.
كەزدەسۋدە ءسوز العان قازاقستان وكىلى يكرام ادىربەكوۆ تۇركيا پرەزيدەنتى رەجەپ ەردوعانعا قازاقستاندىقتار اتىنان زور دەنساۋلىق تىلەي وتىرىپ, اقساقالدار كەڭەسىنىڭ مۇشەلەرىمەن كەزدەسۋ وتكىزگەنىنە العىس ءبىلدىردى. ول سونداي-اق ىستانبۇلدا وتكەن جيىننىڭ نەگىزگى قورىتىندىسى جايلى ايتا كەلىپ, باۋىرلاس قازاقستان مەن تۇركيا ەلدەرىنىڭ ءوزارا قارىم-قاتىناسىنا توقتالدى. قازاقستان وكىلى ەكى ەل اراسىنداعى ساۋدا-ەكونوميكالىق بايلانىستىڭ قارقىندى دامىپ كەلە جاتقانىنا توقتالىپ, پاندەميا كەزىندە باسەڭدەپ قالعان ەكىجاقتى قارىم-قاتىناستى بارلىق باعىت بويىنشا قايتا جانداندىرۋعا شاقىردى.
رەجەپ ەردوعان قازاقستان پرەزيدەنتى قاسىم-جومارت توقاەۆقا سالەمى مەن ارنايى شاقىرۋىن جەتكىزە وتىرىپ, بيىل كوكتەمدە تۇركياعا رەسمي ساپارمەن كەلەتىنىنە سەنىم ءبىلدىردى.
اي باسىندا تۇركيا باسشىسى ۋكرايناعا ساپارىنان كەيىن وميكرون ۆيرۋسىن جۇقتىرىپ, سىرقاتتانىپ قالعانى حابارلانعان-دى. قازاقستان پرەزيدەنتى ارىپتەسىنىڭ تەزىرەك ساۋىعىپ كەتۋىن تىلەپ حات جولداعان ەدى, وعان ر.ەردوعان ريزاشىلىعىن بىلدىرگەن.
ەسكە سالساق, 9 اقپان كۇنى ىستانبۇلدا تۇركى مەملەكەتتەرى ۇيىمى اقساقالدار كەڭەسىنىڭ 12-ءشى وتىرىسى ءوتتى. ءۇش كۇنگە سوزىلعان جيىندا تۇركى مەملەكەتتەرى ۇيىمىنا مۇشە مەملەكەتتەردىڭ وكىلدەرى باس قوسىپ, كەڭەستىڭ ماقسات-مىندەتتەرىن تالقىلاپ, كەلەشەكتەگى جۇمىس جوسپارىن ايقىنداعان.
