كوركەم كوكشەنىڭ قىسى دا قىزىقتى

كۇنى كەشە عانا جاسىل جەلەگىن جامىلىپ, قويناۋى دالا وركەسترىنىڭ مىڭ سان ۇنىمەن دۇرلىگىپ تۇرعان تاۋ سىلەمدەرى مەن شوقىلاردىڭ ەتەگى اق كورپەسىن جامىلىپ, تىنىشتىق قۇشاعىندا مۇلگىپ تۇر. قىتىمىر قىستىڭ دا قاپىسىن تاپقانعا ءوز قىزىعى بار. تاپ-تازا, شىڭىلتىر مۇز ايدىننىڭ ۇستىندە اتقان وقتاي زۋلاپ كونكي تەبۋدىڭ, تۋ سوناۋ تاۋ باسىنان شاڭعىمەن سىرعاناۋدىڭ ءوز ءلاززاتى بار. بۇل تاراپتا كۋرورتتى ايماقتا قىسقى ءتۋريزمدى دامىتۋعا ونداعان ساناتوريلەر مەن قوناق ۇيلەر ءازىر. الا جازداي تابىستى ءتۋريزمنىڭ جولىن تارىلت­قان جامان تۇماۋدىڭ كەسىرىنەن كەتكەن ەسە­سىن قىسقى تۋريزمنەن قاۋزاپ جاتسا نەسى ايىپ؟! اقشا قاردىڭ ۇستىندە تاۋ شاڭ­عىسىمەن سىرعاناۋدى ۇناتاتىندارعا بارلىق قولايلى جاعداي تۋدىرىلعان, وتە ىڭعايلى ورىندار دا از ەمەس. ماسەلەن, «نۇر تاۋ» تاۋ شاڭعىسى بازاسى. كەشەن­نىڭ ۇزىندىعى 800 مەتر ارقاندى جول­مەن جابدىقتالعان. ور قوياننىڭ جىمىنداي جالعىز اياق جولمەن شوككەن تۇيەدەي جارتاستاردى جاعالاپ, بۇتالى بەتكەيدى كولبەي ءوتىپ, سۋىلداي سورعالاۋ شاڭعىنى اياعىنا جاڭا بايلاعاندارعا دا, تاجىريبەلى سپورتشىلارعا دا قىزىقتى بولۋى ابدەن مۇمكىن.

Rixos Borovoe  قوناق ءۇيىنىڭ اۋما­عىن­دا قىسقى دەمالىستى بەلسەندى وت­كىز­­گىسى كەلەتىن تۋريستەر ءۇشىن سنوۋبوردينگ, جازعى دەمالىستى بارىنشا ءتيىمدى ۇيىمداستىرۋعا باعىتتالعان ۆەيكبوردينگ جۇمىس ىستەيدى. ايتپاقشى, بۋراباي باۋرايىندا ەلىمىزدەگى ەڭ ال­عاشقى ۆەيك-پارك ىسكە قوسىلدى. بۇل دا جاعىمدى جاڭالىق. بالالاردىڭ قىسقى دەمالىسىن كوڭىلدى ءارى ءتيىمدى وتكىزۋگە بارلىق جاعداي جاسالعان. جىل سايىن ۇستەمەلەنىپ, مازمۇنى بايىپ كەلە جات­قان جاڭالىقتىڭ بارلىعى تۋريستەر اعى­نىن بارىنشا مولايتۋ ءۇشىن جاسالىپ وتىرعاندىعى بەلگىلى. ششۋچينسك-بۋراباي كۋرورتتىق ايماعىنداعى «بۋراباي-لەند» تاقىرىپتىق پاركىنىڭ ءوزى نەگە تۇرادى؟! شىن مانىندە بۇل قىسقى ءتۋريزمدى باعىتتاۋ ورايىندا جاسالىپ جاتقان شارۋانىڭ بىرەگەي ءبىتىمى. بۇل جەردە بالا قيالىن بايىتاتىن ەرتەگى كەيىپكەرلەرىن كەزدەستىرە الاسىز. سانتا كلاۋس تا ءجۇر, اقىلدى حاسكي, تومپيعان پوني بالا كوڭىلدى باۋرارى داۋسىز. ودان وزگە دە كوڭىل اربايتىن كورىنىس, ىل­­كىم­­دى جاڭالىق تۇنىپ تۇر. ماسەلەن, قار باسقان قالىڭ ورمان ىشىندە اتپەن سەرۋەندەگەن قانداي عاجاپ؟! قىسقى اۋا­­نى كوكىرەگىڭنىڭ قۇمارى قانعانشا جۇتىپ, دەمالۋىڭىزعا ابدەن بولادى. ءسال شارشاساڭىز, «ۆيزيت» ورتالىعىنىڭ اۋما­عىنداعى جىل بويى ءۇزىلىسسىز جۇمىس ىستەي­تىن شولۋ دوڭگەلەگىنە باس سۇعىڭىز. وسىنداعى قۇرقىلتايدىڭ ۇياسىندا جىپ-جىلى كابينالاردا وتىرىپ-اق اڭىزعا تۇنىپ تۇرعان بۋراباي باۋرايىن شولىپ شىعۋعا بولادى.

