قازاقستان رەسپۋبليكاسىنىڭ باس مەملەكەتتىك سانيتارلىق دارىگەرىنىڭ قاۋلىسىمەن جۇمىس جانە دەمالىس كۇندەرى ساۋدا جانە ويىن-ساۋىق ورتالىقتارىنا, ساۋدا ۇيلەرىنە, ساۋدا جەلىلەرىنە (ازىق-ت ۇلىك ەمەس, ساۋدا الاڭى 6 مىڭ شارشى مەتردەن استام), سونداي-اق كاراوكەگە تەك قاۋىپسىز «جاسىل» مارتەبەسى بار قىزمەتكەرلەر مەن كەلۋشىلەردىڭ كىرۋىنە رۇقسات ەتىلەدى. «جاسىل» مارتەبەلىلەر – ۆاكتسينالاۋ, سىناما الىنعان ساتتەن باستاپ 7 كۇننەن اسپايتىن تەرىس ناتيجەسى بار پتر-تەستى, تۇراقتى مەديتسينالىق قارسى كورسەتىلىمدەرى بار, سوڭعى 3 اي ىشىندە اۋىرىپ ساۋىققان ادامدار. ياعني اتالعان نىساندارعا Ashyq قوسىمشاسىندا مارتەبەسى «كوك» ءتۇستى بولىپ تۇرعان ازاماتتار كىرە المايدى.
قابىلدانعان شارالار كوروناۆيرۋستىڭ «وميكرون» ءتۇرىنىڭ تارالۋ جانە جۇعۋ جىلدامدىعىن ەسكەرە وتىرىپ, الدىن الۋعا نەگىزدەلگەن. بۇل جاڭا شتامم قازىردىڭ وزىندە الەمنىڭ 110 ەلىندە تابىلدى.
«وميكرون» شتامىنىڭ قارقىندى تارالۋى بىرقاتار ەلدىڭ دەنساۋلىق ساقتاۋ جۇيەسىنە شامادان تىس سالماق سالىپ وتىر. وسىعان بايلانىستى قابىلدانىپ وتىرعان شارالار ەپيدەميالىق جاعدايدىڭ تۇراقتىلىعىن ساقتاۋعا, اۋرۋلار سانىنىڭ ءوسۋ قاۋپىن ازايتۋعا, نەعۇرلىم قاتاڭ شەكتەۋ شارالارىن ەنگىزۋگە جول بەرمەۋگە باعىتتالعان.
كوروناۆيرۋستىڭ بۇل ءتۇرىنىڭ جۇقپالىلىعى «دەلتا» نۇسقاسىنا قاراعاندا بەس ەسە جوعارى ەكەنىن ەستە ساقتاۋ كەرەك, قايتا جۇقتىرۋ قاۋپى جوعارى. دۇنيەجۇزىلىك دەنساۋلىق ساقتاۋ ۇيىمىنىڭ بولجامى بويىنشا اۋرۋ بىرنەشە ايدىڭ ىشىندە بۇكىل الەمگە تارالۋى مۇمكىن.
