وتىرىسقا مەملەكەتتىك جانە جەرگىلىكتى اتقارۋشى ورگانداردىڭ وكىلدەرى قاتىستى.
قر دەنساۋلىق ساقتاۋ ءمينيسترىنىڭ مىندەتىن اتقارۋشى جاندوس بۇركىتباەۆ قازاقستانداعى ەپيدەميولوگيالىق احۋال تۋرالى باياندادى.
كوروناۆيرۋس ينفەكتسياسىنا قاتىستى جاعداي ناشارلاپ بارادى, جىل باسىنان بەرى كۆي+ 5093 جاعدايى جانە كۆي- 115 فاكتىسى تىركەلدى. سوڭعى تاۋلىكتە كۆي+ جۇقتىرۋدىڭ 1510 جاعدايى انىقتالدى, — دەدى ءمينيستردىڭ م. ا.
سونىمەن قاتار ەپيدەميولوگيالىق جاعدايدى باعالاۋ ماتريتساسىنا سايكەس, نۇر-سۇلتان قالاسى «قىزىل» ايماققا ءوتتى.
شىمكەنت جانە الماتى قالالارى «سارى» ايماقتا تۇر. قالعان 14 ءوڭىر «جاسىل» ايماقتا ورنالاسقان. جالپى قازاقستان رەسپۋبليكاسى – «سارى» ايماقتا.
سونداي-اق ۆيرۋستىڭ رەپرودۋكتيۆتى سانى وسۋدە. بۇگىندە ەلىمىز بويىنشا ول 1,5-ءتى قۇرايدى, ال 5 وڭىردە 2-دەن جوعارى, تاپ ايتساق, نۇر-سۇلتان قالاسى, اقتوبە, قىزىلوردا, ماڭعىستاۋ جانە تۇركىستان وبلىستارى.
ەپيدەميولوگيالىق جاعدايدىڭ ناشارلاۋى جاقىندا انىقتالعان كوروناۆيرۋستىڭ «وميكرون» شتامىنىڭ تارالۋىنا, مەرەكە كۇندەرى حالىقتىڭ ىشكى ميگراتسياسىنىڭ جوعارى بولۋىنا, پروفيلاكتيكا شارالارىن جەتكىلىكتى ساقتاماۋىنا تىكەلەي بايلانىستى. بيىلعى 6 قاڭتار كۇنى ەلىمىزدىڭ وڭىرلەرىنەن 2021 جىلعى جەلتوقساننىڭ ءۇشىنشى ونكۇندىگىندە الىنعان, ۆيرۋستىڭ وڭ بەلگىلەرى بار 96 ۇلگىنى تولىق گەنومدىق سەكۆەنيرلەۋ جۇمىستارى اياقتالدى. سونىڭ ناتيجەسىندە بۇگىنگى تاڭدا 8 ۇلگىدەن (8,3%) ۆيرۋستىڭ «وميكرون» نۇسقاسى انىقتالدى, ونىڭ 7-ەۋى الماتى قالاسىندا جانە 1-ەۋى نۇر-سۇلتان قالاسىندا تىركەلدى.
سونداي-اق ەلىمىزدە ءالى دە «دەلتا» شتامى باسىم – 71%, ال 16%-ى «دەلتا پليۋس», 4,7% كوروناۆيرۋس شتامىنىڭ باسقا دا نۇسقالارى انىقتالعان.
باياندامانى تىڭداعان ەرالى توعجانوۆ باستى مىندەت ەپيدەميولوگيالىق جاعدايدىڭ ناشارلاۋىنا جول بەرمەۋ ەكەنىن اتاپ ءوتتى.
سونىمەن قاتار دەنساۋلىق ساقتاۋ مينيسترلىگىنە 2 كۇن ىشىندە توسەك-ورىن, ءدارى-دارمەك, تۇراقتاندىرۋ قورلارىنىڭ دايىندىعىنا جانە ەپيدەميولوگيالىق جاعداي ناشارلاپ كەتكەن جاعدايدا ءار ءوڭىردىڭ دەنساۋلىق ساقتاۋ جۇيەسىنىڭ دايىن بولۋىنا تالداۋ جۇرگىزۋ تاپسىرىلدى.
وتىرىس قورىتىندىسى بويىنشا ۆيتسە-پرەمەردىڭ م. ا. جەرگىلىكتى اتقارۋشى ورگاندارعا تۇراقتى نەگىزدە مىنا جۇمىستاردى ورىنداۋدى تاپسىردى:
- فيلتر-كابينەتتەردىڭ جۇمىسىن كۇشەيتۋ, قاجەت بولعان جاعدايدا قوسىمشا كابينەتتەردى اشۋ;
- جمكك ۇيىمدارىنا ناۋقاستار كوپ تۇسكەن جاعدايدا پاتسيەنتتەر اعىنىن رەتتەۋدى ەرەكشە باقىلاۋعا الۋ;
- قوڭىراۋ شالۋ ورتالىقتارىنىڭ جۇمىسىن جانداندىرۋ;
- سيتۋاتسيالىق ورتالىقتاردىڭ جۇمىس ىستەۋىن قامتاماسىز ەتۋ;
- موبيلدىك بريگادالاردىڭ قاجەتتى مەديتسينالىق جابدىقپەن جاراقتاندىرىلۋىن قامتاماسىز ەتۋ;
- ءموبيلدى بريگادالار رەزەرۆىن دايىنداۋ; - ۇيدە ەمدەلىپ جاتقان ناۋقاستاردى باقىلاۋ جۇمىسىن كۇشەيتۋ;
- قاشىقتان كورسەتىلەتىن مەديتسينالىق قىزمەتتەردى بەلسەندى تۇردە قولدانۋ;
- پاتسيەنتتەرگە دياگنوز قويۋ مەن ەمدەۋدىڭ كلينيكالىق حاتتامالارىنا سايكەس قاراۋ.
بۇعان قوسا دەنساۋلىق ساقتاۋ مينيسترلىگىنە ءار ءوڭىردىڭ ەپيدەميولوگيالىق احۋالىنا تۇراقتى نەگىزدە مونيتورينگ جاساۋ, قاجەت بولعان جاعدايدا كوروناۆيرۋستىڭ جاڭا شتامىمەن كۇرەس بويىنشا وڭىرلەردىڭ دەنساۋلىق ساقتاۋ جۇيەلەرىنىڭ قىزمەتىن ۇيىمداستىرۋ بويىنشا كونسۋلتاتيۆتىك, مەتودولوگيالىق جانە پراكتيكالىق كومەكپەن قامتاماسىز ەتۋ, «اتامەكەن» ۇكپ, وڭىرلەردىڭ اكىمدىكتەرى جانە باسقا دا مۇددەلى مەملەكەتتىك ورگاندارمەن جانە ۇيىمدارمەن بىرلەسىپ, قاجەت بولسا كارانتيندىك شارالاردى كۇشەيتۋ بويىنشا كەلىسىلگەن ۇسىنىستار ەنگىزۋ تاپسىرىلدى.
وتىرىستى قورىتىندىلاي كەلە, ە. توعجانوۆ ەپيدەميولوگيالىق جاعداي بولجامى حالىقتىڭ ۆاكتسينالاۋمەن جانە رەۆاكتسيناتسيامەن قامتىلۋ كولەمىنە تىكەلەي بايلانىستى بولاتىنىن, سونداي-اق وڭىرلەردىڭ اكىمدىكتەرى بۇل باعىتتاعى جۇمىستى كۇشەيتۋى ءتيىس ەكەنىن ايتتى.