كوكشەتاۋ جالعىز بۋرابايىمەن عانا ەمەس, زەرەندىسىمەن دە ايگىلى. اۋ­دان اكىمدىگى وبلىستىق تۋريزم باس­قار­ما­سىمەن بىرلەسىپ كۋرورتتى ايماقتى دامىتۋدىڭ 2025 جىلعا دەيىنگى جوس­پارىن تۇزگەن بولاتىن. اۋقىمدى جوس­پار كوزدەگەن مەجەسىنە قول جەتكىزۋدە. قازىر ەكى تۋريستىك ايماق بىرلەسە, بىتە قايناسىپ كەتتى دەپ ايتۋعا دا بولادى. وعان جالپى قۇنى 15,4 ميلليارد تەڭگە بولاتىن, ۇزىن­دىعى 80 شاقىرىمدىق ششۋچينسك-زەرەندى باعىتىنداعى اۆتوجول سەپتىگىن تيگىزىپ وتىر. زەرلى زەرەندى­دە­گى كۇمىس كولدى جاعا­لاي قونىستانعان «پارۋس», Aurora Garden ءتارىزدى دەمالىس ايماقتارى قىسقى دەمالىستى قۇلاي سۇيەتىندەرگە بارلىق جاعدايدى جاساپ قويعان. ودان ءارى اتشاپتىرىم جەردە «ەلىكتى پارك» تاۋ شاڭعى بازاسى بار. بۇل جەر دە سالاماتتى ءارى بەلسەندى ءومىر سالتىن ۇستايتىن ادامدار ءۇشىن قىس قىزىعىن بەلدەن كەشۋگە ىڭعايلى جەر.

بۇگىنگى كۇنى اۋداندا بىرنەشە باعىتتا تۋريستىك مارشرۋتتار ازىرلەنىپ وتىر. جال­­عىز كوركەم تابيعاتتىڭ كورىنىسى عانا ەمەس, تۋعان جەردىڭ تىلسىم تاريحىن دا زەردەلى كوكىرەككە شىمشىمداپ قوندى­راتىن ساتىمەن ساباقتالعان ساپار. اتتى دا, شاڭعىنى دا قويا تۇرىپ, جۇپ-جۇمساق, كىرشىكسىز, تازا, اق قاردى كەشىپ ءجۇرىپ, ماڭگى جاسىل قاراعايلار كومكەرگەن جان­نات مەكەننىڭ جەر بەتىندەگى جۇماقتاي پۇش­پاعىن الشاڭ باسىپ ارالاعانعا نە جەتسىن؟!

الىسقا ۇزاپ شىققىڭ كەلمەسە, نۇر-سۇلتان قالاسىنىڭ ماڭىنداعى اقكول, ارشالى, تسەلينوگراد جانە شورتاندى اۋداندارىندا دا دەمالىس ورىندارى جەتەرلىك. بۇل جەرلەرگە ەل استاناسىنان عانا ەمەس, الىس-جاقىن شەتەلدەردەن ات ءىزىن سالاتىندار جىل سايىن كوبەيىپ كە­لەدى. اقكول قالاسىنداعى ARKA TOUR جاۋاپكەرشىلىگى شەكتەۋلى سەرىك­تەستىگىنىڭ شاڭعى بازاسى – قىسقى دەما­لىستى قۇلاي سۇيەتىندەردىڭ سۇيىكتى ورنى. بۇل جەردە 40 ورىندىق قوناقۇي, 100 ورىندىق مەيرامحانا, فيتنەس زال ورنالاسقان. قىسقى ۋاقىتتا ايناداي جارقىراپ جاتقان مۇز ايدىنى مەن شاڭعى جولىن پايدالانۋعا ابدەن بولادى. دەمالىس ورتالىعىنىڭ اۋماعىندا تەننيس كورتى مەن باسسەين دە بار. وسىلايشا, باسەكەلەستىكتىڭ ءباسى جوعارىلاپ كەلەدى. تسەلينوگراد اۋدانى دا قىسقى دەمالىستى ۇيىمداستىرۋعا ءتاپ-ءتاۋىر دايىندالعان. شىتىرمان وقيعالى جانە ەكسترەمالدى دەمالىس تۇرلەرى دە قولعا الىنعان. الداعى ۋاقىت­تا وسى سالاعا قوماقتى قارجى قۇياتىن ينۆەستورلاردى تارتۋ جوسپارلانىپ وتىر. بالىعى تايداي تۋلاعان, كۇمىس كولدەر­مەن اتى شىققان قورعالجىن اۋدانىن­دا دا قىسقى دەمالىستى قىزىقتى ۇيىمداستىرۋدىڭ وڭتايلى جولدارى بار. بالىقشىلاردى ورنالاستىرۋ ءۇشىن قورىقشى كاردونىندا جايلى قوناق ۇيلەر سالىنعان.

