ء«بىز حالىقارالىق باستامالاردى ىلگەرىلەتۋدە ءوزارا قولداۋ كورسەتتىك. قازاقستان 2030 جىلى ەكسپو كورمەسىن وتكىزۋ ورنى رەتىندە ماسكەۋدىڭ كانديداتۋراسىن قولداۋدان ەش تارتىنبايتىنىن اتاپ وتكىم كەلەدى», دەدى قاسىم-جومارت توقاەۆ رەسەي پرەزيدەنتى ۆلاديمير پۋتينمەن كەلىسسوزدەردەن كەيىنگى ءباسپاسوز جيىنىندا.
سونداي-اق, قاسىم-جومارت توقاەۆ ۆلاديمير پۋتينمەن ءبىلىم بەرۋ سالاسىنداعى كەلىسسوزدەردىڭ ناتيجەلەرى تۋرالى تارقاتتى.
پرەزيدەنتتىڭ ايتۋىنشا, قازاقستاندا ينجەنەرلىك-تەحنيكالىق بەيىندەگى جوعارى بىلىكتى كادرلاردىڭ قاجەتتىلىگىن ەسكەرە وتىرىپ, ءبىلىم بەرۋ سالاسىنداعى ىنتىماقتاستىققا ەرەكشە نازار اۋدارىلدى.
«بۇگىن مەن قۇرمەتتى ۆلاديمير ۆلاديميروۆيچكە رەسەيدىڭ ەڭ تانىمال جوعارى وقۋ ورىندارىنىڭ فيليالدارىن, ونىڭ ىشىندە, ەڭ الدىمەن, تەحنيكالىق فيليالدارىن قازاقستاندا اشۋعا كەلىسكەنى ءۇشىن ريزاشىلىعىمدى ءبىلدىردىم. ءبىز قازاقستانداعى جەتەكشى رەسەيلىك جوعارى وقۋ ورىندارىنىڭ فيليالدار جەلىسىن كەڭەيتۋ جونىندەگى پاندىك ۋاعدالاستىقتاردى قۇپتايمىز. بۇل ءبىلىم بەرۋ مەن ءوزارا قولداۋ سالاسىنداعى وتە ماڭىزدى پروگرەسس دەپ سانايمىن», دەدى مەملەكەت باسشىسى ءوز سوزىندە.
