اكىم ءوز سوزىندە جىل باسىنان بەرى وزەكتى ماسەلەسى بار 32 شاعىن اۋدان مەن تۇرعىن الابى حالقىنىڭ ماسەلەسىن تىڭداعانىن اتاپ ءوتتى. اباي اۋدانىنا قاراستى بۇل شاعىن اۋدان تۇرعىندارىن ەلەكتر جارىعى, تابيعي گاز, مەكتەپ, ەمحانا, كوشەلەرگە شاعال تاس توسەۋ, قوعامدىق كولىك پەن ءال-فارابي كوشەسىنە شىعاتىن بالاما جول قاراستىرۋ ماسەلەسى تولعاندىرىپ وتىر.
قالا باسشىسى كوتەرىلگەن ماسەلەلەردىڭ شەشۋ جولىن سالا جەتەكشىلەرىمەن تالقىلاپ, جەرگىلىكتى تۇرعىندارعا جۇمىستىڭ اتقارىلۋ بارىسىن ءتۇسىندىردى.
«شاعىن اۋداننىڭ وزەكتى ماسەلەسىن ەسكەرە وتىرىپ, ەڭ الدىمەن گاز, جارىقتى شەشۋدى قولعا الدىق. وزدەرىڭىز كورىپ وتىرعانداي بىلتىر تازا اۋىز سۋمەن تولىق قامتىلدىڭىزدار. بۇگىنگى تاڭدا ەلەكتر قۋاتىن جەتكىزۋ بويىنشا جۇمىستار جۇرگىزىلۋدە. وسى جىلى گاز جۇيەسىن تارتۋ جۇمىستارى باستالادى. ونىڭ قۇرىلىسى 2023 جىلى اياقتالادى دەپ جوسپارلانۋدا. وتكەن جىلى 14 كوشەگە شاعال تاس توسەلسە, اۋىز سۋ جۇيەسى جۇرگىزىلگەن 6 شاقىرىم جولعا شاعال تاس بيىل توسەلەتىن بولادى. ينجەنەرلىك كوممۋنيكاتسيالاردىڭ قۇرىلىسى اياقتالعاندا جولدى اسفالتتاۋ جۇمىستارى باستالادى», دەدى اكىم.
بۇدان بولەك, شاھار باسشىسى 2023 جىلى نۇرشۋاق شاعىن اۋدانىنا 1200 ورىندىق مەكتەپ سالىناتىنىن, ەكى ەلدى مەكەنگە ورتاق ەمحانا قۇرىلىسى ىنتىماق شاعىن اۋدانىندا جەكە ينۆەستور ەسەبىنەن بوي كوتەرىپ جاتقانىن اتاپ ءوتتى. زاماناۋي ەمحانا تاۋلىگىنە 500 ادامعا قىزمەت كورسەتۋگە قاۋقارلى.
ءسوز سوڭىندا تۇرعىندار اكىمگە اشىق ديالوگ تارتىبىندەگى كەزدەسۋى ءۇشىن العىسىن ءبىلدىرىپ, جۇمىستىڭ ساپالى جۇرگىزىلۋىنە اتسالىساتىندارىن ايتتى.
