– بيىلعى قاڭتار باستالعالى بەرى 5 مىڭعا جۋىق ناۋقاس تىركەلدى. تالداۋ كورسەتكەندەي, قاڭتاردىڭ العاشقى اپتاسىندا – 59, ەكىنشى اپتادا – 130, ءۇشىنشى اپتادا 1 936 ادام كوروناۆيرۋس ينفەكتسياسىن جۇقتىردى. ال سوڭعى اپتاداعى ستاتيستيكاعا سۇيەنسەك, ناۋقاستار سانى 2 448-گە جەتتى, – دەيدى اسەل مۇقاەۆا.
قازىر ينفەكتسيالىق ستاتسيونارلاردا 362 ناۋقاس ەم قابىلداپ جاتىر. ولاردىڭ اراسىندا 76 جۇكتى ايەل بار. ال ءوز ۇيىندە 6 788 ادام قاۋىپتى ۆيرۋستان ەم-دوم الۋ ءۇشىن وقشاۋلانعان. جانساقتاۋ بولىمىندەگى 19 ناۋقاستىڭ 4-ەۋى وكپەنى جاساندى جەلدەتۋ اپپاراتىنا قوسىلدى.
ال 25 قاڭتاردا جىلىوي اۋدانىنىڭ باس سانيتار دارىگەرى ت.ءحابيبۋلليننىڭ قاۋلىسىمەن «تەڭىز», «پرورۆا», «مورسكوي» جانە ولارعا ىرگەلەس باسقا دا كەن ورىندارىندا كارانتيندىك شەكتەۋ شارالارى قايتا كۇشەيتىلدى. سوعان سايكەس كولىكتە, كەڭسەلەردە, اسحانالاردا (تاماق ءىشۋ ۋاقىتىن قوسپاعاندا), تۇرعىن بلوكتاردا جانە باسقا دا جابىق وندىرىستىك ەمەس نىسانداردا بەتپەردە كيۋ ءتارتىبىن ورىنداۋ, ينفەكتسيا جۇقتىرعان ادامداردى باقىلاۋعا ارنالعان وقشاۋلاۋعا بايلانىستى كارانتين رەجىمىنىڭ ساقتالۋىن قامتاماسىز ەتۋ ۇسىنىلعان. اسىرەسە «تەڭىز» كەن ورنىنا بوگدە كولىك قۇرالدارىنىڭ كىرىپ-شىعۋىنا تىيىم سالىندى. ىلەسپە قۇجاتتاماسى جوق, ءوتۋ ۋاقىتى, قوزعالىس مارشرۋتى مەن قاجەت بولعان جاعدايدا قايتۋ ۋاقىتى تىركەلمەگەن كولىك قۇرالدارىنىڭ قوزعالىسىنا جول بەرىلمەيدى.
وسىنداي كۇردەلى ەپيدەميالىق احۋال قالىپتاسقان اتىراۋعا سپۋتنيك لايت ۆاكتسيناسىنىڭ 3 مىڭ دوزاسى جەتكىزىلدى. وبلىستىق دەنساۋلىق ساقتاۋ باسقارماسىنىڭ باسشىسى اسحان بايدۋاليەۆتىڭ تۇسىندىرۋىنشە, رەسەي فەدەراتسياسىندا شىعارىلعان ۆاكتسينانىڭ دوزالارى اتىراۋ قالاسىنداعى №1, 2, 3, 4, 5, 7, گەولوگ, دامبى جانە ەركىنقالا ەلدى مەكەندەرىندەگى ەمحانالاردا, سونداي-اق جەتى اۋداندىق ورتالىق اۋرۋحانانىڭ ەگۋ پۋنكتتەرىنە تاراتىلدى.
اتىراۋ وبلىسى
