كوزىن اشقاننان كوڭىلىنە تۇيگەنى ادامداردىڭ بۇقارالىق اقپارات قۇرالدارىنا دەگەن كول-كوسىر قۇرمەتى مەن ىقىلاسى. ايتسە دە ەشكىم باۋىر ەتى بالاسىنا «جۋرناليست بول» دەپ باتا بەرمەيتىن. كەيىن وسى جايدى كوپ ويلادى. سويتسە, قولىنان كەلمەيدى دەپ ەمەس, جۋرناليست بولۋ كەز كەلگەن جانعا جالىنان ۇستاتا بەرمەيتىن جامپوز كاسىپ دەپ ەسەپتەگەن بولار دەپ تۇيسىنەتىن.
بار عۇمىرى وسى سالادا وتكەن, بۇگىندە جەتپىستىڭ اسۋىنا تابان ىلىكتىرىپ وتىرعان جۇيرىك جۋرناليست باقبەرگەن تۇيمەباي ۇلى دا ءتورتىنشى, بەسىنشى سىنىپتاردا وقىپ جۇرگەنىندە, «كىم بولامىن؟» دەگەن تاقىرىپتاعى شىعارماعا «جۋرناليست بولامىن» دەپ جازىپ كورگەن ەمەس.
سەگىزىنشى سىنىپتان كەيىن اۋدان ورتالىعىنداعى تەحنيكۋمنىڭ مال دارىگەرلەرىن دايىندايتىن بولىمىنە وقۋعا ءتۇستى. بىراق ىشتەگى الابۇرتقان بالعىن سەزىم, ءسوز ونەرىنە دەگەن قۇشتارلىق بۇل ماماندىقتى قۇلاي سۇيە قويعان جوق. ىنتا كەم, ىقىلاس سولعىن بولعان سوڭ ءبىلىم الۋدىڭ دا ءمانى بولمادى. ەكى ايدان سوڭ ۇيگە ورالعان. ەندى تەحنيكۋم جاققا تراكتورعا تىركەپ تارتساڭ دا بارعىسى كەلمەيدى, بۇك ءتۇسىپ جاتىپ العان. جاي جاتقان جوق, بالاڭ جۇرەكتەگى بالعىن سەزىمدەردى اق قاعازدىڭ بەتىنە جىر قىلىپ تۇسىرە باستادى.
ارادا ەكى اي وتكەن سوڭ توعىزىنشى سىنىپتىڭ پارتاسىنا قايتا وتىردى. ايىبىن جۋعىسى كەلگەندەي, ءبىلىم تەڭىزىنە تەرەڭىرەك سۇڭگىگەن. ورتا مەكتەپتى ءبىتىرىپ شىعار كەزدە ءۇي ىشىندە ابىر-سابىر باستالدى. مارقۇم اكەسى ايتادى: «جۋرناليستەردى رەسپۋبليكاداعى جالعىز ۋنيۆەرسيتەت وقىتادى ەكەن. ونداعى الاتىنى ەلۋ بالا عانا». ارعى جاعى بەلگىلى. سول ەلۋدىڭ قاتارىنا ەنە الاسىڭ با, جوق پا دەگەن سويىلداي ساۋال تاعدىر جولىنا كەسە-كولدەنەڭ جاتىپ الاتىنداي. ارمانداي الىس الماتىعا ات ارىتىپ جەتە الا ما؟ اساۋ ارمان جالىنان ۇستاتار ما؟ شىلدەنىڭ ورتاسى اۋا كوڭىلگە قورقىنىش كىرگەن. قايران دا قايران اكەنىڭ دە شىدامى تاۋسىلعان بولۋى كەرەك, ءبىر كۇنى ىمىرت ۇيىرىلە سامولەتتىڭ بيلەتىن الدىنا لاقتىرا سالعانى. ەرتەڭگى بيلەت ەكەن. بۇعان سالسا قازىر ۇشۋعا دايىن. اناسى تاڭ اتقانشا ءداۋ قارا شاباداندى مىڭ رەت تەكسەرىپ شىققان شىعار. كازمۋ-ءدىڭ قابىلداۋ كوميسسياسىنداعى تۇرىمتاي اپاي بالاسى كەلگەندەي قارسى الدى.
– زاتتارىڭدى ءارى-بەرى سۇيرەتپەي, مىنا جەرگە قويىپ كەت. نيكولسكي بازارىنىڭ جانىنداعى جاتاقحاناعا جولداما بەرەمىن, ەمتيحانعا مۇقيات دايىندال. شىعارماشىلىق كونكۋرسقا اكەلگەن ماتەريالدارىڭ بار ما؟ – دەپ سۇراپ قويادى.
