الەم • 26 قاڭتار، 2022

بەردىمۇحامەدوۆ ۇلىبريتانيا ەلشىسىن تىعىرىققا تىرەدى

48 رەت كورسەتىلدى

2022 جىلعى 11 قاڭتاردا تۇركىمەنستان پرەزيدەنتى گۋربانگۋلى بەردىمۇحامەدوۆ ۇلىبريتانيا جانە سولتۇستىك يرلانديا بىرىككەن كورولدىگىنىڭ تۇركىمەنستانداعى جاڭادان تاعايىندالعان توتەنشە جانە وكىلەتتى ەلشىسى ليۋسي ۋايلد حانىمدى قابىلدادى، دەپ حابارلايدى Egemen.kz.

كەزدەسۋ بارىسىندا ەلشى پرەزيدەنتكە سەنىم گراموتاسىن تاپسىرعان. 

ليۋسي ۋايلد پرەزيدەنتكە II ەليزاۆەتا حانشايىم مەن پرەمەر-مينيستر بوريس دجونسوننىڭ ىستىق سالەمىن جەتكىزىپ، تۇركىمەنستاننىڭ تەڭدىك، ءوزارا قۇرمەت جانە تيىمدىلىك قاعيداتتارىنا نەگىزدەلگەن بايلانىستاردى نىعايتۋعا بەيىل ەكەنىن ءبىلدىردى. 

ال گ. بەردىمۇحامەدوۆ تۇرىكمەن-بريتان قارىم-قاتىناستارىن ءارتاراپتاندىرۋ قاجەت ەكەنىن ايتقان. 

بۇدان بولەك تاراپتار سىيلىق الماستى. بريتان ديپلوماتيالىق ميسسياسىنىڭ باسشىسى گ. بەردىمۇحامەدوۆكە فارفوردان جاسالعان ىدىس پەن حانشايىمنىڭ جىلقىلارى تۋرالى كىتاپ سىيلادى. پرەزيدەنتتە ەلشىنى قۇر-قول قايتارعان جوق. ول وعان قىمبات باعالاناتىن تۇركىمەن كىلەمىن سىيعا تارتتى. 

ايتا كەتەلىك، ۇلىبريتانيا سىرتقى ىستەر مينيسترلىگى ءوز قىزمەتكەرلەرىنىڭ سىيلىق قابىلداۋىنا قاتىستى انىق جانە قاتاڭ ساياسات ۇستانادى. 

ەرەجەگە سايكەس، شەتەلدە جۇمىس ىستەيتىن بريتاندىق ديپلوماتتارعا قۇنى 140 فۋنت ستەرلينگكە دەيىنگى سىيلىقتاردى ساقتاۋعا رۇقسات ەتىلگەن. 

ۋايلد حانىمعا بەرىلگەن كىلەم قىمباتىراق بولعاندىقتان، ول ونى ساقتاۋ ءۇشىن حانشايىمنىڭ قازىناسىنا ايىرماشىلىقتى تولەۋى كەرەك. ايتپەسە، سىيلىق ۋايلد حانىمنىڭ تۇركىمەنستانداعى قىزمەتى اياقتالعاننان كەيىن ۇلىبريتانيا ۇكىمەتىنە اۋكتسيون ارقىلى ساتىلادى.

سوڭعى جاڭالىقتار

ۇقساس جاڭالىقتار