ايماقتار • 14 قاڭتار، 2022

سەمەيدە الەۋمەتتىك ونىمدەردىڭ باعاسى تۇراقتى

سەمەي قالاسىنىڭ اكىمى باقىتجان باياحمەتوۆ الەۋمەتتىك نان، گاز جانە جانار-جاعارمايدىڭ باعاسىن تۇراقتاندىرۋ جونىندە كەڭەس وتكىزدى، دەپ حابارلايدى Egemen.kz.

جانبولات كەنجەعۇل

نان مەن ججم جەتكىزۋ بويىنشا جاعداي تۇراقتى. قالادا 30-دان استام نان ءوندىرۋشى تۇراقتى جۇمىس ىستەيدى. ولاردىڭ ىشىندە ەڭ ىرىلەرى: «سەمنان»، «تۇمار» جشس جانە تاعى باسقالارى.

«سەمنان» كۇن سايىن دۇكەندەرگە 110 تەڭگەدەن ءۇش جارىم مىڭ بولكە الەۋمەتتىك نان جەتكىزەدى. قالا اكىمدىگىنىڭ ساۋدا نۇكتەلەرىمەن جاساعان مەموراندۋمىنا سايكەس، دۇكەندەر نان ءۇشىن 5 تەڭگەدەن اسپايتىن ۇستەمەاقى قوسادى. ناتيجەسىندە، اتالعان وندىرۋشىدەن الىنعان ناننىڭ قۇنى-115 تەڭگە.

ءوزىنىڭ جەكە ناۋبايحانالارى بار «اپرەل»، «ادال» سياقتى ءىرى سۋپەرماركەتتەردە نان باعاسى ودان دا ارزان. وندا نان 95-100 تەڭگە ارالىعىندا ساتىلادى.

«ۇن تارتۋ كومبيناتتارى مەن تسەحتارى تۇراقتى جۇمىس ىستەيدى. بۇل قالامىزعا سىرتتان نان اكەلمەۋگە مۇمكىندىك بەرەدى. اكىمدىكتىڭ ارنايى جۇمىس توبى ۇن مەن نان باعاسىنىڭ قۇرامداس بولىگىن ەسەپتەدى. 38% - بۇل ججم شىعىندارى، 18% - ەلەكتر ەنەرگياسى. وعان قوسا، سالىقتار مەن جۇمىسشىلاردىڭ جالاقىسى بار. مەملەكەتتىك قولداۋ شارالارى قازىرگى باعالاردى ۇستاپ قانا قويماي، ءبىرشاما تومەندەۋىنە مۇمكىندىك بەرەدى»، دەپ حابارلادى سەمەي قالاسىنىڭ اكىمى باقىتجان باياحمەتوۆ.

جانار-جاعارمايعا كەلەتىن بولساق، وندا مەملەكەتتىك رەتتەۋ اياسىندا باعالار تۇراقتاندى. جانار-جاعارماي قۇيۋ بەكەتتەرى جەلىسىندە گەليوس، اۆانتاج، تاعى باسقالارى ا-92 ماركالى بەنزين ليترىنە 177-180 تەڭگە ارالىعىندا ساتادى. اۆتوكولىك گازى - 60 تەڭگەدەن. ديزەل وتىنىنىڭ باعاسىنىڭ ايتارلىقتاي تومەندەۋى بايقالادى. ەگەر ءبىراز ۋاقىت بۇرىن ونىڭ باعاسى 300 تەڭگەدەن اسىپ كەتسە، قازىر - 260 تەڭگە.

«قازاقستان پرەزيدەنتى قاسىم-جومارت كەمەل ۇلى توقاەۆ ءوز سوزىندە، وسى قيىن-قىستاۋ كەزەڭدە ءبىزدىڭ ازاماتتاردى مەملەكەتتىك قولداۋ شارالارى ارقىلى قورعاۋدى تاپسىردى. بۇل شەشىم ۋاقىتىلى ءارى دۇرىس. ەندى جەرگىلىكتى اتقارۋشى بيلىكتىڭ مىندەتى - مەملەكەت باسشىسى مەن ۇكىمەتتىڭ بارلىق تاپسىرمالارىن ءدال ءارى ءتيىمدى ورىنداۋ»، دەپ اتاپ ءوتتى باقىتجان باياحمەتوۆ.

قالا اكىمى ءوز سوزىندە، قابىلدانعان شارالاردىڭ ناتيجەسىندە تۇرمىستىق گاز باعاسى دا تومەندەگەنىن حابارلادى. 25 ليترلىك تۇرمىستىق گاز قازىر 1700-2500 تەڭگە ارالىعىندا ساتىلۋدا. ال، 50 ليترلىك گاز سىيىمدىلىعىنىڭ باعاسى 5 مىڭنان 3400 تەڭگەگە دەيىن تومەندەدى.

باقىتجان باياحمەتوۆ بارلىق جەرگىلىكتى وندىرۋشىلەرگە سەمەيلىكتەرگە قولداۋ كورسەتكەنى ءۇشىن ەرەكشە العىس ايتىپ، اكىمدىكتىڭ ءتيىستى بولىمدەرىنە شاعىن جانە ورتا بيزنەستىڭ ءتيىمدى جۇمىس ىستەۋى ءۇشىن بارلىق جاعدايدى جاساۋدى تاپسىردى.

سونداي-اق، قالا اكىمىنىڭ تاپسىرماسى بويىنشا، جاقىن ارادا تۇراقتاندىرۋ قورىنىڭ ازىق-ت ۇلىگى بازار باعاسىنان تومەن باعامەن ساتىلاتىن دۇكەندەر مەن ساۋدا نۇكتەلەرىنىڭ جەلىسى كەڭەيتىلەدى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز