قر پارلامەنتى سەناتىنىڭ دەپۋتاتى ساعىندىق لۇقپانوۆتىڭ سۇراعىنا جاۋاپ بەرگەن مينيستر قايىربەك وسكەنباەۆ قاراباتانعا دەيىنگى ۋچاسكەنى قامتيتىن ۇزىندىعى 86 شاقىرىمدىق اتىراۋ-دوسسور جولىنا تۇسەتىن جۇكتەمە راسىندا تىم كوپ ەكەنىن, تيىسىنشە كەڭەيتۋدى تالاپ ەتەتىنىنە توقتالدى.
«بۇل جول ۋچاسكەسى 2009 جىلى III تەحنيكالىق سانات ولشەمدەرىنە ساي قايتا سالىندى. ول كەزدە اتىراۋ مەن بۇكىل ءوڭىر ءۇشىن جولدىڭ ماڭىزدىلىعى ەسكەرىلمەگەن. ۋچاسكەدەگى قوزعالىس قارقىنى ۇلعايعانىن ەسكەرە وتىرىپ جانە «قۋاتتى وڭىرلەر: ەل دامۋىنىڭ درايۆەرى» ۇلتتىق جوباسىنا سايكەس 2023 جىلى ءى تەحنيكالىق ساناتقا اۋىستىرۋ بويىنشا جوبالىق-سمەتالىق قۇجاتتاماسىن ازىرلەۋ كوزدەلگەن. 2025 جىلدان باستاپ قايتا قۇرۋدى باستاۋدى تاپسىردىم», دەدى مينيستر.
سونداي-اق ول اتالعان ۋچاسكەنى ىسكە اسىرۋ قر ۇكىمەتى بەكىتكەن اتىراۋ وبلىسىن دامىتۋدىڭ كەشەندى جوسپارىندا قامتىلعانىن اتاپ ءوتتى.
بۇدان بۇرىن حابارلانعانداي, قر يدم ەل ءۇشىن ماڭىزدى ماسەلەلەردى اشىق قوعامدىق تالقىلاۋدى باستادى. بۇگىن مينيسترلىك ەلىمىزدىڭ باتىس وڭىرىندەگى اۆتوموبيل جولدارىن سالۋ جانە رەكونسترۋكتسيالاۋ تاقىرىبى بويىنشا العاش رەت كەزدەسۋ وتكىزدى. ءىس-شاراعا مينيستر قايىربەك وسكەنباەۆ, اۆتوموبيل جولدارى, قۇرىلىس جانە تۇرعىن ءۇي كوممۋنالدىق شارۋاشىلىق ىستەرى كوميتەتتەرىنىڭ, «قازاۆتوجول» ۇلتتىق كومپانياسىنىڭ باسشىلارى, قر پارلامەنتى سەناتى مەن ءماجىلىسىنىڭ دەپۋتاتتارى, جۋرناليستەر, بلوگەرلەر جانە قوعام قايراتكەرلەرى قاتىستى. سونداي-اق ءوڭىر تۇرعىندارى Zoom پلاتفورماسى بويىنشا تالقىلاۋعا قوسىلدى.
