دەپارتامەنت ءباسپاسوز قىزمەتىنىڭ مالىمەتىنشە, 15 قاڭتاردا ءوڭىر جۇرتشىلىعىنا بۇرقاسىن, كوكتايعاق جانە قاتتى جەل ەسكەرتۋ جاريالانعان. تۇرعىندارعا ەلدى مەكەندەردەن الىس جولعا شىقپاۋ قاجەتتىلىگى ءتۇسىندىرىلدى. الايدا بۇل كەڭەستى تىڭداماعاندار دا بولدى.
«ماسەلەن, رەسپۋبليكالىق ماڭىزى بار «شەمونايحا-رف شەكاراسى» تاسجولىنىڭ شەمونايحا اۋدانى ماڭىندا 2 شاعىن اۆتوبۋس, 6 جەڭىل جانە 3 جۇك كولىگى قار قۇرساۋىندا قالعان. قۇتقارۋشىلار, جول قىزمەتتەرى جانە جەرگىلىكتى اتقارۋشى ورگان وكىلدەرى وقيعا ورنىنا جىلدام جەتتى. 10 ادام, ونىڭ ىشىندە ءبىر بالا شەمونايحا قالاسىنىڭ جىلىتۋ پۋنكتىنە جەتكىزىلدى. ولارعا بارلىق قاجەتتى كومەك كورسەتىلدى», دەلىنگەن حابارلامادا.
قازىرگى ۋاقىتتا بارلىق كولىك قار قۇرساۋىنان شىعارىلعان. سونداي-اق تاسجولدىڭ اتالعان ۋچاسكەسى قاردان تازارتىلدى.
