كۇرەڭ كۇزدىڭ قۇشاعىندا بالقىعان تابيعاتتىڭ تاماشا سىيى. كورگەن ادام كوڭىل بولمەي كەتپەس كەرەمەتتىڭ ناق ءوزى. قاراڭىزشى, تابيعات قانداي ۇقىپتى, ارتىق ەشتەڭە جوق, تەك جاراتىلىستىڭ جاڭعىرىعى عانا ەستىلەدى. التىن توپىراققا تامىرىن جىبەرىپ, بۇرالا بىتكەن اق قايىڭدار الىستاعى ءبىزدى دە الاپات كۇيگە بولەدى. بەلگىلى سۋرەتشى قاليوللا احمەتجاننىڭ قىلقالامىنان تۋعان كورىنىس سول ءبىر شۋاقتى شاقتىڭ سالەمى ىسپەتتى.
جاپوندىق گرافيكانىڭ تەحنيكاسىن تەرەڭ مەڭگەرگەن سۋرەتكەر شىعارماشىلىق ىزدەنىس جولىندا جاڭا باعىت سىزدى. ءحىح عاسىردا فرانتسيا ەلىندە قارقىندى دامىعان «پۋانتيليزم» ءستيلىن قازاق بەينەلەۋ ونەرىنە الىپ كەلگەن شەبەر تابيعاتتان شابىت الدى. ول قالىڭ ورمان ىشىنەن بالا كۇنىندە جۇرەگىنە ۇيا سالعان ارماندارىن ىزدەدى. جازىق دالاعا, تاۋ بوكتەرىنە بار ماحابباتىن ارنادى.
باقساڭىز, «قايىڭدار ءبيى» كارتيناسىندا قولدانعان تۇستەرىنىڭ قوسىندىسى ءبىر-بىرىمەن ۇيلەسىم تاۋىپ, تەپە-تەڭدىگىن ساقتاي كەلە, جارىق پەن كولەڭكەنىڭ ايىرماشىلىعىن وڭاي شەشەدى. كومپوزيتسيانىڭ نەگىزگى قوزعاۋشى كۇشى – ءتۇس پەن فورما. فورمانى ىزدەستىرۋ ناتيجەسىندە قىلقالام يەسى وزىنە عانا ءتان كەسكىندەمە تەحنيكاسىن قۇراستىردى.
جالپى, تابيعات كورىنىستەرى اۆتوردىڭ سۇيىكتى موتيۆتەرىنە جاتادى. ونىڭ باستى سەبەبى – شىعىستىق ءداستۇرلى بەينەلەۋ ونەرىنە دەگەن قىزىعۋشىلىعى. اسىرەسە, قىتاي, جاپون شەبەرلەرىنىڭ پەيزاجدارىنا تامساندى. ونىڭ ىشىندە ولاردىڭ سيمۆوليكالىق مانىنە باسا نازار اۋداردى. ماسەلەن, قاراعاي مەن قايىڭ – كوركەمدىكتىڭ, بەرىكتىكتىڭ جانە سۇڭعاقتىقتىڭ سيمۆولى بولسا, تاۋ – الەم سيمۆولىنا اينالعان ۇلكەن فيلوسوفيالىق مانگە يە.
قىلقالام شەبەرى ءاربىر كارتيناسىندا تابيعات قۇپياسىن تابۋعا تىرىسادى. جاقىننان قاراساڭىز, بوياۋ سترۋكتۋراسىن, ءار قاباتتاعى تۇستەردىڭ بايلانىسىن كورۋگە بولادى. مۇندا اۆتوردىڭ جەكە قولتاڭباسى مەن وزىندىك پىكىرى بار.
