XX عاسىردىڭ باسى. يسپان تۇماۋى. ءدال قازىرگى دۇربەلەڭ كەزەڭنىڭ كەسكىن-كەلبەتىنە قاراپ, سول ءساتتىڭ ءبىتىمىن ويشا سىزۋعا بولاتىنداي. ابىگەرگە تۇسكەن الەم اۋەلگى سىرقاتتىڭ شىرماۋىنا ورالدى. جاھاندىق ىندەتپەن جالاڭ قول الىسقان دارىگەرلەر سۋرەتشى ەگون شيلەنىڭ وتباسىن امان الىپ قالا المادى. قايعىدان قان جۇتقان قىلقالام شەبەرى قايدا بارسا دا ءوز ولىمىنە جولىعا بەردى. ءارى قاراي ءومىرىنىڭ ءمانى كەتىپ, مۇڭى قالعانداي كۇي كەشتى.
جان ازابى جانىنا باتقان شەبەر 1918 جىلى «ماحاببات» كارتيناسىن جازادى. بۇل ونىڭ اجالىنىڭ سيمۆولدىق حابارشىسى ەدى. اقىرى ەۋروپا كونتينەنتىنىڭ مىڭداعان تۇرعىنىنىڭ ءومىرىن قيعان قورقىنىشتى دەرت سۋرەتشىنىڭ دە عۇمىرىنا نۇكتە قويدى. اۋەلدەن-اق شىعارماشىلىعى دراماعا تولى جاس سۋرەتكەر دۇنيەدەن قايتارىن كۇنى بۇرىن سەزگەن دەسەدى.
«ماحاببات» كارتيناسى تاعى ءبىر اتاقتى اۋستريالىق سۋرەتشى گۋستاۆ كليمتتىڭ شىعارماشىلىعىنا ءتان گلامۋرلىق-ميفتىك ستيلدە جازىلعان. تۋىندىداعى باستى ءارى جالعىز كەيىپكەر – الاساپىران ىشىندەگى اۆتوردىڭ ءوزى.
جاس جىگىتتىڭ بەتى ايقىن ءۇشبۇرىشتى ءپىشىندى, مۇرنى قوڭقيعان, ەرنى ۇلكەن كەلگەن. ول بولمەدە نە بولىپ جاتقانىن ءبىلۋ ءۇشىن ءبىر قىرىنان قاراپ تۇر. سونداعى اڭگىمەگە قوسىلۋ ءۇشىن پورترەتتەن كەتۋگە دايىن سەكىلدى. ۇزىن كىرپىكتەرمەن قورشالعان جارقىن كوزدەرى كوڭىل بوساتادى. جالپى, سىرتقى كەلبەتى وتە ۇقىپتى جازىلعان, قوڭىر كويلەگى مەن قىسقا شاشى ادەمى ۇيلەسەدى. بىراق تىم ءالجۋاز. ءوڭى بوزعىلت-سارى, بۇل دەرتى مەڭدەگەن جاننىڭ ديدارى ەكەنى داۋسىز. سۋرەتتە انىق سىزىلعان فون جوق, ادام ەشكىمگە تاۋەلدى ەمەس جانە ەشكىمگە سەنبەيدى.
ءيا, بۇل – جۇرەگى جوق كارتينا. ەگون – جۇرەك ىزدەگەن ادام. ەڭ وكىنىشتىسى, ايەلى مەن قۇرساقتاعى بالاسى ىندەتتىڭ قۇربانى بولدى. ءبىر كۇندە, ءبىر ۋاقىتتا. سول سەبەپتى كەنەپ ءىشى بوزعىلت تۇستەرمەن بويالعان, قاراڭعى الەمنىڭ قۇرساۋىنان شىعا الماعان جاننىڭ ەلەسى كورىنەدى.
