سونداي ناۋقاستاردىڭ ءبىرى – اقتاۋ قالاسىنان كەلگەن 55 جاستاعى دينا قىدىروۆا. ول ۆەلوسيپەدتەن قۇلاپ, جاراقات العان.
«مەن ەشقاشان اياعىمنىڭ اۋىرعانىنا شاعىمدانعان ەمەسپىن. قازاق «بەينەت اياق استىنان» دەيدى. قىركۇيەك ايىندا بۋرابايدا دەمالىستا بولدىم. قالانىڭ قاربالاسىنان دەمالىپ, دەنساۋلىعىمدى تۇزەيمىن دەپ ويلادىم. وكىنىشكە قاراي, بۇگىنگە دەيىن سول جەردەن العان جاراقاتتىڭ زاردابىن تارتتىم. ۆەلوسيپەدتەن قۇلادىم. تىزەم كوز الدىمدا ۇلكەن دوپتاي ءىسىپ كەتتى», دەپ ەسكە الادى دينا قىدىروۆا.
ەمدەلۋشىنىڭ ايتۋىنا قاراعاندا, جاراقات سالدارىنان ءجۇرۋى قيىنداپ, ۇزاق ۋاقىت بويى فيزيوتەراپيالىق ەم العانىمەن ەش ناتيجە بەرمەگەن كورىنەدى.
«تىزەم قاتتى اۋىردى, جەرگىلىكتى دارىگەرلەر دياگنوز قويا المادى. مرت-دان كەيىن عانا دارىگەر مەنيسكىنىڭ جارىلۋى مۇمكىن ەكەنىن ايتىپ, ەلورداداعى تراۆماتولوگيا جانە ورتوپەديا عىلىمي ورتالىعىنا وتا جاساتۋعا جىبەردى. ارتروسكوپيا جانە سپورتتىق جاراقات بولىمىندە ماعان وتا جاسالدى. انەستەزيادان قاتتى قورقاتىنمىن. بىراق دارىگەرلەر ءوز ءىسىنىڭ كاسىبي ماماندارى ەكەن. بارلىعىن ءتۇسىندىرىپ, سۇراقتارىما جاۋاپ بەردى. ءمامس اياسىندا تەگىن ەمدەلۋ مۇمكىندىگىنە يە بولعانىم ءۇشىن ەرەكشە العىس ايتامىن. دارىگەرلەردىڭ قولدارى التىن, قىزمەتتەرىنە باسىمدى يەمىن», دەدى دينا قىدىروۆا.
ناۋقاستىڭ دارىگەرى مارات ورازوۆ تىزە بۋىنىنىڭ تارتىلۋى نەمەسە سىنۋى كەزىندە مەنيسكىنىڭ جارىلۋى ءجيى كەزدەسەتىن تىزە پاتولوگياسى ەكەنىن ايتادى. مۇنداي جاراقات كەزىندە ءىسىنۋ جانە وتكىر اۋىرسىنۋ بولادى.
ء«بىز ناۋقاسقا 21 قاڭتاردا وتا جاسادىق. وپەراتسيا 20 مينۋتقا عانا سوزىلدى. كامەرا باقىلاۋىنداعى ەكى پۋنكتسيا ارقىلى از ءينۆازيۆتى ارتروسكوپيالىق وتا جاسالدى. سوندىقتان سول جەردە بۇكىل بۋىندى, شەمىرشەكتىڭ, بايلامداردىڭ, ۇساق تۇيىرشىكتەردىڭ جاعدايىن تەكسەرىپ, ناۋقاستىڭ اۋىرسىنۋىنا اكەلەتىن تۇراقسىز بولىگىن الىپ تاستادىق», دەپ ءتۇسىندىردى دارىگەر.
مۇنداي وتالاردىڭ ارتىقشىلىعى, پاتسيەنت كەلەسى كۇنى وزدىگىنەن قوزعالا الادى. قالپىنا كەلۋ مەرزىمى 2 ايعا سوزىلادى, ياعني قىسقا ۋاقىتتان كەيىن پاتسيەنت قايتادان اياقتارىنا ادەتتەگىدەي جۇكتەمە سالىپ, جۇرە الادى.
جالپى, اكادەميك ن.ج.باتپەنوۆ اتىنداعى ۇلتتىق عىلىمي تراۆماتولوگيا جانە ورتوپەديا ورتالىعىندا وتكەن جىلى ءمامس اياسىندا بارلىعى 6 861 حيرۋرگيالىق وتا تەگىن جاسالعان. بۇل وسىنشا ناۋقاستارعا قوزعالىس ەركىندىگى مەن دەرتسىز ءومىر سىيلادى دەگەن ءسوز.
