كەيدە بەينەلەۋ ونەرىن نەمەسە ءبىر سۋرەتشى جايلى ايتۋ ءۇشىن تەرەڭ ويدىڭ قويناۋىنا سۇڭگىگىڭىز كەلەدى. ويتكەنى كەشەگىلەردىڭ كەلىستى كەسكىندەمەسىن, كەستەلى ويىن بىلاي قويعاندا, دارا دارىنىن اڭساۋمەن كەلەمىز. قازاق ءوزى تەڭىزدىڭ ءدامىن تامشىسىنان تۇشىنا بىلەتىن سەزىمتال حالىق قوي. سودان با جارق ەتكەن دۇنيە كورسە جاقسىلىققا جوريدى. ءبىز بۇگىن سول كۇيدى قايتا كەشتىك. قاشان دەسەڭىز؟ قازاقتىڭ بەلگىلى سۋرەتشى قىزى ايگۇل حاكىمجانوۆانىڭ شىعارماشىلىعىنا ۇڭىلگەن ساتتە.
قىلقالام شەبەرى ءاربىر جۇمىسىنا يدەيانى عاجايىپ تۇستەي عايىپ بولعان بالالىق شاقتىڭ بازارىنان ىزدەيدى. سول ءمولدىر ءساتتىڭ اياۋلى ەستەلىكتەرى سانا بيىگىندە جاڭعىرىپ, كەنەپ بەتىندە شەبەر ستيليستيكالىق شەشىم تابادى. جان الەمى سۇيىسپەنشىلىك پەن مەيىرىمگە تولى شەبەردىڭ كوڭىل ايدىنى لايلانباي, تازالىقتان ءنار الاتىنى انىق. بۇل – حاس سۋرەتكەر بولۋدىڭ العىشارتى. ونەر يەسى ادام جانىنىڭ جىلۋىن ءدال, انىق بەرەتىن پاستەل تەحنيكاسىن ارتىق كورەدى. ونىڭ ەرەكشەلىگى دە سوندا.
ءبىز مىسالعا العان «ەسىك تاۋ بوكتەرىندەگى تاڭ» كارتيناسى 2013 جازىلعان تۋىندى. پەيزاجدا سۋرەتشىنىڭ سەزىمى, كوڭىل كۇيى, تۇسىنىگى, تابيعاتقا دەگەن ەستەتيكالىق, ەتنوستىق كوزقاراسى اڭعارىلادى. ادام ومىرىمەن سالىستىرىپ قاراعاندا تابيعات ءومىرى ماڭگىلىك. سۋرەتشى اتالعان شىعارماسى ارقىلى تابيعاتتىڭ مىنەز-قۇلقىن ۇلتتىڭ بولمىس-بىتىمىمەن استاستىرىپ جازعان. تۇستەر پاليتراسى تابيعاتتاعى بوياۋلار مەن جارىقتىڭ قۇبىلۋىن ءدال كورسەتە العان.
ايگۇل حاكىمجانوۆا ءوز شىعارماشىلىعىندا تابيعاتتى تىكەلەي تاماشالاپ, تۇستەردىڭ وزگەشە تۇستارىن كورسەتە وتىرىپ, ەرەكشە اسەرلىككە, جاڭاشىلدىققا قول جەتكىزدى. تۇسپەن جانە فورمامەن, كەڭىستىكپەن جانە سىزىقپەن باتىل جۇمىس ىستەدى. رۋحتىڭ كۇشىمەن ورىلە بىتكەن جىگەرلى دە كوركەم, سيقىرلى وبرازدار تۋدىردى. ەڭ عاجابى, ونىڭ كارتيناسىندا ۇلتتىق كولوريت باسىم.
