ايماقتار • 21 قاڭتار، 2022

الماتىدا ب ۇلىكتەن زارداپ شەككەن بيزنەسكە قانداي كومەك كورسەتىلەدى

49 رەت كورسەتىلدى

الماتى اكىمىنىڭ ورىنباسارى ماقسات قيقىموۆ جاپپاي تارتىپسىزدىكتەر كەزىندە زارداپ شەككەن بيزنەس سۋبەكتىلەرىنە قانداي قولداۋ كورسەتىلەتىنىن ايتتى، دەپ حابارلايدى Egemen.kz.

قالا اكىمدىگىنىڭ مالىمەتىنشە، الماتىدا 1 600 بيزنەس سۋبەكتىسىنە 67،4 ميلليارد تەڭگە شىعىن كەلگەن. ونىڭ 95،4%-ءى – شوب نىساندارى، شىعىن سوماسى – 42،9 ميلليارد تەڭگە.

قيقىموۆ اكىمدىك ءوز تاراپىنان بيزنەسكە قوسىمشا قارجىلىق جانە قارجىلىق ەمەس قولداۋ شارالارىن كورسەتەتىنىن اتاپ ءوتتى.

«بىرىنشىدەن، زارداپ شەككەن شوب سۋبەكتىلەرىن 3 ايعا كوممۋنالدىق تولەمدەردەن بوساتامىز. شىعىندى جەرگىلىكتى بيۋدجەت ەسەبىنەن جابۋ تۋرالى شەشىم قابىلداندى. ەكىنشىدەن، شوب سۋبەكتىلەرى 6 اي مەرزىمگە كوممۋنالدىق نىساندار بويىنشا ارەندادان بوساتىلادى. الماتى قالاسىنىڭ مەملەكەتتىك اكتيۆتەر باسقارماسى جالعا الۋشىلاردىڭ ءتىزىمىن پىسىقتاپ، ولارمەن ءتۇسىندىرۋ جۇمىسىن جۇرگىزدى. بۇل شارا تەك زارداپ شەككەندەرگە عانا ەمەس، قالانىڭ كوممۋنالدىق نىساندارىنىڭ بارلىق جالعا الۋشىسىنا قاتىستى»، دەدى قيقىموۆ قالا اكىمدىگىندە وتكەن ءباسپاسوز ءماسليحاتىندا.

ۇشىنشىدەن، شەنەۋنىكتىڭ ايتۋىنشا، زارداپ شەككەن بيزنەسكە جەڭىلدىك جاساۋ جونىندەگى جەكە جالعا بەرۋشىلەرمەن كەلىسسوز جۇرگىزىلىپ جاتىر.

سونداي-اق Halyk Bank الماتىدا تارتىپسىزدىكتەر كەزىندە زارداپ شەككەن ميكرو-بيزنەس سەكتورىنىڭ قارىز الۋشىلارىنا بيزنەستى قالپىنا كەلتىرۋگە 1 ميلليون تەڭگە وتەۋسىز گرانت ءبولۋ تۋرالى شەشىم قابىلدادى. گرانتتى الۋ ءۇشىن شىعىن مولشەرىن راستاپ قاجەت ەمەس.

بۇدان بولەك، Halyk Bank زارداپ شەككەن كليەنتتەرىنە 6 ايعا دەيىنگى مەرزىمگە نەسيە تولەمى بويىنشا كرەديتتىك دەمالىس بەرەدى.

سونداي-اق، Halyk Bank تسۋم (ورتالىق امبەباپ دۇكەن)، «ماسكەۋ»، «ازيا-پارك»، «اپورت»، Promenade، Silk Way، «موبيلكا» جانە Globus ساۋدا ورتالىقتارىندا ىستەيتىن بانكتىڭ كليەنتى ەمەس ميكروبيزنەس وكىلدەرىنە دە قولداۋ كورسەتەدى. ولارعا كاسىبىن قالپىنا كەلتىرۋگە، سونىڭ ىشىندە قاجەتتى جابدىق ساتىپ الۋعا 1 ميلليون تەڭگە اۋدارىلادى.

بۇعان قوسا زارداپ شەككەن كاسىپكەرلەرگە قولداۋ كورسەتۋ اياسىندا «الماتى بيزنەس-2025» قالالىق باعدارلاماسىنا وزگەرىستەر ەنگىزىلەدى.



 

سوڭعى جاڭالىقتار

ۇقساس جاڭالىقتار