كونفەرەنتسيانى د.قوناەۆ اتىنداعى ەۋرازيالىق زاڭ اكادەمياسى مەن د. قوناەۆ حالىقارالىق قورى, قازاقستاندىق كريمينولوگيالىق قاۋىمداستىعى بىرلەسىپ ۇيىمداستىردى.
كونفەرەنتسيانىڭ مودەراتورى د. قوناەۆ اتىنداعى ەۋرازيالىق زاڭ اكادەمياسىنىڭ رەكتورى, زاڭ عىلىمدارىنىڭ دوكتورى, پروفەسسور ءومىرالى جالايري اسا كورنەكتى مەملەكەت جانە قوعام قايراتكەرى, ءۇش مارتە سوتسياليستىك ەڭبەك ەرى, قازاق كسر عىلىم اكادەمياسىنىڭ اكادەميگى, تەحنيكا عىلىمدارىنىڭ دوكتورى, كەڭەستىك قازاقستاندى وتىز جىل باسقارعان دىنمۇحامەد احمەت ۇلى قوناەۆتىڭ ەل دامۋىنداعى باسشىلىق كەزەڭى مەن عىلىمي جولى تۋرالى ايتىپ ءوتتى.
د.قوناەۆتىڭ ءومىرى مەن مەملەكەتتىك قىزمەتى, ونىڭ رەسپۋبليكامىزدىڭ الەۋمەتتىك-ەكونوميكالىق, عىلىمي الەۋەتىن دامىتۋعا قوسقان ۇلەسى, كەيبىر ساياسي جانە قۇقىقتىق كوزقاراستارى, مەملەكەت باسشىسىنىڭ ساياسي تالانتى تۋرالى ەستەلىكتەرىمەن ءبولىستى. ونىڭ ءومىرى مەن كوپ قىرلى قىزمەتى قازاقستاننىڭ ۇلى ءداۋىرىنىڭ سيمۆولىنا اينالدى.
جيىن بارىسىندا د.قوناەۆ اتىنداعى حالىقارالىق قوردىڭ پرەزيدەنتى ەلدار قوناەۆ ءسوز الىپ, دىنمۇحامەد احمەت ۇلىنىڭ ەل ومىرىندەگى, سونىمەن قاتار بايلانىس ورتاسى جايىنا كەڭىنەن توقتالدى. قازاقستان عالىمدارى وداعىنىڭ پرەزيدەنتى, اكادەميك ءورازالى سابدەن رەسپۋبليكامىزعا د.قوناەۆ باسشىلىق ەتكەن جىلدارداعى الەۋمەتتىك-ەكونوميكالىق جاعدايعا كەڭىنەن توقتالدى.
ش.ءۋاليحانوۆ اتىنداعى تاريح ينستيتۋتىنىڭ ديرەكتورى, تاريح عىلىمدارىنىڭ دوكتورى, پروفەسسور زيابەك قابىلدينوۆ, د.قوناەۆ اتىنداعى قوردىڭ وزبەكستانداعى ءبولىمى اتىنان اكادەميك ابدۋللا رۋستەموۆ, جازۋشى وراز قاۋعاباي, ۇعا كوررەسپوندەنت-مۇشەسى, تەحنيكا عىلىمدارىنىڭ دوكتورى, پروفەسسور نيكولاي بۇكتىكوۆ, قازاقستاننىڭ حالىق ءارتىسى نۇرجۇمان ىقتىمباەۆ, اۋەزوۆ ءۇيى مادەني ورتالىعىنىڭ ديرەكتورى ديار قوناەۆ, تاعى دا باسقا عالىمدار مەن قوعام قايراتكەرلەرى, سونىمەن قاتار الىس-جاقىن شەتەلدەردەن قاتىسۋشىلار د.قوناەۆتىڭ حالىقارالىق دارەجەدەگى تۇلعا ەكەندىگىنە, ونىڭ ەل باسقارۋمەن قاتار عىلىمداعى زەرتتەۋلەرىنىڭ ماڭىزدىلىعىنا توقتالدى.
دىنمۇحامەد احمەت ۇلى باسقارعان جىلدارى كەڭ بايتاق قازاق جەرىندە 43 قالا بوي تۇزەدى. ونىڭ ىشىندە, ونەركاسىپ ورتالىعى سانالعان رۋدنىي, ەكىباستۇز, شەۆچەنكو (قازىرگى اقتاۋ), تەمىرتاۋ, جاڭاتاس, كەنتاي, ارقالىق, ت.ب. قالالار سالىندى.اۋىل شارۋاشىلىعى قارقىندى دامىپ, تىڭ جانە تىڭايعان جەرلەر يگەرىلدى. مال سانى كوبەيىپ, اۋىل شارۋاشىلىعىنىڭ ونىمدەرى جىل سايىن ارتىپ وتىردى. قازاقستاننىڭ ونەركاسىپ, ونىڭ ىشىندە تۇرلى-ءتۇستى مەتاللۋرگيا سالاسى جوعارى دەڭگەيدە دامىدى. مىستىڭ ۇشتەن ءبىر بولىگى, قورعاسىننىڭ 70, مىرىشتىڭ 40 پايىزىنان استامى قازاق جەرىندە ءوندىرىلدى. وسكەمەن قورعاسىن-مىرىش جانە تيتان-ماگني كومبيناتتارى, ت.ب. ىسكە قوسىلىپ, اقتوبە قالاسىنداعى شىعارىلعان حروم كەنىنىڭ كولەمى ارتتى. مەتالل وڭدەۋ جانە كولىك جاساۋ سالالارىندا دا ءوندىرىس تيىمدىلىگى ارتتى.
الماتى اۋىر ماشينا جاساۋ زاۋىتى شىعارعان ءونىم الەمنىڭ 40-تان استام مەملەكەتىنە تارالدى. قازاق جەرىنىڭ اۋماعىندا كومىر مەن مۇناي كەن ورىندارى اشىلىپ, قازاقستان وتىن-ەنەرگەتيكا ونەركاسىبىنىڭ ءىرى ورتالىعىنا اينالدى. تاراز جانە شىمكەنت قالالارىندا ورنالاسقان كومبيناتتار ءسارى فوسفور وندىرۋ بويىنشا الەمدە ءبىرىنشى ورىندا بولدى.
قازاقستان رەسپۋبليكاسىنىڭ ۇلتتىق عىلىم اكادەمياسىنىڭ اكادەميگى دىنمۇحامەد احمەت ۇلى قوناەۆ 100-دەن اسا عىلىمي ەڭبەكتەر مەن زەرتتەۋلەر جازدى. ءوز ەڭبەكتەرىنىڭ حالىق شارۋاشىلىعىنا تيگىزەر پايداسىنىڭ زور ەكەندىگىن ءىس جۇزىندە دالەلدەدى.
