كاتونقاراعاي مەملەكەتتىك ۇلتتىق تابيعي پاركىنىڭ قىزمەتكەرلەرى جىلدا ءتۇز تۇياقتىلارىنا قوسىمشا ازىق دايىنداپ, سوقپاقتارىنداعى قاردى اتپەن جارىپ, جول سالادى. وزەن-كولدىڭ مۇزىن ويىپ, اەراتسيا جۇمىستارىمەن اينالىسادى. اەراتسيا دەپ وتىرعانىمىز, سۋدى اۋامەن قانىقتىرۋ پروتسەسى. تابيعات جاناشىرلارى ءار جەردەن مۇزدى ويىپ جۇرگەندەرى سوندىقتان.
– جىلداعىداي اياز جوق. مۇز جۇقا. بىراق قار قالىڭ ءتۇستى. قاردىڭ قالىڭدىعى كەيبىر جەرلەردە ءبىر مەتردەن استام. مۇزدىڭ قالىڭدىعى 60 سم. ماماندار مۇزدى بۇرعىلاپ, سۋعا وتتەگى جىبەردى. بالىقتاردىڭ قىرىلىپ قالماۋى ءۇشىن مۇنداي جۇمىستار جىلدا ىستەلەدى, – دەيدى جانۋارلار الەمىن قورعاۋ جانە ءوندىرۋ ءبولىمىنىڭ ساياتكەر-بيولوگى اجار مايلحانوۆا.
سونىمەن قاتار بيوتەحنيكالىق, ياعني اڭداردى ازىقتاندىرۋ جۇمىستارى جۇرگىزىلدى. جانۋارلاردى قورعاۋشى مامانداردىڭ پىكىرىنشە, تۇياقتىلاردىڭ قىرىلىپ قالماۋى ءۇشىن قوسىمشا ازىقتاندىرۋ جۇمىستارى قىستاي جۇرگىزىلۋگە ءتيىس. جۇيەلى جۇرگىزىلگەن جۇمىستاردىڭ ناتيجەسىندە ۇلتتىق پارك اۋماعىندا اڭ سانى كوبەيگەن. اڭدار شوعىرىن ابدەن ءبىلىپ العان ينسپەكتورلار سول ماڭعا جازدىڭ كۇنى دايىنداعان شوپتەرىن شاشىپ, ناۋاعا جەم سالادى. اششىلاپ قالماسىن دەپ, تۇزدارىن قويادى. كادىمگى ءۇيدىڭ مالىن كۇتكەندەي جانتالاسادى ولار. سوندايدا براكونەرلەردىڭ تىرلىگى «اتتەگەن-اي» دەگىزەر ەدى. ابىروي بولعاندا, كاتونقاراعاي ۇلتتىق پاركىنىڭ اۋماعىندا زاڭسىز اڭ اۋلاعاندار كەزدەسكەن جوق. ول داعى ينسپەكتورلاردىڭ قىراعىلىعى, تابيعاتقا دەگەن شىنايى جاناشىرلىعى دەپ ويلايمىز.
اقپان قىسقا اي بولعانىمەن, قىتىمىر. ۇسكىرىك ايازى دا, بوران-شاشىنى دا بار. وسىنى ويلاعان پارك باسشىلىعى مەن قىزمەتكەرلەرى اقپاندا اڭداردىڭ كۇتىمىنە ەرەكشە كوڭىل بولەدى.
شىعىس قازاقستان وبلىسى,
كاتونقاراعاي اۋدانى
