باستاپقىدا قۇرلىقتىق حوككەي ليگاسىنىڭ پرەزيدەنتى الەكسەي موروزوۆ تۇراقتى بىرىنشىلىكتە باق سىنايتىن كوماندالاردىڭ باسشىلارىمەن بەينەبايلانىسقا شىعىپ, كوپشىلىكتىڭ قالاۋىمەن جارىستى جالعاستىرا بەرەتىن بولىپ شەشكەن ەدى. الايدا كوروناۆيرۋسقا شالدىققان ويىنشىلار مەن كوماندالاردىڭ كوپتىگىنە بايلانىستى ليگانى ۋاقىتشا توقتاتۋعا ءماجبۇر بولدى.
ء«بىز وتكەن اپتادا بىرقاتار كلۋب جەتەكشىلەرىمەن ونلاين كەزدەسۋ وتكىزىپ, قحل-دىڭ قازىرگى جاعدايىن تالقىلاعان ەدىك. قازىر ليگادا جاعداي تىم قيىن بولىپ تۇر. COVID-19 پاندەمياسىنا بايلانىستى 14 ماتچتى توقتاتىپ, بىرەۋىن باسقا كۇنگە اۋىستىردىق. سوڭعى اپتادا اۋرۋعا شالدىققانداردىڭ سانى 127 ادامعا جەتتى. پاندەميا باستالعالى بەرى قحل-دا مۇنداي كورسەتكىش تىركەلمەگەن ەدى. ەگەر كەستەگە قارايتىن بولساڭىز, 2020/21 جىلعى ماۋسىمدا بىزدە اپتاسىنا ەڭ كوپ دەگەننىڭ وزىندە 30 ادام عانا ىندەتكە شالدىقتى», دەدى ا.موروزوۆ.
تۇراقتى بىرىنشىلىكتىڭ ماتچتارى رەسمي توقتاتىلعانعا دەيىن «بارىستىڭ» سىرت ايدىنداعى ەكى ويىنى قارسىلاس كوماندا ويىنشىلارىنان كوروناۆيرۋس انىقتالۋىنا بايلانىستى كەيىنگە شەگەرىلدى. ماسەلەن, العاش ەلوردالىق كلۋبتىڭ «تورپەدومەن» (نيجني نوۆگورود) ماتچى كەيىنگە شەگەرىلسە, كەيىننەن پودولسكىنىڭ «ۆيتياز» كومانداسىنىڭ ويىنشىلارى مۇزايدىنعا تولىق قۇرامدا شىعا المايتىنى بەلگىلى بولعان سوڭ, ليگا باسشىلىعى بۇل كەزدەسۋدى دە توقتاتۋعا ءماجبۇر بولدى.
قحل-دىڭ مەرزىمىنەن بۇرىن توقتاتىلۋىنا جانە كوماندالاردىڭ ءبىر ايعا جۋىق ۇزىلىسكە شىعۋى ويىنشىلارعا قالاي اسەر ەتەتىنىنە قاتىستى «بارىستىڭ» باس باپكەرى يۋري ميحايليس پىكىر ءبىلدىردى.
– ۇزىلىسكە دەيىنگى بىرنەشە كۇن ءبىز ءۇشىن وتە قيىن ءوتتى. ەلدەگى جاعدايعا بايلانىستى سىرت ايدىنداعى ويىنعا ۇشۋىمىز ءبىراز تەجەلىپ, ونىڭ ۇستىنە ماگنيتوگورسكىدەگى بوراندى اۋا رايىنا بايلانىستى ۇشاعىمىز باسقا قالاعا قونۋعا ءماجبۇر بولدى. ول از بولعانداي, «مەتاللۋرگپەن» بولاتىن ويىنعا ماتچ باستالۋىنا ەكى ساعات قالعاندا ارەڭ جەتتىك. وسىنداي قيىن كەزەڭدى باستان وتكەرىپ جاتقاندا قارسىلاستارىمىزدىڭ ويىنشىلارىنان كوروناۆيرۋس انىقتالىپ, ماڭىزدى ماتچتارىمىز كەيىنگە قالدىرىلدى. دەگەنمەن بۇل جاعدايلارعا قاراماستان ويىنشىلاردىڭ ءبارى قازىر جاقسى فيزيكالىق كۇيدە ەكەنىن ايتقىم كەلەدى. ارينە, قالىپتاسقان جاعدايدا, ەڭ باستىسى, حوككەيشىلەردىڭ, جاتتىقتىرۋشىلاردىڭ, قىزمەتكەرلەردىڭ, ماتچتاردى وتكىزۋگە قاتىساتىن بارلىق ادامنىڭ دەنساۋلىعى ماڭىزدى ەكەنىن تۇسىنەمىز. سوندىقتان ءبارى ءماجبۇرلى ءۇزىلىس تۋرالى جاڭالىقتارعا تۇسىنىستىكپەن قارادى. قازىر جىگىتتەرگە دەمالۋعا ۋاقىت بەردىك. ءارى قاراي مىندەتتى تۇردە پتر-تەست تاپسىرىپ, ەلوردادا جاتتىعۋىمىزدى قايتا باستايمىز. ەندى ليگانىڭ جاڭارعان كەستەسىن كۇتەمىز. قحل ۇسىنعان كۇنتىزبەگە سۇيەنە وتىرىپ, ويىنىمىزدى جالعاستىراتىن بولامىز», دەيدى يۋ.ميحايليس.
