ەلوردا • 25 قاڭتار، 2022

ەلوردالىق ءدىن وكىلدەرى ازاماتتاردى رەۆاكتسيناتسيادان وتۋگە شاقىردى

ەلوردالىق ءدىن وكىلدەرى «ابۋ-دابي پلازا» سوو-دا ورنالاسقان ۆاكتسيناتسيا پۋنكتىنە بارىپ، كوروناۆيرۋستىق ينفەكتسياعا قارسى رەۆاكتسيناتسيادان ءوتتى، دەپ حابارلايدى Egemen.kz قالا اكىمدىگىنىڭ رەسمي سايتىنا سىلتەمە جاساپ.

تابيعات مۇسىلمانقۇل

«بۇگىن ەلوردالىق ءدىن وكىلدەرى كوروناۆيرۋسقا قارسى رەۆاكتسيناتسيادان ءوتىپ جاتىر. ءبىز ۆاكتسيناتسيانى قولدايمىز. پاندەميامەن كۇرەستىڭ باستى جولى – ۆاكتسينا دەپ سانايمىز. سوندىقتان قالا تۇرعىندارىن ۆاكتسيناتسيادان جانە رەۆاكتسيناتسيادان وتۋگە شاقىرامىز. جالپى، ەلوردادا 54 ءدىني بىرلەستىك جۇمىس ىستەيدى، سونداي-اق قوعامدىق جانە ۇكىمەتتىك ەمەس ءدىني ۇيىمدار دا بار»، دەدى نۇر-سۇلتان قالاسىنىڭ ءدىن ىستەرى باسقارماسىنىڭ باسشىسى نۇرداۋلەت ءالمۇحانوۆ.

ونىڭ ايتۋىنشا، باسقارمانىڭ بارلىق قىزمەتكەرى ۆاكتسينانىڭ ەكى كومپونەنتىن العان. ال ەندى رەۆاكتسيناتسيادان ءوتىپ جاتىر. ولاردىڭ اراسىندا قازاقستان مۇسىلماندارى ءدىني باسقارماسى مەن ورىس پراۆوسلاۆ شىركەۋىنىڭ وكىلدەرى بار. بۇگىن ەلوردالىق ءدىنباسىلاردىڭ 60-قا جۋىق وكىلى رەۆاكتسيناتسيادان ءوتتى.

1656

ءوز كەزەگىندە نۇر-سۇلتان قالاسىنىڭ تۇرعىنى ارحيماندريت سەرگي ءدىني سەبەپتەرگە بايلانىستى ۆاكتسيناتسيادان باس تارتۋعا بولمايتىنىن ايتتى.

«پراۆوسلاۆيە حريستياندارى دا ەلدىڭ وزگە ازاماتتارى سياقتى كوروناۆيرۋستىق ينفەكتسيانىڭ قاۋپىن جاقسى بىلەدى. دىنگە سەنەتىندەردىڭ باسىم كوپشىلىگى ۆاكتسيناتسيادان ءارى رەۆاكتسيناتسيادان ءوتتى. ناتيجەسىندە كوپتەگەن ادام، اسىرەسە قارت كىسىلەر دەنساۋلىعىن قورعاپ قالدى. كوپتەگەن ءدىنباسىلار اۋىرىپ قالدى، تيىسىنشە وقشاۋلاندى. قانداي جاعداي بولماسىن، اۋرۋدىڭ ەمدەلۋ جولىن دىنمەن بايلانىستىرۋعا بولمايدى. ءدىني تىيىمداردى سىلتاۋراتىپ، ەكپەدەن قاشۋ قيسىنسىز. بۇل عىلىم مەن مەديتسينا ماسەلەسى. قازىرگى ۋاقىتتا ەكپە – ناعىز قورعانىس جولى، مەنىڭ تاجىريبەمدە ۆاكتسيناتسيا كوپتەگەن ادامنىڭ ءومىرىن ساقتاپ قالدى. ءدىني سەبەپتەر بويىنشا باس تارتۋدى اقتاپ الۋدىڭ ءمانى جوق. مەنىڭ جەكە پىكىرىم بويىنشا ۆاكتسيناتسيا – دەنساۋلىقتى قورعاۋ جانە جاقىندارىڭا كومەكتەسۋ»، دەدى ول.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز