قالا تازالىعى قىزمەتىندە جۇمىس ىستەيتىن ەرلى-زايىپتىلار بۇعان دەيىن كوپقاباتتى ءۇيدىڭ جەرتولەسىن پانالاپ كەلگەن. بۇل جاي ىزگىلىككە ىڭكار جانداردى بەيجاي قالدىرعان جوق. وسىعان دەيىن 12 وتباسىنا پاتەر كىلتىن تابىستاعان «ەلگە كومەك» قورى اتالعان ماسەلە تۋرالى جەلىگە اسەرلى بەينەروليك جاريالاعان ەدى. «كوپ تۇكىرسە كول» دەگەندەي, ءۇي الۋعا قاجەتتى سوما تاۋلىك ىشىندە جينالىپ, قايىرىمدى ىسكە ەل ازاماتتارى ءۇن قوسقان.
– ۇشەمدەردىڭ ومىرگە كەلۋى – سيرەك كەزدەسەتىن جاعداي. جامباۋوۆتار وتباسىنىڭ جەرتولەدە ءومىر ءسۇرىپ جاتىر دەگەنىن ەستىگەندە, ولاردىڭ ۇشەمدەردەن بولەك ءۇش ۇلى بارىن بىلگەندە, كومەك قولىن سوزعىمىز كەلدى. ۇشەمدەردىڭ جاڭا ءومىرى جاڭا ۇيدە باستالعانىن قالادىق. ارنايى بەينەروليك دايىنداپ, پاراقشامىز ارقىلى كوپشىلىككە ۇسىندىق. قايىرىمدى جاندار از ۋاقىتتىڭ ىشىندە ءوز ۇلەستەرىن قوسىپ, قالا ىرگەسىنەن كەڭ اۋلاسى بار جايلى باسپانا بۇيىردى, – دەيدى يگى ىسكە باستاما بولعاندار.
التى بالانىڭ اكەسى ەرجان جامباۋوۆتىڭ قۋانىشىندا شەك جوق. ەڭ ۇلكەن ارمانىمنىڭ ءبىرى ورىندالدى دەگەن ول جاقسىلىققا ۇلەس قوسقان جاندارعا العىسىن ءبىلدىرىپ, باسپانا كىلتىن قولىنا العان ساتتە كوز جاسىنا ەرىك بەردى. بۇدان بىلاي بارلىق كۇش-جىگەرىن بالالارىن وقىتۋعا ارنايتىنىن ايتىپ, اعىنان جارىلدى.
قوعامداعى قوردالانعان ماسەلەلەردىڭ ءتۇيىنىن تارقاتۋعا قايىرىمدىلىق قورلارى قوماقتى ۇلەس قوسىپ ءجۇر. الەۋمەتتىك جەلىنىڭ الەۋەتىن ءتيىمدى پايدالانعان ازاماتتار مۇڭ-مۇقتاجى كوپ تالاي تاعدىرعا اراشا بولعانىنا ەل كۋا. جەكە قورلاردىڭ كومەگىمەن قانشاما وتباسىنىڭ باسپانا جىرى بايىپتى شەشىمىن تابۋدا. بۇل – ىزگىلىكتە شەكارا بولمايتىنىنىڭ دالەلى. ەندى تىرشىلىككە جولداما العان شاقالاقتاردىڭ شاتتىق ءۇنى جالدامالى جەرتولەدە ەمەس, ءوز شاڭىراقتارىندا ەستىلەتىن بولدى.
الماتى