Visit Aqmola تۋريستىك اقپارات ورتا­لىعى وڭىردەگى ءىس-شارالار مەن قىس­قى ويىن-ساۋىقتىڭ بارلىق تۇرلەرىنە ۇزبەي مونيتورينگ جۇرگىزىپ وتىرادى. ونىڭ ىشىندە الەۋمەتتىك جەلىلەرگە تارا­تىلا­تىن قىسقى قىزمەت تۇرلەرى تۋرالى مالىمەت تە بار. اقپاراتتىق افيشالار دا ىلىنگەن. قىسقى ءتۋريزمنىڭ اشىلۋى قارساڭىندا وبلىستىق تۋريزم باسقارماسى بىرنەشە مارتە اقپاراتتىق-جارنامالىق تۋرلار وتكىزدى. ارقيلى كورمەلەردە وبلىستىڭ تۋريستىك الەۋەتى جان-جاقتى كورىنىس تاپقان.

Four seasons كۇنتىزبەلىك ءىس-شارا­لار جوسپارىن جۇزەگە اسىرۋ اياسىندا 24 ءىس-شارا وتكىزۋ جوسپارلانسا, ونىڭ التاۋى قىسقى كەزەڭدى قامتيدى. ءبىر ايتا كەتەرلىگى, ولاردىڭ باسىم بولى­گى حالىقارالىق مارتەبەگە يە. ياعني شەتەل­دىك تۋريستەردى كوپتەپ تارتا وتىرىپ, ءوڭىردىڭ تۋريستىك ءوڭىن جاقسارتا تۇسپەك.

دەمالىس نىساندارىنىڭ قىزمەت كورسەتۋ اياسىن جاقسارتۋ باستى نازاردا. قىسقى دەمالىسقا قاتىستى ۇسىنىستاردى كەڭەيتىپ, قاپىسىز قامدانۋ ءۇشىن «قىسقى ەرتەگى» كونكۋرسى وتكىزىلدى. بايقاۋدىڭ باستى ماقساتى تۋريستەردىڭ سانى مەن ۇسىنىلاتىن تۋريستىك قىزمەتتەر كولە­مىنىڭ ەڭ جاقسى كورسەتىشى بويىنشا باعا­لانباق. وسىلايشا, تۋريستىك قىزمەت نىساندارىنىڭ باسىمدىق باعىتى انىق­تالادى.

«بۋراباي دامۋ» جاۋاپكەرشىلىگى شەك­تەۋلى سەرىكتەستىگى قىسقى دەمالىس تۇر­لە­رىن ودان ءارى دامىتۋ ماقساتىندا شاڭعى مارشرۋتىن ۇيىمداستىردى. بۇل جول «بۋراباي لەند» ويىن-ساۋىق پاركىنەن «ايناكول» قوناقۇيىنە دەيىن جالعاسىپ جاتىر. جالپى ۇزىندىعى 30 شاقىرىمعا جۋىق. ءدال وسى جەردە «ەكستريم پارك» جۇمىس ىستەيدى. ويىن-ساۋىق پاركىنىڭ اۋماعىندا كۇيمەلى شانامەن سەرۋەندەپ, اتقا مىنۋگە ابدەن بولادى. ءتىپتى قازىرگى كۇنى كوپ كەزدەسە بەرمەيتىن ءۇش ات جەگىلگەن ەرتەگىلەر الەمىنىڭ شاناسىنا ءمىنۋدىڭ ءوزى ءبىر قىزىق. شىتىرمان جولدار, توبەدەي توڭكەرىلگەن توبەشىكتەر كوڭىل قىزىقتىرىپ, وزىنە تارتادى.

وسىلايشا, كوركەم ءوڭىردىڭ كورىكتى كەلبەتىن تاماشالاپ, ساف اۋاسىن جۇتىپ, قۇر اتقا مىنگەندەي قۋناپ شىعا كەلەتىن تۋريستەردىڭ بابىن تابۋ باعالى ءىس. جان جادىراتار جايلىلىقتى, دارحان تابيعاتتىڭ ءوزى سىيلاعان عاجايىپ كورىنىستى ءجىتى كوڭىلمەن ءسۇزىپ, قىزىعىنا باتقان, ءدامىن تاتقان ءبىر كەلگەن جاننىڭ كۇندەردىڭ ءبىر كۇنىندە قايتا اينالىپ سوعارى انىق. ول ءۇشىن بۇگىنگىنىڭ بەدەرىن جاقسارتىپ, بەينەسىن ايشىقتاپ ەڭبەك ەتۋ قاجەت. سوندا عانا سونىعا تۇسكەن سوقپاقتىڭ كەڭەيە تۇسەتىندىگى بەلگىلى.