«قازاقستان پيونەرى» مەن اۋداندىق گازەتكە شىققان ءتورت ماتەريالى بار ەدى. نەگە ەكەنىن كىم ءبىلسىن, جاڭا عانا جۇزىنەن مەيىرىم نۇرى توگىلىپ تۇرعان اپايى باسىن شايقادى. الدە بالاڭ قالاممەن جازىلعان بالاۋسا دۇنيەلەردى ازىرقاندى ما ەكەن؟ ايتسە دە, شىعارماشىلىق سىناقتان ءوتىپ كەتكەنى. قازىر ويلاپ قاراسا, ءوزىنىڭ كلاستاسى ءارى ۇلگىلى وقۋشى ولجاباي تۋرالى جازعان «قىزىل گالستۋكتى بالا» دەپ اتالاتىن سۋرەتتەمەسى مەن اۋىلداعى پوشتاشى كامەن اتاي تۋرالى جازىلعان ماقالاسى كوڭىلدەرىنەن شىقتى بىلەم دەپ ويلاپ قويادى.
– ونىنشى سىنىپتان كەيىن قازمۋ-گە توپ ەتىپ تۇسە قالعاندىقتان, بەينە ءبىر ون ءبىرىنشى سىنىپقا تۇسكەندەي بالاڭ دا الاڭ كوڭىلدە ەدىك, – دەيدى باقبەرگەن تۇيمەباي ۇلى. جۋرناليستيكا فاكۋلتەتىنىڭ دەكانى تاۋمان اماندوسوۆ بارشامىزدى جيناعاندا, ءار وبلىستان كەلگەن ۇمىتكەرلەردىڭ قاتارى ويسىراپ قالعانداي كورىندى. ۆينوگرادوۆ كوشەسىندەگى 88-ۇيدەگى جاتاقحانادامىز. ءبىر-بىرىمىزبەن ەندى تانىسىپ جاتىرمىز. ىشىمىزدە كىم جوق دەيسىز, اقىن دا, جازۋشى دا وسىندا, ارتىستەر دە بار ەكەن. ونەر دەگەنىڭىز جەتىپ ارتىلادى. سول جىلدارى اتتارى دۇركىرەپ تۇرعان تولەگەن ايبەرگەنوۆ, مۇقاعالي ماقاتاەۆ, مۇحتار شاحانوۆتىڭ ولەڭدەرىن جاتقا ايتادى, ورالحان بوكەەۆ, ساعات اشىمباەۆ, جاقاۋ داۋرەنبەكوۆتىڭ گازەت-جۋرنالدارعا شىققان ماقالالارىن وقىعان كەزدە اۋزىڭدى اشىپ, كوزىڭدى جۇماسىڭ. بىردە دەكاناتتان بىزگە «لەنينشىل جاسقا» باراسىڭدار دەدى. سول گازەتتە ابيتۋريەنتتەرگە ارنالعان رۋبريكا اشىلعان ەكەن. ۇلبىرەگەن ۇمىتپەن جازعان دۇنيەلەرىمىزدى ۇسىندىق. جولى بولعانداردىڭ ىشىندە مەن دە بارمىن. سول ءبىر ءسات قانات ءبىتىرىپ, سەنىمىمدى نىعايتتى.
وقۋعا جاڭا تۇسكەن ستۋدەنتتەردىڭ الدىندا نە ستيپەنديا الۋ, نە جاتاقحانا الۋ دەگەن تاڭداۋ تۇرعان. ەكىنىڭ ءبىرى. بىرەۋىن الساڭ, ءبىرى جوق. امالسىزدان ستيپەنديا الۋعا كەلىسكەن. ەندىگىسى پاتەر تابۋ. پاتەر دە تابىلدى, پاتەرمەن بىرگە جاقسى جولداس تا. بولات شىرىنبەكوۆ ەكەۋىنە ساۋىتبەك ابدراحمانوۆتىڭ جولىققانى. ۇشەۋى كوتوۆسكي كوشەسىندەگى 19-ۇيدە تۇردى. ۇياداي عانا شاعىن بولمە. ساۋىتبەكتىڭ قارا شابادانى – قازىنا. ءبارى كىتاپ. مۇحتار اۋەزوۆ, شىڭعىس ايتماتوۆ, عابيت مۇسىرەپوۆ, ءسابيت مۇقانوۆ, تولستوي مەن پۋشكين دە وسىندا, بۋنين مەن حەمينگۋەي دە ءجۇر. باقىت ەكەۋى تاڭ قالعان. جۋرفاكتا دا وسىنى وقىتا ما؟ جۇرەكتەرى ماي ىشكەندەي كىلكىدى.
1975 جىلى جۋرناليستيكا فاكۋلتەتىن بىتىرگەننەن كەيىن قيانداعى اقمولانىڭ وبلىستىق «كوممۋنيزم نۇرى» گازەتىنە جولداما العان. ءاپ ەتكەن بەتتە, سولتۇستىك ءوڭىردىڭ سۇرقى جىلى قابىلداي قويمادى. قازاننىڭ قارا سۋىعى اپشىنى قۋىرىپ تۇر. اقمولادا ون كۇندەي جۇرگەن بولار, جەرسىنە المادى. ايتەۋىر, ءبىر ابىرويى بولعاندا وبلىستىق گازەت باسشىلارى بىزگە «كادردىڭ قاجەتى جوق» دەگەن انىقتاما جازىپ بەرگەنى. سول انىقتاما ارقىلى قولىنا ديپلومى ءتيدى. ءوزىنىڭ تۋعان ولكەسىندەگى, ياعني وڭتۇستىكتەگى قازىعۇرت اۋدانىنىڭ سول كەزدەگى «لەنين وسيەتى» دەپ اتالاتىن گازەتىندە جۇمىس ىستەدى. اتى اۋداندىق گازەت بولعانىمەن, جۇمىس مۇندا دا قايناپ جاتاتىن. 1978 جىلى قازاقستان جازۋشىلار وداعىنىڭ «جازۋشى» باسپاسىنا رەداكتورلىق قىزمەتكە الىندى. ءسوز اراسىندا اۋداندىق گازەتتە مۇنداي مارتەبەلى ورىنعا كەز كەلگەن قالامگەردىڭ الىنا بەرمەيتىندىگىن سىنالاي ايتا كەتسەك تە ارتىقتىعى بولماس.
– جان جارىم باقىتتىڭ وتباسىلىق جاعدايىنا وراي 1980 جىلى كورىكتى كوكشەگە قونىس اۋدارۋىنا تۋرا كەلدى. سودان بەرى وسى ارۋاق قونىپ, نار شوككەن كيەلى جەردىڭ بەل بالاسىنا اينالدىم, – دەيدى باقبەرگەن تۇيمەباي ۇلى, – اۋەلى وبلىستىق «كوكشەتاۋ پراۆداسى» گازەتىنە ورنالاستىم. جازعانىم ۇزبەي جاريالانىپ, ەل تانىپ ەڭسەلەنگەن كەزدە ءبولىم مەڭگەرۋشىسى, رەداكتسيا القاسىنىڭ مۇشەسى, كاسىپوداق ۇيىمىنىڭ توراعاسى بولدىم.
گازەت رەداكتورى بەلگىلى قالامگەر, مارقۇم جانايدار مۋسين ەدى. تەرىسكەي وڭىردە قازاق جۋرناليستەرى تاپشى كەز. باقبەرگەندى ۇجىممەن تانىستىرعان كەزدە قازاقستان جازۋشىلار وداعىنىڭ باسپاسى «جازۋشىنىڭ» اۋدارما رەداكتسياسىندا قىزمەت اتقارعاندىعىنا سالماق تۇسىرە سويلەسە كەرەك. رەدكوللەگيا القاسىنىڭ مۇشەلەرى: «بۇل بالا وسال بولمادى عوي, قىزمەت مەكتەبى دە مىقتى ەكەن» دەسكەن. كوكشەنىڭ كۇيەۋ بالاسى – باقبەرگەن قالامگەرلەردىڭ قالىڭ ورتاسىندا بولعاندىعىن بىردەن بايقاتىپ, «تاستاي باتىپ, سۋداي ءسىڭىپ» جۇرە بەرگەن. العاشىندا جۇيرىك جۋرناليست مامان ەمەنتاەۆ باسقاراتىن اۋىل شارۋاشىلىعى بولىمىندە ىستەسە, كەيىن بەلگىلى اقىن تولەگەن قاجىباەۆ باسشىلىق جاساعان پارتيا تۇرمىسى بولىمىنە اۋىسقان.
قالامى شاشاسىن شاڭ باسپاس مايدا جورعا, ەنجارلىعى جوق, بارىنشا جيناقى, شىمىر ويلىلىعى تالايدى كورگەن كوپتىڭ كوڭىلىنەن شىقسا كەرەك. جاسىراتىنى جوق, ول تۇستا پارتيالىق تالاپتار ۇدەسىنەن شىعامىز دەپ سان جۋرناليست تالاي رەت شامىرقانىپ, سان رەت تاۋى شاعىلىپ جاتاتىن ءسات از بولمايتىن. رەداكتور جانايدار مۋسين جۋرناليستەردىڭ قارىم-قابىلەتىن تەرەڭىرەك بىلگىسى كەلگەندىكتەن بە ەكەن, كەز كەلگەن تاقىرىپتى جازۋعا جەتەلەپ, ارنايى تاپسىرما بەرىپ وتىراتىن. شىنتۋايتىندا بۇل ءبىر ۇلكەن مەكتەپ. تۇپكى وي, جۋرناليست ادام قاساڭ قالىپتا قالىپ قويماي, امبەباپ بولسىن دەگەن نيەت تە. مىنە, وسىنداي سىندارلى سىناقتان سۇرىنبەي وتكەن باقبەرگەن امالبەكوۆ 1992 جىلى رەسپۋبليكالىق «ەگەمەن قازاقستان» گازەتىنە تىلشىلىككە اۋىسقاندا, كەز كەلگەن تاقىرىپتى جەرىنە جەتكىزە جازاتىن, شەبەرلىگى مەن تاجىريبەسى قاپتال جەتەتىن قارىمدى قالام يەسى ەدى.
ەل گازەتى «ەگەمەندە» شيرەك عاسىر ەڭبەك ەتتى. تاقىرىپ تا سانالۋان. ءوڭىردىڭ جىلت ەتكەن جەتىستىگىن, جالپاق جۇرتتى جاقسى ىسكە باعىتتاۋ, جاڭا, ءتيىمدى باستامالاردى ناسيحاتتاۋ, قاراپايىم ەڭبەك ادامدارىنىڭ تىرشىلىگىن قاۋزاپ جازۋ دەيسىز بە, ات ۇستىنەن تۇسكەن جوق. قالام قايراتىن تانىتتى.
ءجۋرناليستىڭ جۇگىن تارازىعا تارتقىمىز كەلىپ ۋاقىت تابىمەن سارعايعان گازەت تىگىندىلەرىن اقتارىپ شىقتىق. مىنە, جامپوز ءجۋرناليستىڭ قالامىنان تۋعان, كوكەيكەستى تاقىرىپتى قاۋزاعان سۇيەكتى ماقالا. «دەندروپارك دەمەۋ كۇتەدى». بۋراباي باۋرايىنداعى اعاش تۇقىمىن وسىرۋمەن اينالىساتىن ۇجىمنىڭ قوماقتى ماسەلەلەرى. ماقالانى وقىپ شىققاندا ءوزىمىز دە بۇل تاراپتاعى ءبىلىمىمىزدى ءبىراز جەتىلدىرىپ قالعاندايمىز. اعاش ءتۇرىنىڭ مىڭنان اساتىندىعىن كىم بىلگەن. كادىمگى قاراعايدىڭ ءوزىنىڭ ەلۋدەن استام ءتۇرى بار. سان جىلدار بويى ورمان شارۋاشىلىعى عىلىمىن كوركەيتۋگە سەپتەسىپ كەلە جاتقان ۇجىم ماسەلەسى شاشەتەكتەن ەكەن. اۆتوردىڭ وزىمەن تىلدەسكەنىمىزدە بۇل ماقالا ەل گازەتى – «ەگەمەندە» جاريالانعان سوڭ قازاقستان رەسپۋبليكاسى پارلامەنتى ماجىلىسىندە قارالىپ, شەشىمىن تاپقان ەكەن. مىنە, ەل ىشىندەگى كوزدەن تاسا, كوڭىلدەن جىراق قالعان, ايتسە دە, وتە قاجەتتى دۇنيەنىڭ تىنىسىن ءدوپ باسىپ, جازا بىلگەن ءجۋرناليستىڭ ەڭبەگىنىڭ جانعانىن كورسەتەتىن دۇنيە. ەندىگى ءبىر قاۋزاعان تاقىرىبى ەلوردا مەن بۋرابايدىڭ اراسىن جالعاپ جاتقان كۇرە جولدىڭ كۇرمەۋى كوپ ساتتەرى. ەل تاۋەلسىزدىگىن العان كەزدە بۇل جولدىڭ بابى كەلىسپەي جاتقاندىعى شىندىق. مىنە, وسى جايدى «كۇرە جولدا دا كۇرمەۋى كوپ ماسەلە بار» دەپ جازعان ەكەن. جالعىز جولدىڭ جايى عانا ەمەس, جول بويىنداعى جولاۋشىلارعا كورسەتىلەر قىزمەت تە تاپتىشتەلىپتى.
مىنا ءبىر جايدى ايتا كەتپەي بولماس. ەگىن وراعىنىڭ قىزىپ تۇرعان شاعى. كەيىپكەرىمىز سول كەزدەگى كوكشەتاۋ وبلىسىنا قاراستى چيستوپولە اۋدانىنداعى «جاركول» كەڭشارىنا بارا قالادى. كۇنىمەن ەگىستىك القاپتاردى ارالايدى. قاس قارايعان سوڭ كەڭشار ديرەكتورى نازىمبەك جاعىپاروۆ شاي ىشۋگە شاقىرادى. الدارىنا اس كەلىپ, اڭگىمە-دۇكەن وربىگەن كەزدە كەڭشار ديرەكتورى ۇلىنىڭ سىرقاتتانىپ جۇرگەنىن ايتادى. جۇرەگى دىمكاس ەكەن. ول تۇستا بۇگىنگىدەي جۇرەككە وتا جاساۋ تاجىريبەگە ەنبەگەن ۋاقىت. جازدىڭ كۇنى رەسەيدىڭ ءنوۆوسىبىر قالاسىنداعى جۇرەك اۋرۋلارى كلينيكاسىمەن حابارلاسقان ەكەن. شاقىرتۋ كۇزدە كەلىپتى. ەندى بارايىن دەسە, جاۋاپتى ناۋقان. بارمايىن دەسە, باۋىر ەتى بالاسىن ەمدەتۋ كەرەك. تىعىرىققا تىرەلگەن جايى بار. قايران دا قايران اكەنىڭ ءبىر قولىن ەكى ەتە الماي ەت جۇرەگى ەلجىرەپ وتىرعانىن كورگەن باقبەرگەن اعا ج ۇلىپ العانداي, «مەن اپارىپ كەلەيىن» دەپتى. ءسويتىپ, ءتورت كۇن ۋاقىتىن بالاعا ارناعان. ساپار ساتىمەن اياقتالىپتى. كەيىن اۋرۋىنان قۇلانتازا جازىلعان جەتكىنشەك كوكشەتاۋ قالاسىنداعى تەحنيكالىق ينستيتۋتقا وقۋعا ءتۇسىپ, وفيتسەرلىك شەن العان. اراگىدىك كوشەدە كەزدەسىپ قالعاندا جۇگىرىپ كەلىپ سالەم بەرەدى ەكەن. وسى تاقىلەتتەس تاعى ءبىر وقيعانى ايتا كەتسەك, ارتىق بولماس. بىردە بۇرىنعى ءۋاليحانوۆ اۋدانىنا بارعان. شارۋاسىن تياناقتاي كەلە كوشەگە شىقسا, كوز تانىس ازاماتتىڭ جولىعا كەتكەنى. كادىمگى وبلىستىق «كوكشەتاۋ پراۆداسىنا» ءماندى ماقالالارىن جاريالاپ تۇراتىن جەرگىلىكتى ءتىلشى تىلەۋحان ماجەنوۆ. قىتايدان كەلگەن ازامات. اماندىق-ساۋلىق سۇراسقان سوڭ تىلەۋحان باقبەرگەندى ۋاقىتشا تۇرىپ جاتقان جەرىنە الىپ كەلەدى. سويتسە الدەبىر مەكەمەنىڭ وت جاعاتىن قازاندىعى. مىنا جايدى كورگەندە ءجۋرناليستىڭ يمانى قاسىم بولادى. مىنانداي جەردە دە تۇرۋعا, كۇن كورۋگە بولا ما؟ ىلە وسى جايدى اۋداندىق گازەتتىڭ رەداكتورى ايدارحان كارىپحانوۆقا جانە اۋدان باسشىلارىنا ايتىپ قۇلاعدار ەتەدى. ماسەلەنىڭ بايىبىنا بارعان باسشىلار جەرگىلىكتى ءتىلشىنىڭ جاعدايىن جاساپ بەرسە كەرەك.
باياعى بالعىن شاقتاعى ولەڭ ولكەسىنە دەگەن قۇمارلىعى دا كوكىرەگىنەن ءبىر شىقپاي قويدى. گازەت جۇمىسىنان قولى قالت ەتكەندە, مولدىرەتىپ جىر جازاتىن. «كەرىمسال» اتتى العاشقى جىر جيناعى جارىق كورگەندە, كوكشەدەگى ويلى وقىرمان ەلەڭ ەتكەن. ءار جولى وي استارىنا اتان تۇيەگە جۇك بولار سىر بۇككەن, وزىندىك ايتارى بار ولەڭدەر وقىعان جاننىڭ جان-دۇنيەسىن باۋراپ, عاجايىپ ءبىر الەمگە سۇڭگىتىپ جىبەرگەندەي. ورتالارىن كەلەس وزەنى عانا ءبولىپ جاتقان, قاناتتاس قونعان ەكى اۋىلدىڭ قاراپايىم تىرلىگىن سيپاتتايتىن «سىرلى وزەن» اتتى ولەڭىن وقىپ قاراڭىزشى:
قيال قۇسى قايدا ۇشىپ سامعادى؟
بالكىم, جانىن جاستىق
شاقپەن جالعادى.
قارسى الاتىن شارباعىنا سۇيەنىپ,
ەكى اۋىلدىڭ ەرتە تۇرعان شالدارى.
كوكىرەگىن قولامتانىڭ شوعىنداي قىزدىرىپ جاتاتىن كونە سۋرەتتەر. كادىمگى قاراشا اۋىلدىڭ قوڭىرقاي تىرشىلىگى. جانىنا جاقىن ەل ادامدارىنىڭ ەستەن كەتپەس بەينەسى. ادەمى ەمەس پە؟! ارينە, ادەمى!
وسى جيناقتاعى:
اينام بولىپ ايدىن كول,
تاراق بولعان ساۋمال جەل.
نەمەسە
ۋىسىمدا جىبەك جەل – شاشىڭ قالدى,
ۇلەستىرىپ جاتقانداي ءمولدىر اسپان.
ايتپەسە,
ۇيقىسىنان وياناتىن جۇلدىزدار,
شەلەگىڭنىڭ سىڭعىر-سىڭعىر ۇنىمەن,
– دەيتىن شۋماقتاردان اقىن باقبەرگەن اعانىڭ قالامىنان تۋعان قاپىسىز ادەمى سۋرەتتەردى كورەسىز. كورەسىز دە, ءوز جانىڭىزعا دا جاقىن, ءوزىڭىز دە ايتقىڭىز كەلگەن كورىنىستەر ەسكە تۇسەدى. جۇرەك تۋرالى جازعانى جۇرەككە جەتەتىندەي.
بارماقتاي عانا ارداقتىم,
سىندارعا تالاي سالماقپىن.
ءبىر تۇتام مىنا ومىرگە,
بارىمدى بەرىپ قالماقپىن.
سەنەسىز. ويتكەنى, اقىن
سەندىرە سويلەيدى.
قازاقستان جۋرناليستەر وداعىنىڭ مۇشەسى باقبەرگەن امالبەكوۆ «كەرىمسال», «قارجى پوليتسياسىنىڭ قارىمى», «الەمگە ادەمى قاراڭىز», «قايىعىن قيسايتپاعاندار قاعيداتى», «سىرىن ۇعۋ الەمنىڭ – تۇزۋىمەن سالەمنىڭ» اتتى جيناقتاردىڭ اۆتورى. سونداي-اق «زەرەندى كوكتەمى» جاس اقىندار جيناعىن قۇراستىرىپ, ونداعان تالاپكەرلەرگە وڭ ساپار تىلەدى.
كۇيەۋلىكتەن باۋىرلىققا اۋىسقان باقبەرگەن اقىن كوكشەتاۋ وڭىرىنەن ءوزىنىڭ باياندى باقىتىن تاۋىپ, الاش جۇرتىنىڭ يگى مۇراتىنا ءالى دە قىزمەت ەتىپ كەلەدى. «اقپارات سالاسىنىڭ ۇزدىگى», قازاقستان جۋرناليستەر وداعى سىيلىعىنىڭ لاۋرەاتى, قازاقستاننىڭ قۇرمەتتى ءجۋرناليسى باقبەرگەن امالبەكوۆ بۇگىندە رەسپۋبليكالىق «اقيقات ارناسى» گازەتىنىڭ وبلىستاعى مەنشىكتى ءتىلشىسى.
