تۇرعىندار جاعدايىنىڭ جاقسارۋى قالا ەكونوميكاسىنىڭ دامۋىمەن تىعىز بايلانىستى. وسى ورايدا مەگاپوليس باسشىسى ء«بىز ساۋدانىڭ, ونىڭ ىشىندە ونلاين-ساتۋدىڭ جاڭا فورماتتارىن ەنگىزۋ ارقىلى نارىقتىق ساۋداعا نەگىزدەلگەن ەكونوميكانىڭ قالىپتاسقان فورماتىنان اۋىتقيتىن بولامىز», دەپ اتاپ ءوتتى. وسى باعىتتا قالا اكىمدىگى تسيفرلاندىرۋ, كرەاتيۆتى يندۋستريا, ونەركاسىپ جانە باسقا دا جوعارى ءونىمدى سالالاردى دامىتۋ ەسەبىنەن ەكونوميكانىڭ قۇرىلىمدىق رەفورمالارىن جۇزەگە اسىرۋدا.
ال قالالىقتاردى جۇمىسپەن قامتۋ – ءومىر ءسۇرۋ ساپاسىن ارتتىرۋدىڭ ماڭىزدى قادامى ءارى ىسكەرلىك بەلسەندىلىكتى ىنتالاندىرۋدىڭ نەگىزى. اكىمنىڭ ايتۋىنشا, بۇگىندە سۇرانىسقا يە كادرلاردىڭ جەتىسپەۋشىلىگى ەڭبەك نارىعىنىڭ ناقتى قاجەتتىلىگىنە سايكەسسىزدىكتى كورسەتىپ وتىر. «وسىعان بايلانىستى ءبىلىم, قوعامدىق دامۋ, الەۋمەتتىك ءال-اۋقات باسقارمالارىنا كادرلاردى دايارلاۋ كەزىندە كوللەدجدەردىڭ باعدارلامالارىن قايتا قاراۋدى تاپسىرامىن», دەدى ب.ساعىنتاەۆ. سونىمەن بىرگە جاستاردى كاسىپتىك تەحنيكالىق دايارلاۋدى جانە جۇمىسسىزداردى قايتا وقىتۋدى كۇشەيتىپ, كەيىننەن جۇمىسقا ورنالاستىرۋ كوزدەلىپ وتىر. جەكە سەكتوردان جۇيەلىك وپەراتورلاردى تارتۋ ارقىلى بىلىكتى جۇمىس ورىندارى قۇرىلادى. سوڭعى 2 جىل ىشىندە «كاسىپ الاڭى», «الماتى بيزنەس» باعدارلامالارى بويىنشا كاسىپكەرلىك نەگىزدەرىنە وقىتۋ, 200 مىڭعا جۋىق ادامدى قامتيتىن Qolday كاسىپكەرلىك ورتالىعىنىڭ كۋرستارى جۇرگىزىلدى.
قالا باسشىسى بولاشاقتا ەكونوميكانىڭ ءتۇرلى سالاسىنداعى قاجەتتىلىكتەردى بولجاۋ ءۇشىن جاڭا ماماندىقتاردىڭ وڭىرلىك اتلاسى ازىرلەنەتىنىن اتاپ ءوتتى. «وتكەن جىلدان باستاپ ءبىز اۋدانداردىڭ مىقتى جاقتارىن باعدارلاي وتىرىپ, كلاستەرلىك ءتاسىلدى قولدانا باستادىق جانە جەتەكشى ۋنيۆەرسيتەتتەردى – سۇلەيمەن دەميرەل, الماتى مەنەدجمەنت ۋنيۆەرسيتەتى, قبتۋ, حاتۋ سياقتى وقۋ ورىندارىن اۋدانداردىڭ ستراتەگيالىق دامۋىنا جۇمىلدىردىق», دەدى ب.ساعىنتاەۆ.
وسىنىڭ بارلىعى يننوۆاتسيالىق جوبالاردى دامىتۋ ءۇشىن جاڭا جاعدايلار جاساۋعا جانە جاڭا كاسىبي قۇزىرەتتەر مەن جاڭا جۇمىس ورىندارىنا قاجەتتىلىكتى قالىپتاستىرا وتىرىپ, ءاربىر اۋداندى كۇشەيتۋگە مۇمكىندىك بەرەدى. بيىلدان باستاپ جاستار پراكتيكاسى بويىنشا جالاقى 25-تەن 30 اەك-كە دەيىن ۇلعايتىلدى. ء«بىز ءوز تاراپىمىزدان جەرگىلىكتى بيۋدجەتتەن قوسىمشا 10 اەك-كە تولەمدى ۇلعايتامىز, وسىلايشا جالاقى 122,5 مىڭ تەڭگەنى قۇرايتىن بولادى. ال جۇمىس ىستەيتىن مۇگەدەكتەر ءۇشىن الەۋمەتتىك جۇمىس ورىندارىن سۋبسيديالاۋ مولشەرى 63 مىڭنان 92 مىڭ تەڭگەگە دەيىن ۇلعايتىلادى. جالپى, بارلىق شارانىڭ ارقاسىندا كەمىندە 50 مىڭ جۇمىس ورنى اشىلادى» دەدى قالا اكىمى.
الماتى
