قازاقستاندىقتار 4-20 اقپان ارالىعىندا بەيجىڭدە وتەتىن قىسقى وليمپيادا ويىندارىن «Qazaqstan», «Qazsport», «حابار» جانە «El arna» تەلەارنالارىنان تىكەلەي ەفيردە كورە الادى. وليمپيادا ويىندارىنىڭ ىرىكتەۋ جارىستارى 2 اقپاننان باستالادى.
XXIV قىسقى وليمپياداعا قاتىساتىن قازاقستان قۇراماسىندا 87 جولداما يەلەنگەن 34 سپورتشى بار. قازاقستاندىق سپورتشىلار شاڭعى جارىسى, فريستايل اكروباتيكا جانە موگۋل, كونكيمەن جۇگىرۋ, شورت-ترەك, بياتلون, تاۋ شاڭعىسى, تۇعىردان سەكىرۋ, شاڭعى قوسسايىسى سياقتى 8 سپورت تۇرىنەن سىنعا تۇسەدى.
«Qazaqstan» جانە «Qazsport» تەلەارنالارىندا ترانسلياتسيالارعا ەسەي جەڭىس ۇلى, رۋسلان باقىتجان, تيمۋر سۇلەيمەنوۆ, سەرگەي رايليان, ەرسىن ەرىك ۇلى, ءۋاليحان قوسانباي, سامات قاناعاتوۆ, الەكساندر ولەينيك, ديدار قادىروۆ, دانيلا مالىشەۆ, جىگەر ازبەرگەن, اسەم نۇرلانوۆا, ليليانا ءالجانوۆا, ينديرا بەكتەنوۆا كوممەنتاتورلىق ەتەدى. «Qazaqstan» تەلەارناسىنداعى وليمپيادا ويىندارىنىڭ اشىلۋ, جابىلۋ سالتاناتى مەن جارىستار تولىقتاي قازاق تىلىندە جۇرگىزىلەدى. كوممەنتاتورلارمەن بىرگە تىكەلەي ەفيرگە قىسقى سپورت تۇرلەرى بويىنشا جاتتىقتىرۋشىلار مەن سپورت ساراپشىلارى شاقىرىلادى. ءاربىر جارىستىڭ الدىندا جانە جارىس كۇنىنەن كەيىن «بەيجىڭ-2022» اتاۋىمەن تىكەلەي ەفيردەگى ستۋديالىق باعدارلامالار ۇيىمداستىرىلادى.
XXIV قىسقى وليمپيادا ويىندارىنىڭ اشىلۋ سالتاناتى نۇر-سۇلتان ۋاقىتىمەن 4 اقپان 17:55-تە باستالادى.
قازاقستان ۇلتتىق قۇراماسى ەل تاريحىندا قىسقى وليمپيادا ويىندارىندا 8-ءشى رەت باق سىنايدى.