تۇراقتى بىرىنشىلىك ويىندارى ۋاقىتشا توقتاعانعا دەيىن ەلوردانىڭ «بارىسى» چەمپيوناتتىڭ «شىعىس» كونفەرەنتسياسىنداعى تۋرنير كەستەسىندە 8-ورىنعا تۇراقتادى. جەرلەستەرىمىزدىڭ ەنشىسىندە 47 ماتچتان كەيىن 48 ۇپاي بار. ەگەر الدا-جالدا قحل ويىندارى ءدال وسى جەردەن توقتايتىن بولسا, «بارىس» پلەي-وفف كەزەڭىنە تىكەلەي جولداما الادى.
ازىرگە «بارىستى» تۋرنير كەستەسىندە ەكى كوماندا وكشەلەپ كەلەدى. ولار – «امۋر» مەن «اۆتوموبيليست». العاشقىسى «بارىستان» ءۇش ويىن كوپ وتكىزسە دە, ەكى ۇپاي كەم جيناعان. ال «اۆتوموبيليست» كوروناۆيرۋسقا شالدىققان ويىنشىلارى كوپ بولعاندىقتان, ەكى ماتچ از وتكىزگەن ءارى 6 ۇپاي قالىپ كەلەدى.
قازىرگى تاڭدا تۇراقتى بىرىنشىلىكتىڭ باسشىلىعى ءۇزىلىس ۋاقىتىن ءتيىمدى پايدالانىپ, ليگا ويىندارىنىڭ كۇنتىزبەسىن قايتا قاراپ, ءتۇرلى نۇسقانى تالقىلاپ جاتىر. جىلداعى ءداستۇر بويىنشا اقپان ايىنىڭ سوڭىندا قحل ويىندارى اياقتالىپ, ناۋرىزدا گاگارين كۋبوگى جولىنداعى پلەي-وفف ماتچتارى باستالاتىن ەدى. الايدا بيىلعى جاعداي ءسال وزگەشە بولىپ تۇر. وليمپيادالىق ۇزىلىستەن كەيىنگى ويىندار 22 اقپاندا قايتا جالعاسادى. ال كەيبىر كوماندالاردىڭ ءالى وينالماعان 15 ماتچى بار. ياعني كلۋبتار 15 كەزدەسۋدى ءار ەكى كۇن سايىن وتكىزگەننىڭ وزىندە ءبىر اي ۋاقىت كەرەك بولادى. دەمەك قحل ماتچتارى اقپاندا ەمەس, ناۋرىزدىڭ سوڭىندا اياقتالاتىن ءتۇرى بار. ال ءساۋىردىڭ سوڭىنا دەيىن گاگارين كۋبوگىنىڭ جەڭىمپازى انىقتالىپ ۇلگەرۋى كەرەك. سەبەبى بىرقاتار حوككەيشىنىڭ كوماندامەن كەلىسىمشارتى 30 ساۋىردە اياقتالادى.
– قازىر ءبىز مۇمكىن بولاتىن بارلىق جاعدايدى قاراستىرىپ جاتىرمىز. اۋەلى ءبىز تۇراقتى بىرىنشىلىكتى مەيلىنشە تەز اياقتاۋدى كوزدەپ وتىرمىز. ال گاگارين كۋبوگى جولىنداعى پلەي-وفف ويىندارى بويىنشا بىزدە ءتۇرلى نۇسقا بار. ستسەناري بويىنشا جۇمىس ىستەگەن كەزدە ءبىز مامىردا پلەي-وففتىڭ ءبىر بولىگىن ويناۋدى ماقسات ەتكەن ەدىك. الايدا مامىر ايىنا ءوتىپ كەتسەك, بىرقاتار زاڭدىق تۇرعىداعى ماسەلەگە تاپ كەلەيىن دەپ تۇرمىز. اتاپ ايتقاندا, قحل ەرەجەلەرىن وزگەرتۋگە, ويىنشىلاردىڭ كەلىسىمشارتتارىن قايتا جازۋعا, ساناۋلى ويىنعا بايلانىستى جالاقى تاعايىنداۋعا جانە تاعى باسقا ۇساق ماسەلەلەردى شەشۋگە تۋرا كەلەدى. سونىمەن قاتار 13 مامىردا فينليانديادا كەزەكتى الەم چەمپيوناتى باستالادى. IIHF ەرەجەلەرى بويىنشا ءبىز ويىنشىلاردى بىرىنشىلىككە ءبىر اپتا قالعاندا ۇلتتىق قۇرامالارىنا جىبەرۋىمىز كەرەك, – دەيدى ا.موروزوۆ.
رەسەيلىك باق وكىلدەرىنىڭ جازۋىنشا, قحل كوماندالارى تۇراقتى بىرىنشىلىك باسشىلىعىنان ويىنداردى جالعاستىرۋعا ارنالعان بىرنەشە نۇسقا ۇسىنىلعان رەسمي حابارلاما العان. كوماندالار وزدەرىنە ىڭعايلى ءبىر نۇسقانى تاڭداپ, باسشىلىققا جىبەرۋى كەرەك.
كوماندالاردىڭ باسىم بولىگى قحل-دىڭ بيىلعى ماۋسىمىن ادەتتەگىدەي 60 ەمەس, 52 ماتچپەن اياقتاۋعا نيەت تانىتىپ وتىرعان كورىنەدى. ال ليگا ويىندارى قالاي جالعاساتىنى تۋرالى رەسمي اقپارات جۋىق ارادا حابارلانادى.
