ايماقتار • 25 قاڭتار، 2022

سەمەيدە 150 ازامات Nur Otan پارتياسىنان شىعۋعا ءوتىنىش بىلدىرگەن

265 رەت كورسەتىلدى

سەمەيدە Nur Otan پارتياسى اتىنان سايلانعان قالالىق ءماسليحاتتىڭ ەكى دەپۋتاتى پارتيادان شىعۋعا ءوتىنىش بىلدىرگەن، دەپ جازادى Egemen.kz.

دۋلات قاجمۇحانبەت پەن ايدوس قيسامەنوۆ اتالعان پارتيانىڭ ارەكەتسىزدىگىنەن كوڭىلى قالعانىن ايتىپ، الەۋمەتتىك جەلىگە جازبا قالدىرعان. ارتىنشا تاعى 150 ازامات Nur Otan پارتياسىنان شىعۋعا ءوتىنىش جازعان.

سەمەيدە Nur Otan پارتياسىنىڭ دەپۋتاتتارى دۋلات قاجمۇحانبەت پەن ايدوس قيسامەنوۆ ءوز ەركىمەن وكىلەتتىكتەرىن توقتاتتى. وكىلدىك ورگاننان كەتۋ تۋرالى شەشىم قابىلداۋعا نە تۇرتكى بولدى دەسەك، ەكس-دەپۋتاتتار پارتيا باسشىلىعىنان قولداۋ تابا الماعاندارىن ايتادى.

Nur Otan پارتياسىنىڭ شقو بويىنشا فيليالى توراعاسىنىڭ ءبىرىنشى ورىنباسارى ولەگ چۋگۋنكوۆ پارتيادان شىعىپ كەتكەن سەمەيدەگى قالالىق ءماسليحاتتىڭ ەكى دەپۋتاتىنا قاتىستى پىكىر ءبىلدىردى.

ونىڭ ايتۋىنشا، ەكس ەكى دەپۋتات ءوز مەكەمەلەرىندەگى قىزمەتكەرلەردى دە پارتيادان شىعارىپ الۋدى كوزدەپ وتىر. شىعىپ كەتكەن 150 ادامنىڭ ورنىنا ءدال قازىر Nur Otan پارتياسى قاتارىنا 200 ادام ءوز ەركىمەن كىرۋگە دايىن ەكەن.

– بۇل دەپۋتاتتاردىڭ پارتيالىق مانسابى كەزىندە ەشقاشان ءوزىنىڭ ازاماتتىق ۇستانىمىن بىلدىرمەگەنىن، پارتيانىڭ بىردە-ءبىر الەۋمەتتىك ماڭىزدى جوباسىنا قاتىسپاعانىن، كەرىسىنشە تەك كۇن سايىن وزدەرىنىڭ سەلقوستىعىن كورسەتكەنىن اتاپ وتكىم كەلەدى. ساياسي پارتيا – بۇل ورتاق ساياسي ماقساتتار مەن ۇستانىمدار نەگىزىندە قۇرىلعان ازاماتتاردىڭ ەرىكتى بىرلەستىگى ەكەنىن ەسكە سالامىن. وسىلايشا، ەكى ازامات وزدەرىنىڭ اجىراماس كونستيتۋتسيالىق قۇقىقتارىن ەكى رەت پايدالاندى: ءبىرىنشى رەت پارتياعا كىرگەندە، ەكىنشىسى ودان شىققان كەزدە. ولارعا ايتارىمىز، جولدارى اشىق بولسىن! ءبىز ەشكىمدى كۇشپەن ۇستامايمىز، – دەيدى ولەگ ۆاسيلەۆيچ.

كەلەسى ايدان باستاپ Nur Otan جاريا فورماتتا پارتيا اتىنان دەپۋتاتتاردىڭ قوعامدىق رەيتينگىن قالىپتاستىرۋ ءۇشىن ونلاين پلاتفورمانى ىسكە قوسپاق. بۇل رەيتينگ ءماسليحاتتار دەپۋتاتتارىن حالىقپەن نەعۇرلىم ءتيىمدى جانە تۇراقتى ءوزارا ءىس-قيمىل جاساۋعا ىنتالاندىرۋ جانە سايلاۋ الدىنداعى باعدارلامالاردى ىسكە اسىرۋ ءۇشىن ولاردىڭ دەربەس جاۋاپكەرشىلىگىن ارتتىرۋ ماقساتىندا قۇرىلادى.

– Nur Otan باسەكەلەستىك كۇرەس ارقىلى كوشباسشى پارتيا بولىپ تابىلاتىنىن دالەلدەدى. ءبىزدىڭ الدىمىزدا كوپ جۇمىس پەن مىندەتتەر تۇر. مۇنداي ازاماتتاردىڭ شەشىمىنە الاڭداۋعا ۋاقىت جوق. مەملەكەت باسشىسى جاريالاعان رەفورمالاردى ساپالى جۇزەگە اسىرۋ ءۇشىن پارتيامىز تەك نىعايا تۇسەتىنىنە سەنىمدىمىن، – دەيدى ول.

سونداي-اق ولەگ چۋگۋنكوۆتىڭ ايتۋىنشا، «پارتيا قاتارىندا بولعاندى ۇناتاتىن، بىراق ءوزىن ونىڭ ءبىر بولىگى سەزىنبەيتىن» تۇلعالاردان جۇيەلى تۇردە تازارتۋ جۇمىستارى جىل سايىن جۇرگىزىلەدى.

سوڭعى جاڭالىقتار

يكبال الەمى

تانىم • كەشە

اسكەردەگى ادەبي كۇن

ايماقتار • كەشە

دامۋدىڭ كىلتى

قوعام • كەشە

ەل سەنىمىن ارقالاعان

قازاقستان • كەشە

تورعاي سۇڭقارى

ادەبيەت • كەشە

ۇلى شايقاس

ونەر • كەشە

ۇقساس جاڭالىقتار