ماسكەۋدەگى بيريۋلەۆو ۆوستوچنوە اۋدانىنداعى كوپقاباتتى ءۇيدىڭ 22 قاباتىنىڭ بالكونىنان قۇلاعان سەگىزىنشى سىنىپ وقۋشىسى ءتىرى قالدى. قازىرگى تاڭدا ول اۋرۋحانادا دارىگەرلەردىڭ باقىلاۋىندا جاتىر. قۇقىق قورعاۋ ورگاندارىنىڭ قىزمەتكەرلەرى قىزدىڭ قالاي قۇلاعانىن انىقتاپ جاتىر.
توتەنشە جاعداي 29 قاڭتاردا ماسكەۋدەگى زاگورەۆسكايا كوشەسىندەگى كوپ قاباتتى ۇيلەردىڭ بىرىندە بولعان.
قۇقىق قورعاۋ ورگاندارىنىڭ مالىمەتىنشە, سەگىزىنشى سىنىپ وقۋشىسى ءبىر بالكوننان ەكىنشى بالكونعا وتپەك بولعان. وعان قۇربىسى كومەكتەسكەن. قۇربىسى ونىڭ قولىنان ۇستاپ تۇرعان. بىراق ءالى جەتپەي, وقۋشى تومەن قۇلاپ كەتتى.
22-ءشى قاباتتان قۇلاعانىنا قاراماستان, ءجاسوسپىرىم قىز اۋىر جاراقات العان جوق. قازىر فيلاتوۆ اۋرۋحاناسىندا دارىگەرلەردىڭ باقىلاۋىندا جاتىر.
وقۋشىنى بۇعان نە يتەرمەلەگەنىن پوليتسەيلەر انىقتاپ جاتىر. كەيبىر مالىمەتتەر بويىنشا, قىز ىشىمدىك ىشكەن.
