بۇل تۋرالى ەررول سپەنستىڭ ءوزى الەۋمەتتىك جەلىلەر ارقىلى حابارلادى. بوكسشى ءۇش بەلدىك ءۇشىن وتەتىن جەكپە-جەك 16 ساۋىرگە جوسپارلانعانىن اتاپ ءوتتى. ءبىر سوزبەن ايتقاندا ەكەۋارا كەزدەسۋ ەررول سپەنستىڭ تەرريتورياسىندا وتەدى. ول ارلينگتونداعى AT&T Stadium-دا بۇعان دەيىن ەكى رەت رينگكە كوتەرىلگەن بولاتىن.
جالپى, ەررول سپەنس اۋەسقوي رينگتە جۇرگەندە قازاقستاندىق وليمپيادا چەمپيونى سەرىك ساپيەۆپەن الەم چەمپيوناتىندا كەزدەسكەن ەدى. 2011 جىلى ءازىربايجان استاناسى باكۋ قالاسىندا وتكەن جاھاندىق دودادا قازاقستاندىق بوكسشى سپەنستى 20:10 ەسەبىمەن جەڭگەن بولاتىن. قازىرگى تاڭدا تاعى ءبىر وليمپيادا چەمپيونى دانيار ەلەۋسىنوۆ ءدال وسى جارتىلاي ورتا سالماق دارەجەسىندە باق سىناپ ءجۇر. ساپيەۆتىڭ اۋەسقويداعى جەڭىستى جولىن ەلەۋسىنوۆ كاسىپقوي رينگتە جالعاستىرىپ تا قالار...
