«راديونىڭ نەگىزگى باعىتى – اقپاراتتىق-تانىمدىق. قازاقتىڭ ۇلتتىق, رۋحاني دۇنيەلەرىن كوبىرەك ناسيحاتتاۋعا باسىمدىلىق بەرىلەدى. تاڭعى اقپاراتتىق-ساۋىقتىق حابار, ءتۇرلى سالاداعى تۇلعالارمەن سۇحبات, كوڭىلگە وي سالار تانىمدىق باعدارلامالار, اسەم ءان, اۋەزدى كۇي, ماڭىزدى ءارى قىزىقتى جاڭالىقتار لەگى... تۇرعىندار ءبارىن ەندى «جەتىسۋ» راديوسىنان تىڭدايدى دەگەن سەنىمدەمىز. باعدارلامالاردىڭ ىشىندە ء«بىر ءاننىڭ تاريحى», «قايراتكەر», «بىلتە شامنىڭ جارىعى», «ويتولعاق», «شاپاعات», «عيبرات» سياقتى عيبراتى مول حابارلار تىڭدارمان كوڭىلىنەن شىعادى دەگەن ءۇمىت بار. ەلدەگى ماڭىزدى وقيعالار كۇنىنە بىرنەشە مارتە «جاڭالىقتار» ارقىلى جۇرتقا جەتەدى», دەيدى «جەتىسۋ» راديوسىنىڭ باس رەداكتورى ەسبولات ايدابوسىن.
راديو ۇجىمىنا بەلگىلى جۋرناليستەرمەن قاتار امبەباپ تەحنيكا ماماندارى جينالىپتى. ولاردىڭ قاتارىندا اينۇر تولەۋ, مۇحيت توقتاسىن, سالتانات جەكسەمبەك, ارشىن ايدىنبەك ۇلى سىندى رەداكتورلار ەڭبەك ەتەدى. ال مۋزىكالىق ارلەۋ, قاداعالاۋ ماقسات ارىستانباەۆ پەن دىبىس رەجيسسەرى سافا سەرعازىنىڭ موينىندا ەكەن. شىعارماشىلىق قۇرام الداعى ۋاقىتتا تاعى دا جاڭا ماماندارمەن تولىعا بەرمەك.
ء«بىراز جىل بۇرىن مارقۇم بەيسەن قۇرانبەك, دوسان قىزايبەك ۇلى ۇشەۋمىز قاتار وتىرىپ, سول كەزدەگى وبلىس اكىمى اماندىق باتالوۆقا شەكارا ماڭىنداعى اۋدانداردىڭ قىتاي تىلىندە حابار تىڭداپ وتىرعانىن, وڭىرگە راديو جيىلىگى اسا كەرەك ەكەنىن جەتكىزىپ ەدىك. ماقۇل دەگەن كەلىسىم الدىق. سودان بەرىدە توم-توم قاعاز جينادىق, ەكى-ءۇش بايقاۋدا ءىرى راديولار الدىمىزدى وراپ, سۇرىندىك. بىلتىر مينيسترلىك كونكۋرسىن ۇتىپ, ءتۇرلى ينستانتسيالاردىڭ كەلىسىمىن الدىق. ەسبولات پەن اينۇر توپ جيناپ, راديوحاباردىڭ قىر-سىرىن مەڭگەرۋگە كىرىستى. ەندى, مىنە, بار اۋىرتپالىقتى ارتقا تاستاپ, اۋە تولقىنىنا شىعار ساتكە كەلدىك. وتكەندە تىلدەسكەندە ايماقتىڭ جاڭا اكىمى قانات بوزىمباەۆ تا ايماققا اقپارات بەرۋ اسا ماڭىزدى ەكەنىن ايتىپ ەدى. قۇداي قالاسا, جەتىسۋدىڭ ەڭ قيىرداعى اۋىلدارى قازاقشا ءان-كۇي, حابار تىڭدايتىن بولادى. ەڭ اۋەلى تالدىقورعان قالاسى, كوكسۋ, ەسكەلدى اۋداندارى تىڭدارمان بولماق. ودان كەيىن قىتايلىق راديودان مەزى بولعان جاركەنت, الاكول ءوڭىرى كەزەكتە تۇر. رايىمبەك اۋدانىنىڭ شەكارا ماڭىنداعى اۋىلدارىنا دا قوندىرعى ورناتىلادى. بالقاشتىڭ سوناۋ قيىرداعى قۇيعان اۋىلى دا ەلدىڭ تىنىس-تىرشىلىگىن ءبىلىپ وتىرادى», دەدى «جەتىسۋ» تەلەارناسىنىڭ ديرەكتورى سەرىك ابىكەن ۇلى.
ايتا كەتەيىك, «جەتىسۋ» راديوسىن وبلىس تىڭدارماندارى تاۋلىك بويىنا ءار وڭىردە ءارتۇرلى جيىلىكتە تىڭداي الادى. ماسەلەن, تالدىقورعان قالاسىندا -107.2, جاركەنت-106.5, تەكەلى -104.8, ءۇشارال-104.3, لەپسى -103.8, بالقاش اۋدانى, بالاتوپار ەلدىمكەنىندە -102.1, قۇيعان - 101.7, رايىمبەك اۋدانىنداعى قىزىلۇش, جالاڭاش اۋىلدارىندا 100 جيىلىگىنەن قوسىلۋعا بولادى.
