ەلوردا • 20 قاڭتار، 2022

ەپيدەميولوگيالىق جاعدايدى تۇراقتاندىرۋعا رەۆاكتسيناتسيا مۇمكىندىك بەرەدى – التاي كولگىنوۆ

61 رەت كورسەتىلدى

نۇر-سۇلتان قالاسىنىڭ اكىمى التاي كولگىنوۆ Instagram پاراقشاسىندا مەكتەپ وقۋشىلارى وفلاين فورماتتا وقۋعا قاشان ورالاتىنىن جانە بالالار مەن پەداگوگتاردىڭ دەنساۋلىعىنىڭ قاۋىپسىزدىگى قالاي قامتاماسىز ەتىلەتىنىن ءمالىم ەتتى، دەپ حابارلايدى Egemen.kz ەلوردا اكىمدىگىنىڭ رەسمي سايتىنا سىلتەمە جاساپ.

«قۇرمەتتى قالا تۇرعىندارى!

وزدەرىڭىز بىلەتىندەي، سوڭعى اپتالاردا ەپيدەميولوگيالىق جاعداي كۇرت ناشارلادى، تيىسىنشە كارانتيندىك شارالار دا كۇشەيتىلدى. بالالارىمىزدىڭ مەكتەپ پارتاسىندا قايتا وقۋى، سپورتتىق مەكەمەلەر، تەاترلار جانە قالانىڭ وزگە دە ماڭىزدى نىساندارى ەش كەدەرگىسىز جۇمىس ىستەۋى ءۇشىن ەڭبەك ۇجىمدارى تولىعىمەن رەۆاكتسيناتسيادان ءوتۋى قاجەت. ۆاكتسيناتسيا/رەۆاكتسيناتسيا عانا كوروناۆيرۋس ينفەكتسياسىن جەڭۋدىڭ ءتيىمدى ءادىسى. ەپيدجاعدايدى تۇراقتاندىرۋ – نىسانداردىڭ تولىعىمەن جۇمىس ىستەۋ مۇمكىندىگى.

قازىر بالالارىمىز قايتادان قاشىقتان وقۋ فورماتىنا كوشتى. دەگەنمەن 24 قاڭتاردان باستاپ وقۋشىلاردى وفلاين رەجيمگە كوشىرۋدى جوسپارلاپ وتىرمىز. ول ءۇشىن ۆاكتسيناتسيا مەن رەۆاكتسيناتسيا ارقىلى بالالارىمىزدى، مۇعالىمدەرىمىزدى قاۋىپتەن قورعاۋىمىز قاجەت.

پاندەمياعا قاراماستان وقۋ ورىندارىنىڭ قۇرىلىس كولەمىن ازايتقان جوقپىز. سەبەبى جاڭا وقۋ ورىندارىن اشۋدىڭ ماڭىزدىلىعىن بايقاپ وتىرمىز. بيىل – 3 توقساندا تاعى 7 مەكتەپ اشتىق. وسى 7 مەكتەپتىڭ ءوزى تاعى 20 مىڭ وقۋشى ورنىن قۇرۋعا مۇمكىندىك بەردى.

№93 جاڭا مەكتەپ-ليتسەيىنە ارنايى باردىم. ول الماتى اۋدانىندا (ج.ناجىمەدەنوۆ كوشەسى)، قۇرىلىسى قارقىندى ءجۇرىپ جاتقان اۋداندا ورنالاسقان. بۇل وقۋ ورنى وزگە ءۇش مەكتەپتىڭ پروبلەماسىن شەشۋگە مۇمكىندىك بەرىپ وتىر.

مەملەكەت باسشىسىنىڭ تاپسىرماسى بويىنشا مەكتەپ قۇرىلىسىنىڭ كولەمى ايتارلىقتاي ارتتى. مىسالى، 2019 جىلى 6 مەكتەپ سالىنعان بولسا، 2020 جىلى 11 مەكتەپ ەسىگىن ايقارا اشتى.

بيىلعى وقۋ جىلىندا 40 مىڭ وقۋشى ورنىنا ارنالعان 15 مەكتەپ سالدىق. بۇل وسىلايشا 5 مەكتەپتەگى شامادان تىس جۇكتەمە ماسەلەسىن، سول سياقتى وقۋشى سانى تىم كوپ 10 مەكتەپتىڭ پروبلەماسىن شەشۋگە مۇمكىندىك بەردى.

2022 جىلى (جاڭا وقۋ جىلى) كەمىندە 16 مەكتەپ سالىنادى. كەشەندى جوسپار اياسىندا 5 جىلدىق كەزەڭگە 70-كە جۋىق مەكتەپ سالۋ جوسپارلانىپ وتىر. مەكتەپ قۇرىلىسىنا دا جەكە ينۆەستيتسيا تارتامىز»، دەپ جازدى ەلوردا اكىمى.

سوڭعى جاڭالىقتار

ۇقساس جاڭالىقتار