جولداما كوپ، ناتيجە قالاي بولار ەكەن؟

كۇنى كەشە مادەنيەت جانە سپورت ءمينيسترى داۋرەن اباەۆتىڭ توراعالىعىمەن بەيجىڭدە (قىتاي) وتەتىن XXIV قىسقى وليمپياداعا دايىندىق بارىسى تۋرالى كەڭەس ءوتتى. القالى جيىنعا مادەنيەت جانە سپورت ۆيتسە-ءمينيسترى سەرىك جاراسباەۆ، سپورت جانە دەنە شىنىقتىرۋ ىستەرى كوميتەتىنىڭ توراعاسى سامات ەرعاليەۆ، سپورت جانە دەنە شىنىقتىرۋ ىستەرى كوميتەتى توراعاسىنىڭ ورىنباسارى ايگۇل بەكتەنوۆا، ۇلتتىق وليمپيادا كوميتەتى (ۇوك) سپورت ديرەكتسياسىنىڭ ديرەكتورى ەلسيار قاناعاتوۆ جانە ۇوك باس حاتشىسى اندرەي كريۋكوۆ قاتىستى.

جيىندا ۆەدومستۆو باسشىسى قىسقى وليمپيادادا قازاق­ستاندىق سپورتشىلاردىڭ الدىندا تۇرعان بىرقاتار مىندەتتى اتادى.

– ەل ءۇشىن قازىرگى قيىن جاع­دايدا، سونىڭ ىشىندە كوروناۆيرۋس ينفەكتسياسىنىڭ كوبەيۋى كەزىندە ءبىز سپورتشىلارىمىزعا الداعى وليمپيادادا دوپينگسىز، جانجالسىز، لايىقتى ونەر كور­سەتۋ مىندەتىن قويدىق. ارينە، ءاربىر سپورتشى جەتىستىكتىڭ شىڭى سا­نالعان وليمپيادا مەدا­لىنە ۇمتىلادى. ال ءبىز وليمپيا­دا­شى­لارىمىزدىڭ كەز كەلگەن جەتىستىگىنە قۋانامىز. بۇل ءۇشىن مەم­لەكەت قولدان كەلگەننىڭ بار­لى­عىن جاساپ، سپورتشىلاردى دا­يىنداۋ ۇدەرىستەرىن، وقۋ-جات­تىعۋ جيىندارى مەن ىرىكتەۋ جا­رىستارىنا قاتىسۋىن قارجىلان­دىردى، – دەدى مادەنيەت جانە سپورت ءمينيسترى.

ۇلتتىق وليمپيادا كوميتە­تىنىڭ باس حاتشىسى اندرەي كريۋكوۆ قازاقستاندىق سپورتشىلاردىڭ XXIV قىسقى وليمپياداعا دا­يىن­دىق ماسەلەسىنە توقتالدى.

– بۇگىنگى كۇننىڭ باستى مىندەتى – سپورتشىلار مەن جاتتىق­تى­رۋشىلار دەنساۋلىعى مەن قاۋىپ­­سىزدىگىن ساقتاۋ. ولاردىڭ كوپ­شىلىگى، ياعني ىرىكتەۋ تۋرنير­لەرىن اياقتاعاندار سوڭعى اپتا بويى جابىق كارانتيندىك ايماقتاردا ورنالاستى. وندا دايىندىقتىڭ سوڭعى كەزەڭى ءجۇرىپ جاتىر. الەمدىك دودالار اياقتالعان سوڭ بەيجىڭگە ۇشپاس بۇرىن سپورتشىلار كارانتيندە ۋاقىت وتكىزەدى. بارلىق سپورتشى كەشەندى-عى­لىمي توپ ماماندارىنىڭ ۇزدىكسىز باقىلاۋىندا. مادەنيەت جانە سپورت مينيسترلىگى مەن ۇوك سپورت­تىق جارىستار كۇنتىزبەسى بويىنشا دودالارعا قاتىسۋ، دايىندىق جۇمىستارى، شەتەلدىك وقۋ-جاتتىعۋ جيىندارى مەن جارىستار، ونىڭ ىشىندە ەلىمىزدەگى حالىقارالىق دودالارعا قاتىسۋ ءۇشىن كوماندالارعا بارلىق جاع­دايدى جاسادى. ەندى سپورتشىلار ەڭ جاۋاپتى كەزەڭگە اياق باسىپ وتىر. قازاقستان حالقى ءبىز­دىڭ كوماندانى قولدايتىنىنا سەنىمدىمىز، – دەدى باس حاتشى.

ۇلتتىق وليمپيادا كومي­تەتىنىڭ دەرەگى بويىنشا ازىرگە ەڭ كوپ جولداما شاڭعى جارىسى بويىنشا سىنعا تۇسەتىن سپورت­­شىلاردىڭ ەنشىسىندە. ولار 30 جولداماعا يەلىك ەتۋدە. ودان كەيىنگى ۇزدىك ناتيجە فريستايلشىلارعا تيەسىلى. ولار توعىز جولداما جەڭىپ العان. سو­نىڭ ىشىندە موگۋل بويىنشا – 5، اكروباتيكا بويىنشا 4 ليتسەنزيا بار. كونكيشىلەر مەن بياتلونشىلار – 12، شورت-ترەكشىلەر توعىز جولدامانى قورجىنعا سالدى. ەل قۇرامالارى تاۋ شاڭعىسى مەن شاڭعىمەن تۇعىردان سەكىرۋ سپورتىنان ءتورت جولدامادان ەنشىلەسە، شاڭعى قوسسايىسىنان ەكى ليتسەنزياعا يەلىك ەتتى.

بۇگىنگى تاڭدا وليمپيادالىق قۇراما ساپىنا 32 سپورتشى ەنگەن. ايتا كەتەرلىگى، بۇل سپورت­شىلاردىڭ سوڭعى ءارى ناقتى سا­نى ەمەس. سەبەبى ۇوك كەيبىر سپورت تۇرلەرىنەن حالىقارالىق فەدە­راتسيالاردىڭ ليتسەنزيالاردى قايتا ءبولۋ، ۇلەستىرۋ ناتيجەلەرىن كۇتۋدە. اتاپ ايتقاندا، بياتلون، شاڭعى جارىسى، موگۋل جانە اكروباتيكادان تاعى دا جولدامالار ۇلەستىرىلۋى مۇمكىن. وليم­پيا ويىندارىنا قاتىساتىن سپورتشىلاردىڭ سوڭعى ءتىزىمى 20 قاڭتاردان كەيىن بەلگىلى بولادى. قازاقستان قۇراماسى 27 قاڭتار كۇنى چارتەرلىك رەيسپەن نۇر-سۇلتاننان الماتى ارقىلى بەيجىڭگە اتتانادى.

قازىرگى تاڭدا قازاقستاندىق سپورتشىلار قىتايعا جۇرەر الدىنداعى ارنايى كارانتيننەن وتۋدە. ارنايى كارانتيندىك ايماق ەكى قالادا – نۇر-Cۇلتان مەن الماتىدا ۇيىمداستىرىلعان. كوماندالار ەلورداداعى «الاۋ» مۇز سارايىندا كونكيمەن جۇ­گىرۋ سپورتى مەن شورت-ترەكتەن جاتتىعىپ جاتىر.

