بۇگىنگى تاڭدا قالا مەكتەپتەرىندەگى ورىن تاپشىلىعى 33 812 بولسا, بالاباقشالاردا 40 مىڭدى قۇرايدى. ونىڭ سەبەپتەرىن قۇرىلىس قارقىنىنىڭ تومەندىگى مەن بالا سانىنىڭ كوبەيۋىمەن بايلانىستىرعان قالا اكىمى بۇل ماسەلەنى شەشۋ ءۇشىن جاڭا مەكتەپتەر مەن بالاباقشالاردىڭ جەدەل قۇرىلىسىنا باسا نازار اۋدارا وتىرىپ, الەۋمەتتىك نىسانداردى اشۋ جوسپارلارى تۇزەتىلگەنىن جەتكىزدى. ناتيجەسىندە, بيىل 48, ياعني ونىڭ ىشىندە بيۋدجەت ەسەبىنەن – 16, ءمجا ارقىلى – 4, قۇرىلىس كومپانيالارىمەن مەموراندۋمدار بويىنشا – 16, جەكە ينۆەستيتسيالار ەسەبىنەن 10 مەكتەپ مەكتەپ اشۋ جوسپارلانعان. سونىمەن بىرگە اۋەزوۆ جانە بوستاندىق اۋداندارىنداعى ەكى مەكتەپتىڭ بۇرىن جەكەشەلەندىرىلگەن عيماراتتارى ساتىپ الىنادى.
قالا اكىمدىگىنىڭ دەرەگىنەن ءمالىم بولعانداي, بيىل 82 بالاباقشا (جالپى العاندا 10 مىڭنان استام ورىن) اشۋ جوسپارلانعان, ونىڭ ىشىندە 11 بالاباقشا كوممۋنالدىق مەنشىككە قايتارۋ سەبەبىنەن پايدالانۋعا بەرىلمەگەن. جەتىسۋ اۋدانىندا بۇرىنعى بالاباقشا عيماراتىن جانە 10 شاعىن اۋداندا بالاباقشانى ساتىپ الۋ جوسپارلانعان. بيۋدجەت ەسەبىنەن 9 بالاباقشا, جەكە ينۆەستيتسيالار ەسەبىنەن 60 بالاباقشا سالىنادى. الداعى 5 جىلعا دەيىن مەكتەپتەر مەن بالاباقشالارداعى ورىن تاپشىلىعىن بولدىرماۋدى مىندەت ەتىپ وتىرعان قالا باسشىلىعى مەكتەپتەن تىس تەگىن ءبىلىم بەرۋمەن قامتۋدى ارتتىرۋ ءۇشىن (قازىر بۇل كورسەتكىش نەبارى 9 پايىزدى قۇرايدى) ناۋرىز ايىندا دوستىق داڭعىلى بويىنداعى وقۋشىلار سارايىن جاڭعىرتۋدى اياقتاۋ, الاتاۋ جانە ناۋرىزباي اۋداندارىندا 2 جاڭا وقۋشىلار سارايىنىڭ, سونداي-اق بوستاندىق, المالى جانە تۇركسىب اۋداندارىندا ەسكى عيماراتتاردى بۇزىپ, 3 وقۋشىلار ءۇيىنىڭ قۇرىلىسىن دامىتۋ جوسپارلانىپ وتىر. سونىمەن قاتار قالادا تاريحي ورتالىقتى ساقتاي وتىرىپ, قۇرىلىس سالۋ ەرەجەلەرى قابىلدانعان. وسى ورايدا تۇرعىن ءۇي كەشەندەرى ماڭىندا مەكتەپتەر, بالاباقشالار, وزگە ينفراقۇرىلىممەن قولجەتىمدىلىكتى قامتاماسىز ەتۋ مىندەتتەمەلەرى ەنگىزىلگەن. سونىمەن قاتار الماتىلىقتاردىڭ «حالىقتىق بيۋدجەتكە قاتىسۋ» جوباسىنا بەلسەندى قاتىسۋى ناتيجەسىندە ۇسىنىستار ءۇش ەسەگە دەيىن وسكەن. بيىل جوبانى جۇزەگە اسىرۋعا 7,4 ملرد تەڭگە قاراستىرىلىپ وتىر. ال قارجىلاندىرۋ كولەمى تۇرعىندار سۇرانىسىنىڭ ارتۋىنا بايلانىستى بولادى.
الماتى
