قازاقستان • 26 قاڭتار، 2022

رومان سكليار نەمىس كومپانيالارىمەن كەلىسسوز جۇرگىزدى

119 رەت كورسەتىلدى

قر پرەمەر-ءمينيسترىنىڭ ءبىرىنشى ورىنباسارى رومان سكليار گەرمانيانىڭ ءىرى كومپانيالارىنىڭ باسشىلارىمەن ونلاين-كەزدەسۋ وتكىزدى، دەپ حابارلايدى Egemen.kz قر پرەمەر-ءمينيسترىنىڭ رەسمي سايتىنا سىلتەمە جاساپ.

ءىس-شارانىڭ كۇن تارتىبىندە قازاقستان-گەرمان ساۋدا-ەكونوميكالىق جانە ينۆەستيتسيالىق ىنتىماقتاستىعىن تەرەڭدەتۋگە، «جاسىل ەكونوميكانى» دامىتۋعا، بىرلەسكەن جوبالاردى ىسكە اسىرۋعا، سونداي-اق نەمىس ينۆەستورلارىنىڭ قۇقىقتارىن قورعاۋ شارالارى تالقىلاندى.

ونلاين-كەزدەسۋگە قازاقستانداعى نەمىس كومپانيالارى مەن فيليالداردىڭ 90 وكىلى قاتىستى، ولاردىڭ ىشىندە CLAAS، Svevind Group، Volkswagen، Siemens، Deutsche Bank، Knauf، Deutsche Bahn AG جانە باسقالارى بار.

ءوز سوزىندە رومان سكليار گەرمانيادان كەلگەن سەرىكتەستەردى قازاقستانداعى اعىمداعى قوعامدىق-ساياسي جانە الەۋمەتتىك-ەكونوميكالىق جاعداي تۋرالى، سونداي-اق مەملەكەت باسشىسى قاسىم-جومارت توقاەۆتىڭ باستامالارى مەن قر ۇكىمەتىنىڭ تۇراقتى ەكونوميكالىق ءوسۋدى، قوعامدىق ءال-اۋقات پەن ينۆەستورلاردىڭ قۇقىقتارىن قورعاۋدى قامتاماسىز ەتۋ جونىندەگى شارالارى تۋرالى حاباردار ەتتى.

ول شەتەلدىك سەرىكتەستەرمەن ىنتىماقتاستىقتىڭ قازاقستان ءۇشىن ەرەكشە ءمانى بار ەكەنىن اتاپ ءوتىپ، گەرمانيالىق ارىپتەستەرىنە قازاقستاننىڭ ينۆەستورلار مەن بيزنەس الدىنداعى بارلىق مىندەتتەمەلەرى مەن كەپىلدىكتەرى قاتاڭ ساقتالىپ، تولىق كولەمدە ورىندالاتىنىنا سەندىردى.

گەرمان بيزنەسىنىڭ وكىلدەرىنە ESG تالاپتارىن كۇشەيتۋ، جاھاندىق ەنەرگەتيكالىق جانە تەحنولوگيالىق كوشۋ جاعدايىندا قازاقستاننىڭ ينۆەستيتسيالىق تارتىمدىلىعىن ارتتىرۋ ءۇشىن ينۆەستيتسيالىق ساياساتتىڭ جاڭا تۇجىرىمداماسىن ازىرلەۋ تۋرالى حاباردار ەتىلدى.

گەرمانيا ەكونوميكاسى شىعىس كوميتەتىنىڭ توراعاسى و. گەرمەس ايماقتاعى گفر-دىڭ باس سەرىكتەسى قازاقستانمەن ىنتىماقتاستىقتىڭ ماڭىزدىلىعىن ەرەكشە اتاپ ءوتتى. ونىڭ ايتۋىنشا، ەل تۇراقتى ەنەرگيا ءوندىرۋ ءۇشىن ۇلكەن الەۋەتكە يە.

وسى تۇرعىدا ول گەرمانيالىق ىسكەر توپتار قازاقستان پرەزيدەنتىنىڭ باستامالارىن قولدايتىنىن جانە ەلدىڭ دامۋىنا ءوز ۇلەستەرىن قوساتىنىن جەتكەزدى. سونداي-اق، و.گەرمەس وسى جىلدىڭ مامىر ايىندا نەمىس بيزنەس-دەلەگاتسياسىنىڭ باسشىلىعىمەن قازاقستانعا ىسكەرلىك ساپار جاساۋ نيەتى تۋرالى حابارلادى.

گەرمان بيزنەسىنىڭ وكىلدەرى سوڭعى وقيعالار قازاقستانداعى كومپانيالاردىڭ ينۆەستيتسيالىق جوسپارلارىنا اسەر ەتپەگەنىن اتاپ ءوتىپ، ينۆەستيتسيالىق احۋالدى جاقسارتۋ ماقساتىندا جۇرگىزىلىپ جاتقان ساياساتقا قولداۋ ءبىلدىردى.

ەلشى م.يۆەرسەن، سونداي-اق CLAAS، Deutsche Bahn جانە Svevind Energy كومپانيالارىنىڭ باسشىلىعى دا پرەزيدەنتتىڭ احۋالدى تۇراقتاندىرۋ جونىندەگى شارالارىنا قولداۋ ءبىلدىرىپ، بىرلەسكەن جوبالاردى ىسكە اسىرۋ بويىنشا قازاقستانمەن ىنتىماقتاستىقتى جالعاستىرۋعا نيەت ءبىلدىردى.

ونلاين-كەزدەسۋ بارىسىندا «سۇراق-جاۋاپ» فورماتىندا پىكىرتالاس ءوتتى، وندا قاتىسۋشىلار پراكتيكالىق ماسەلەلەردىڭ ىسكە اسىرىلۋ بارىسىن ەگجەي-تەگجەيلى تالقىلادى.

سوڭعى جاڭالىقتار

ۇقساس جاڭالىقتار