جەكەلەي سىندا جارىس جولىنا شىققان بىردە-ءبىر جەرلەسىمىز بيىلعى Australian Open دوداسىندا جانكۇيەرلەردىڭ كوڭىلىنەن شىعاتىنداي ويىن كورسەتە المادى. تەك جۇپتىق باسەكەدە كورتقا شىققان اننا دانيلينا عانا فينالدىق كەزەڭگە دەيىن جەتىپ, اۋستراليادا مەرەيىمىزدى اسىردى. برازيليالىق بەاتريس حادداد مايامەن بىرگە جۇپ قۇراپ ويناعان جەرلەسىمىز ءوزىنىڭ سپورتتىق كارەراسىندا تۇڭعىش رەت «ۇلكەن دۋلىعا» ءتۋرنيرىنىڭ فينالىندا ونەر كورسەتۋگە مۇمكىندىك الدى. دەگەنمەن شەشۋشى ساتتە بالا كەزدەرىنەن جۇپ قۇراپ ويناپ جۇرگەن اسا تاجىريبەلى چەحيالىقتار باسىم ءتۇستى.
ناقتىلاي ايتساق, دانيلينا مەن مايا فينالدا وسى ءتۋرنيردىڭ ءبىرىنشى راكەتكالارى سانالاتىن چەحيالىق باربورا كرەيچيكوۆا جانە كاتەرينا سينياكوۆامەن كەزدەسىپ, ءۇش سەت قورىتىندىسى بويىنشا 2:1 ەسەبىمەن جەڭىلىپ قالدى. قازاقستاندىق-برازيليالىق جۇپ العاشقى پارتيانى 7:6 ەسەبىمەن ءوز پايدالارىنا جازدى. ەكىنشى سەتتە چەحيالىقتار ەسە قايتارىپ ۇلگەردى – 6:4. سوڭعى, شەشۋشى سەتتە باربورا مەن كاتەرينا جەڭىستى ج ۇلىپ الدى – 6:4. وسىلايشا, قازاقستاندىق تەننيسشىلەر اراسىندا العاشقى بولىپ اۋستراليا بىرىنشىلىگىنىڭ فينالىنا دەيىن جەتكەن ا.دانيلينا بۇگىنگى الەمدىك رەيتينگتە جۇپتىق سىندا ۇزدىك 25 تەننيسشىنىڭ قاتارىنا كىردى.
قازاقستاندىق-برازيليالىق جۇپ بيىلعى ماۋسىمدا العاش رەت بىرگە ويناپ, ءبىر ايدىڭ ىشىندە ەكى بىردەي جارىستىڭ فينالىندا جۇلدەگە تالاستى. قاڭتار ايىنىڭ ورتاسىندا ولار سيدنەي WTA 500 تۋرنيرىندە ۇزدىك شىققان بولاتىن. سيدنەيدە قازاقستاندىق-برازيليالىق جۇپ 4 ماتچتىڭ ۇشەۋىندە سۋپەر تاي-برەيكتە قارسىلاستارىن تىزە بۇكتىردى. ال مەلبۋرندە 5 كەزدەسۋىنىڭ تورتەۋىندە ءۇشىنشى, شەشۋشى سەتتە جەڭىستى ج ۇلىپ الدى. ءبىر ايتا كەتەرلىگى, چەحيالىق تەننيسشىلەر فينالعا دەيىن قارسىلاستارىنا بىردە-ءبىر سەت بەرگەن جوق. ولار 2018 جىلى فرانتسيا اشىق چەمپيوناتى مەن ۋيمبلدون جارىسىندا دا قارسىلاس شاق كەلتىرمەسە, بىلتىر رولان گارروس پەن گۆادالاحارادا WTA قورىتىندى ءتۋرنيرىنىڭ جەڭىمپازدارى اتاندى. سونىمەن قاتار چەحيالىقتار بىلتىرعى توكيو وليمپياداسىندا دا جەڭىس تۇعىرىنان كورىندى.