ء«بىز ءۇشىن باستى مىندەت، اسىرەسە، ۆيرۋستىڭ جاڭا تولقىنى كەزىندە سپورتشىلار مەن كوماندا مۇشەلەرىنىڭ قاۋىپسىزدىگى مەن دەنساۋلىعىن ساقتاۋ. بۇل – ەرەكشە جاۋاپكەرشىلىكتى جانە جوعارى دەڭگەيدە ۇيلەستىرۋدى قاجەت ەتەتىن كۇردەلى مىندەت. كوماندا مۇشەلەرىنىڭ سىرتقى الەممەن بايلانىسىن بولدىرماۋ ءۇشىن ەكى قالادا سپورتشىلار كارانتينگە الىندى. ولار جاتتىعۋ الاڭدارى مەن سول جەردە ورنالاسقان قو­ناقۇي اراسىندا ءبىر باعىتتى ۇس­تانادى. ءبىز بارلىق سپورتشىمىزدى بەيجىڭدەگى وليمپيادا اۋىلىنا امان-ەسەن جەتكىزىپ، سول كۇيى ۇيلەرىنە قايتارۋىمىز كەرەك»، دەدى ەلسيار قاناعاتوۆ.

شورت-ترەكتەن قازاقستان كومانداسى ۇزدىكتەرىنىڭ ءبىرى دەنيس نيكيشا كارانتين جات­تىعۋ پروتسەسىنە ەشقانداي اسەر ەتپەيتىنىن، كەرىسىنشە، دايىن­دىقتى كۇشەيتۋگە زور مۇمكىندىك ەكەنىن ايتىپ ءوتتى.

ء«بىز «الاۋ» مۇز سارايىندا تۇرىپ، سول جەردە جاتتىعىپ جاتىر­مىز. مۇندا كوماندا مۇشە­لەرىنەن باسقا ەشكىممەن كورىس­پەيمىز. كارانتين جاتتىعۋ پروتسەسىنە ەشقانداي كەرى اسەر ەتپەيدى، كەرىسىنشە، تياناقتى دايىندالۋعا كومەكتەسەدى. بىزگە ەشكىم كەدەرگى جاسامايدى. بۇكىل جولىمىز قوناقۇي – مۇزايدىن – قوناقۇي مارشرۋتىنان تۇرادى. ارتىق قيمىل جاساۋعا، كوشەگە شىعۋعا بولمايدى. بەيجىڭگە اتتانعانعا دەيىن وسىندا بولامىز. بارلىق جاعدايدىڭ جاسالعانى قۋانتادى»، دەدى سپورتشى.

الماتىداعى كارانتين ايما­عىندا تاۋ شاڭعىسى، فريستايل-موگۋل، شاڭعىمەن تۇعىردان سەكىرۋ جانە شاڭعى قوسسايىسى كوماندالارىنىڭ مۇشەلەرى جاتىر. ولار حالىقارالىق تۋرنير­لەردەگى ءوز ونەرلەرىن اياقتاپ، كارانتينگە الىندى.

كوماندالارعا تاۋ جاتتى­عۋلارى مەن ترامپليندە دايىن­دىق قاجەت، سوندىقتان ولاردى جاتتىعۋ ايماقتارىنا تاسىمالداۋ ءۇشىن ارالىق ايالدامالارسىز «تازا» كولىك ۇيىمداستىرىلعان. كارانتين ايماعىندا جۇمىس ىستەيتىن بارلىق كولىك جۇرگىزۋ­شىلەرى مەن قىزمەتكەرلەرى دە «تازا» ايماقتا تۇرادى جانە پتر سىناقتارىن كۇن سايىن تاپسىرىپ وتىرادى. سىرتقى ورتامەن بارلىق بايلانىستار شەكتەلگەن، بىراق جاتتىعۋلار جوسپارلانعان رەجىمدە ءوتىپ جاتىر.

2022 جىلعى قىسقى وليمپيا ويىندارى بەيجىڭدە 4-20 اقپان ارالىعىندا وتەدى. الدىن الا مالىمەت بويىنشا الەمنىڭ 95 ەلىنەن 4000-نان استام سپورتشى قاتىسادى دەپ جوسپارلانۋدا. جارىس باعدارلاماسىنا سايكەس 109 مەدال جيىنتىعى ساراپقا سالىنادى.