ءمان-جايدى انىقتاۋ ماقساتىندا ساعات 12:45-تە ەكولوگيا دەپارتامەنتىنىڭ ماماندارى ارنايى اسپاپپەن اۋاعا تاراعان زياندى زاتتاردىڭ مولشەرىن ولشەۋ ءۇشىن كاسىپورىننىڭ سانيتارلىق قورعانىس ايماعىنا شىققان. ەكولوگتەر وقيعا ورنىنا جەتكەن كەزدە №2 تسەحتان شىققان ءتۇتىننىڭ رەڭكى الەۋمەتتىك جەلىلەردە جاريالانعان فوتوسۋرەتتەگىدەي ەمەس ەدى. اۋاعا ءسىڭىپ ۇلگەرگەن.
ولشەۋ قورىتىندىسىندا ساعات 14.15-تە ەگوروۆ جانە شاياحمەتوۆ كوشەلەرىنىڭ بويىنان 200 مەتر قاشىقتىقتا حلوردىڭ اۋاعا تارالۋى شەكتى نورمادان اسىپ كەتۋ فاكتىسى انىقتالدى. ءسويتىپ, ەكولوگيا دەپارتامەنتىنە تۇسكەن ءوتىنىش نەگىزىندە 2021 جىلدىڭ 21 جەلتوقسانىنان 2022 جىلدىڭ 5 قاڭتارىنا دەيىنگى كەزەڭگە جوسپاردان تىس تەكسەرۋ ەنگىزىلگەن. الايدا جۇمىس ۋاقىتىنىڭ اياقتالۋىنا بايلانىستى قر قك 154-بابىنىڭ تالاپتارىنا سايكەس كاسىپورىن باسشىلىعى دەپارتامەنت قىزمەتكەرلەرىن اۋماققا كىرگىزۋدەن باس تارتىپتى.
دەپارتامەنت قىزمەتكەرلەرى وتىنىشتە اپاتتىق جاعداي ورىن الۋى مۇمكىن دەگەن مالىمەتتەر كورسەتىلگەنىن ەسكەرە وتىرىپ, ونى وبلىستىق ونەركاسىپتىك قاۋىپسىزدىك دەپارتامەنتىنە جولدايدى. ولاردىڭ 2021 جىلعى 29 جەلتوقسانداعى جاۋابىنا سايكەس «تمك» اق قاتىستى اپاتتىق فاكتىلەرىنىڭ ورىن الماعاندىعىنا جانە كاسىپورىن تاراپىنان ەشقانداي اقپاراتتىڭ بولماۋىنا بايلانىستى تەكسەرۋ ءىس-شارالارى جۇرگىزىلگەن جوق.
مەملەكەتتىك ەكولوگيالىق تەكسەرۋ قورىتىندىسىندا 2021 جىلدىڭ 21 جەلتوقسانىندا «تمك» اق تەحنولوگيالىق جابدىقتىڭ 4 فۋرماسىن قىسىممەن تازالاۋ بويىنشا جوسپارلى پروفيلاكتيكالىق جۇمىستار جۇرگىزگەنى انىقتالدى. الايدا بۇل مەملەكەتتىك ەكولوگيالىق ساراپتامانىڭ قورىتىندىسى بەرىلگەن جوبالىق شەشىمدەردە كورسەتىلمەگەن ەدى.
– 21 جەلتوقساندا №2 تسەحتا فۋرۋم قوندىرعىنى تازالاۋ بويىنشا جوسپارلى تەحنولوگيالىق جۇمىستار جۇرگىزىلدى. بۇل پروتسەدۋرا جوبالىق شەشىم رەتىندە قاراستىرىلماعان. كاسىپورىن اقبتك-ءنىڭ 332-بابى بويىنشا اكىمشىلىك جاۋاپكەرشىلىككە تارتىلدى. تارقاتىپ ايتساق, مەملەكەتتىك ەكولوگيالىق ساراپتاما قورىتىندىسىندا قامتىلعان تالاپتاردى ورىنداماعان. ايىپپۇل سوماسى 510 مىڭ تەڭگە بولادى. الەۋمەتتىك جەلىگە تاراعان ماتەريالدا اۋاداعى قىزعىلت ءتۇستى گاز قوسپاسىنىڭ ارتىق مولشەرى بايقالعان. ياعني تازارتۋ قاعيدالارىن بۇزعانى ءۇشىن اقبتك-ءنىڭ 331-بابى بويىنشا اتموسفەرالىق اۋاعا لاستاعىش زاتتاردىڭ شىعارىندىلارىن تازالاۋعا جانە باقىلاۋعا ارنالعان قۇرىلىستاردى نەمەسە جابدىقتاردى پايدالانباۋ جانە سارقىندى سۋلاردى اعىزعاندارى ءۇشىن ايىپپۇل سالىندى. ونىڭ سوماسى – 1 ملن 750 مىڭ تەڭگە. سونداي-اق ءتۇتىن قۇبىرىن ولشەۋ قورىتىندىسىندا كومىرتەگى وكسيدى 8,9 ەسە, حلورسۋتەگى 2,1 ەسە اسىپ كەتكەنى انىقتالدى. وسى جاعدايلار ءۇشىن «تمك» اق-عا اقبتك 328-بابى بويىنشا (قورشاعان ورتاعا رۇقسات ەتىلگەن انتروپوگەندىك اسەر نورماتيۆتەرىن بۇزۋ) ايىپپۇل سالىندى. ايىپپۇل سوماسى – 2 ملن 371 مىڭ تەڭگە, – دەدى وبلىستىق باس مەملەكەتتىك ەكولوگيا ينسپەكتورى, وبلىستىق ەكولوگيا دەپارتامەنتى باسشىسىنىڭ ورىنباسارى راۋان تۇراروۆ.
قازىرگى ۋاقىتتا دەپارتامەنت ماماندارى زاڭ بۇزۋشىلىقتاردى جويۋ ءۇشىن جانە №2 تسەحتا تۇزىلەتىن گازداردى تازارتۋ ءۇشىن تابيعاتتى نەعۇرلىم ءتيىمدى قورعاۋ ءىس-شارالارىن ەنگىزۋ تۋرالى نۇسقاما بەردى. جوسپارعا سايكەس كاسىپورىن ءبىر ۋاقىتتا 4 فۋرمانى تازالاماۋعا جانە ءار فۋرمادان كەيىن تازارتۋ ءۇشىن گازدى سورۋ جۇيەسىن قوسۋعا مىندەتتەلدى.
ەكولوگيا دەپارتامەنتى ماماندارى ۇسىنعان نۇسقامالاردىڭ ورىندالۋ-ورىندالماۋىن كەز كەلگەن ۋاقىتتا جوسپاردان تىس تەكسەرىلىپ, قورىتىندىلارى قوسىمشا حابارلاناتىن بولادى.
وسكەمەن
