«بۇگىن مەملەكەت باسشىسى ءوزىنىڭ باعدارلامالىق سوزىندە ەلىمىزدىڭ الدىندا تۇرعان الەۋمەتتىك-ەكونوميكالىق جانە قوعامدىق-ساياسي سالالارداعى نەگىزگى باسىمدىقتاردى بەلگىلەپ بەردى. سونداي-اق ۇكىمەتتىڭ جاڭا قۇرامىنا جانە بارلىق مەملەكەتتىك اپپاراتقا ناقتى مىندەتتەر جۇكتەدى.
جالپى قاڭتاردا بولعان قايعىلى وقيعالار ەلىمىزدە جۇيەلى جانە شىنايى وزگەرىستەر قاجەت ەكەنىن كورسەتىپ بەردى. سوندىقتان مەملەكەت باسشىسى ۇزاق ۋاقىت بويى قوعامدا تالقىلانىپ كەلگەن اسا ماڭىزدى ماسەلەلەرگە جەكە-جەكە توقتالدى.
پرەزيدەنتىمىز قاسىم-جومارت كەمەل ۇلى توقاەۆ اتاپ وتكەندەي, مەملەكەتتىك باسقارۋ جۇيەسى قايتا قۇرىلۋعا ءتيىس. كۇشتىك قۇرىلىمداردى رەفورمالاۋ جانە ارميامىزدىڭ اسكەري الەۋەتىن ارتتىرۋ ماسەلەسى دە وتە وزەكتى. سونداي-اق مەملەكەتتىڭ ەكونوميكاداعى ۇلەسىن جانە الەۋمەتتىك تەڭسىزدىكتى ازايتۋدىڭ ماڭىزى زور. بۇل رەتتە «سامۇرىق-قازىنا» قورى مەن تۇتاس كۆازيمەملەكەتتىك سەكتوردىڭ جۇمىسىن قايتا قاراۋ كۇن تارتىبىنە شىعىپ وتىر. شاعىن جانە ورتا بيزنەستى جاپپاي دامىتۋ جانە وڭىرلەردىڭ دامۋىنداعى تەڭگەرىمسىزدىكتى جويۋعا ءتيىستى جاعداي جاسالادى.
مەملەكەت باسشىسى ەلىمىزدىڭ ساياسي جۇيەسىن ودان ءارى دەموكراتيالاندىرۋ قاجەتتىگىنە باسا ءمان بەردى. بۇل باعىتتاعى ناقتى باستامالار ساراپشىلارمەن جانە قوعاممەن جان-جاقتى پىسىقتالىپ, وسى جىلدىڭ قىركۇيەگىندە كوپشىلىككە تانىستىرىلادى.
جالپى العاندا بۇگىن ۇسىنىلعان شارالار جۇيەلى سيپاتقا يە. ولار مەملەكەتتىك باسقارۋ جۇيەسىن, ەكونوميكانىڭ قۇرىلىمىن, الەۋمەتتىك سالانى تۇبەگەيلى وزگەرتۋگە, ازاماتتارىمىزدىڭ ءومىر ءسۇرۋ ساپاسىن جاقسارتۋعا ارنالعان.
وسىلايشا, ەلىمىز دامۋدىڭ جاڭا كەزەڭىنە اياق باسىپ وتىر. بۇل – تۇتاس مەملەكەتتىك باسقارۋ جۇيەسىن مەريتوكراتيا, ادىلەتتىلىك جانە اشىقتىق قاعيدالارىنىڭ نەگىزىندە قايتا قۇرۋ كەزەڭى.
وسى جولدا پارلامەنت سەناتى مەملەكەت باسشىسىنىڭ بارلىق باستاماسىن قولداي وتىرىپ, زاڭنامالىق تۇرعىدان ولاردى ساپالى ءارى ۋاقتىلى قامتاماسىز ەتۋ ءۇشىن قاجەتتى جۇمىستاردى جۇرگىزە بەرەدى. جاڭا قازاقستاندى بىرگە قۇرايىق», دەلىنگەن قر پارلامەنتى سەناتى توراعاسىنىڭ جازباسىندا.
