Cerebra – يشەميالىق جانە گەمورراگيالىق ءينسۋلتتىڭ اۆتوماتتاندىرىلعان دياگنوستيكاسىنا ارنالعان نەيروراديولوگيا سالاسىنداعى جاساندى ينتەللەكت. جوبا قازاقستاننىڭ 17 ينسۋلت ورتالىعىندا ءساتتى جۇمىس ىستەپ جاتىر. كومپانيا بۇل باعدارلامانى ەلدەگى بارلىق ينسۋلت ورتالىقتارىنا ورناتۋدى جوسپارلاپ وتىر. ونى ازىرلەگەن Almaty A.I. Lab كومپانياسى 2018 جىلدان بەرى جاساندى ينتەللەكت سالاسىنداعى تەحنولوگيالاردى ازىرلەۋمەن اينالىسادى.
«الەمدە ينسۋلت دياگنوستيكاسىمەن اينالىساتىن بىرنەشە ءىرى كومپانيا بار. يزرايل, ۇلىبريتانيا جانە اقش باسەكەلەستەرىنىڭ قارجى, پەرسونال سانى, جاساندى ينتەللەكتىنى وقىتۋعا مەديتسينالىق دەرەكتەر كولەمى بويىنشا ايقىن ارتىقشىلىقتارىنا قاراماستان, ءبىزدىڭ كوماندامىزدىڭ ادامزاتقا پايداسىن تيگىزۋگە موتيۆاتسياسى مول. دامىعان ەلدەردە ينسۋلتتان بولاتىن ءولىم-ءجىتىم كورسەتكىشى ازايتىلدى, ال ەلىمىزدە ينسۋلت ءولىمنىڭ ءبىرىنشى سەبەپتەرىنىڭ ءبىرى بولىپ قالۋدا. جوبانى شەتەلگە تاراتۋ ءۇشىن ءبىز قازاقستاندا جاقسى ناتيجە كورسەتۋىمىز كەرەك. بۇل رەتتە ءبىز مەملەكەتتىك قولداۋعا مۇقتاجبىز», دەيدى جوبا نەگىزىن قالاۋشىسى دوسجان ءجۇسىپوۆ.
Astana Hub ءباسپاسوز قىزمەتىنىڭ PR جانە ماركەتينگ ءبولىمىنىڭ اعا مەنەدجەرى التىنگۇل جاڭابايدىڭ ايتۋىنشا, Cerebra – Astana Hub جانە احقو رەزيدەنتى. MedTech ستارتابى باستاپقى كەزەڭدە سينگاپۋرداعى Quest Ventures ۆەنچۋرلىق قورىنان قارجىلاندىرۋدى تارتتى. سونىمەن قاتار جوبا ء«سابي» قورىنىڭ ء«وز بيزنەسىڭدى قۇر 2019-2020» بايقاۋىندا 1-ورىنعا يە بولدى. Cerebra قازاقستاندىق جانە شەتەلدىك ستارتاپتار اراسىندا جوعارى ورىنعا يە. ياعني Astana Hub نۇسقاسى بويىنشا 2020 جىلدىڭ ۇزدىك ستارتاپتار وندىعىنا, Irbis Ventures نۇسقاسى بويىنشا ورتالىق ازياداعى ەڭ كەلەشەكتى ستارتاپتار وندىعىنا كىردى, ال 2021 جىلدىڭ مامىرىندا جوبا شىعىس ەۋروپا, ورتالىق ازيا جانە رەسەيدەگى 700 ستارتاپتاردىڭ ىشىندە EMERGE Challenge 2021 فيناليستەردىڭ بەستىگىنە ەندى.
