مەديتسينا • 17 قاڭتار، 2022

دونور بولۋ – ءومىر سىيلاۋ

كەيىنگى كۇندەرى ەلوردادا قان تاپسىرىپ، دونور بولۋعا نيەت بىلدىرگەن ازاماتتاردىڭ قاتارى كۇرت كوبەيدى. قاڭتاردىڭ 5-10 كۇندەرى ارالىعىندا ترانسفۋزيولوگيا عىلىمي-وندىرىستىك ورتالىعىنا 1 500 ادام قان تاپسىرۋعا كەلىپتى.

ورىنبەك وتەمۇرات

استانا ەپيدەميالىق احۋال بويىنشا «قىزىل ايماقتا» تۇرعانىنا قاراماستان، ورتالىققا كەلۋشى اعايىننىڭ قاتارى سيرەگەن جوق. ارينە، مەكەمەدە سانيتارلىق تالاپتىڭ، ماسكا تاعۋ رەجىمىنىڭ ساقتالۋى قاتاڭ قاداعالانىپ وتىر. ترانسفۋزيولوگيا عىلىمي-وندىرىستىك ورتالىعىنىڭ قاندى الۋ جانە ونى دايىنداۋ ءبولىمىنىڭ دارىگەرى زاۋرەش المەنوۆانىڭ ايتۋىنشا، قازىر دونورلىق قان تاپشىلىعى جوق، اۋرۋحانالاردى قامتاماسىز ەتۋ ءۇشىن دونورلىق قان تولىق كولەمدە بار.

– ءبىزدىڭ ورتالىققا كەلىپ تۇراقتى تۇردە قان تاپسىرىپ تۇراتىن دونورلار بارشىلىق. ادەتتە كۇنىنە 120-130 شاقتى ادام قان تاپسىرادى. بىراق جاقىندا ەلىمىزدە بولعان توتەنشە وقيعا كەزىندە قان تاپسىرۋعا نيەت بىلدىرگەن ادامداردىڭ قاتارى ەداۋىر ارتتى. دالىرەك ايتساق، كۇن سايىن 300-گە جۋىق ادام دونور بولۋعا كەلدى. جالپى، 5 قاڭتاردان باستاپ 10 قاڭتارعا دەيىن 1 500 دونور قان تاپسىرۋعا كەلدى. ونىڭ ىشىندە تەك 1 213 دونور ءوتتى. ەندى دونور بولامىن دەپ كەلگەندەردىڭ ءبارىنىڭ دەنساۋلىعى كوتەرە بەرمەيتىنىن دە ەسكەرەمىز عوي. قازىر 730 ليتر قان دايىنداپ قويدىق. قانداي دا وقىس وقيعا بولسا، باسقا ايماقتارعا كومەك كەرەك بولىپ جاتسا، بىزدە قان جانە ونىڭ كومپونەنتتەرى ارتىعىمەن قوردا تۇر. مۇنىڭ ءبارى – ەلدە بولىپ جاتقان جاعدايلارعا بەيجاي قاراماي، قولدان كەلەر كومەگىن كورسەتكىسى كەلگەن اعايىننىڭ ارقاسى. بۇل ازاماتتاردىڭ بارلىعىنا شەكسىز ريزاشىلىعىمىزدى بىلدىرەمىز، – دەيدى دارىگەر.

ونىڭ ايتۋىنشا، دونور بولۋعا كوبىنەسە ەر ادامدار، ونىڭ ىشىندە جاستار كوپ كەلەدى ەكەن. مىسالى، 2021 جىلدىڭ قورىتىندىسى بويىنشا جالپى دونور بولعان ازاماتتاردىڭ 70%-ىن ەر ادامدار قۇرادى.

– بۇگىندە قان تاپسىرۋعا لەك-لەگىمەن كەلىپ جاتقان ازاماتتار بۇدان كەيىنگى ۋاقىتتا دا تۇراقتى كەلىپ تۇرسا، ابزال بولار ەدى. ويتكەنى قازىر الىنىپ جاتقان قاننىڭ ساقتاۋ مەرزىمى شەكتەۋلى. مىسالى، قىزىل قان تۇيىرشەكتەرىن 42 كۇنگە دەيىن، ال ترومبوتسيتتەردى 5-7 كۇن عانا ساقتاي الامىز. سوندىقتان دونورلاردىڭ ۇنەمى قان تاپسىرىپ تۇرعانى – ۇلكەن كومەك. بىلايعى كۇندە دە جول اپاتى، باسقا دا وقىس وقيعالار، بوسانعان ايەلدەردەن قان كەتۋ سياقتى جاعدايلار ورىن الىپ جاتادى. مۇنداي شۇعىل كومەك كورسەتۋگە تۋرا كەلەتىن كەزدەردە قاجەتتى مولشەردە قان كەرەك بولىپ قالادى، – دەدى ز.المەنوۆا.

نەگىزىنەن دونور بولعان ازاماتتارعا 0،25 اەك مولشەرىندە، ياعني 729 تەڭگە تولەنەدى. سونداي-اق دارىگەردىڭ انىقتاماسىمەن ەكى كۇن جۇمىسقا بارماۋىنا بولادى. بىراق كومەكتەسەمىن دەگەن نيەتپەن كەلگەن جۇرتتىڭ ءبارى بۇعان قاراماستان، قان تاپسىرىپ جاتىر ەكەن.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز