ەلىمىزدە بولعان وقيعالارعا بايلانىستى شەتەلدىك باسىلىمداردا جاريالانعان ماتەريالداردىڭ بارلىعىن قامتۋ مۇمكىن ەمەس, ارينە. دەسە دە اعىلشىن ءتىلدى مەديادا جارىق كورگەن ماقالالار مەن پىكىرلەر, حابارلار مەن اقپاراتتى شولىپ شىقتىق.
پرەزيدەنت ق.توقاەۆ ءوز سوزىندە ايتقانداي, حالىقارالىق قوعامداستىقتا, شەتەلدىك بۇقارالىق اقپارات قۇرالدارىن قوسا العاندا, ۇقشۇ كۇشتەرىنىڭ پايدالانىلۋىنا, جالپى قازاقستانداعى جاعدايعا قاتىستى مۇلدە قاتە تۇسىنىك قالىپتاسقانىن بايقاۋ قيىن ەمەس.
«ۇسىنىپ وتىرعان ايعاقتارعا قاراماستان, كەيبىر دەرەككوزدەر قازاقستان بيلىگىن بەيبىت دەمونسترانتتارمەن كۇرەستى دەپ ايتىپ جاتىر. بۇل – مۇلدە قاتە اقپارات. ءبىز بەيبىت شەرۋگە شىققاندارعا قارسى ەشقاشان قارۋ قولدانعان جوقپىز جانە قولدانبايمىز دا», دەدى قازاقستان پرەزيدەنتى ق.توقاەۆ.
باتىس مەديا باسىلىمدارىنىڭ ەلىمىزدەگى جاعدايدى ءجىتى باقىلاپ, كەڭىنەن تالقىلاۋىنا پرەزيدەنتتىڭ ۇقشۇ مەملەكەتتەرىنىڭ باسشىلارىنان ەلگە تونگەن قاۋىپتى ەڭسەرۋ ءۇشىن كومەك كورسەتۋىن سۇراۋى تۇرتكى بولعانى ءسوزسىز. رەسەي مەن باتىس ەلدەرىنىڭ شيەلەنىستى قارىم-قاتىناسى بەلگىلى. جاريالانعان ماتەريالداردىڭ كوپشىلىگى ءدال وسى رەسەي تاقىرىبىنا باسىمدىق بەرگەندەي.
The New York Times, Financial Times, Bloomberg, The Washington Post سەكىلدى باسىلىمدار اقپارات تاراتقاندا باسىمدىقتى ورتالىق ازيا اۋماعىنداعى رەسەي ىقپالىنا كوبىرەك بەردى. تەك سوڭعى كۇندەرى عانا پرەزيدەنت ق.توقاەۆتىڭ سوزىنە سىلتەمە بەرىپ, ۇقشۇ بىتىمگەرلىك كۇشتەرى جاقىن كۇندەرى ميسسياسىن اياقتاپ, قازاقستان تەرريتورياسىنان شىعاتىنى تۋرالى جازا باستادى. NYT, FT, Reuters, The Guardian تاراتقان سوڭعى اقپاراتتاردان وسىنى كورۋگە بولادى.
وزگە حابارلار قازاقستانداعى سۇيىتىلعان گاز باعاسىنا نارازى بولعان حالىقتىڭ بەيبىت شەرۋى جاپپاي تارتىپسىزدىك پەن شابۋىلعا ۇلاسقانىنا, بىرنەشە قالادا توتەنشە جاعداي جاريالانعانىنا, ۇكىمەتتىڭ وتستاۆكاعا كەتكەنىن, ەلدە ينتەرنەتتىڭ بۇعاتتالعانىن, قالاداعى مەملەكەتتىك نىسانداردىڭ, باسقا دا عيماراتتاردىڭ قيراعانىنا توقتالدى.
وسى سەكىلدى حابارلار ەلدە بولىپ جاتقان قارۋلى قاقتىعىستار جايلى باتىس وركەنيەتىندە تولىق تۇسىنىك جوق ەكەنىن كورسەتەدى. وعان ينتەرنەتتىڭ امالسىز بۇعاتتالۋى دا اسەر ەتكەنى ءسوزسىز. قازاقستانداعى احۋال تۋرالى اقپاراتتىڭ دەر كەزىندە تاراتىلماۋى, بايلانىستىڭ بولماۋى سەكىلدى ماسەلەلەر دە جاعدايعا ءوز ىقپالىن تيگىزدى. كەز كەلگەن مەديا باسىلىمنىڭ, رەداكتسيانىڭ وزىندىك كوزقاراسى, ۇستانىمى مەن پايىمى بولاتىنىن ەسكەرسەك, ەلدەگى جاعداي تۋرالى حابارلاردىڭ دا تاراتىلۋى, باسىم تاقىرىپتارى مەن ۇنىنە قاراي بەلگىلى ءبىر باعىتتا سيپات العانىن بايقايمىز. ەلدە ينتەرنەت قوسىلىپ, اقپاراتقا قول جەتىمدىلىكتىڭ ارتۋى ەندى بۇل ۇردىسكە وڭ اسەرىن تيگىزەدى دەپ پايىمدايمىز.
