جاڭا سپورت تۇرلەرى قوسىلدى
بيىلعى بەيجىڭ وليمپياداسىندا سپورتشىلار 7 سپورت تۇرىندەگى 15 باعدارلاما بويىنشا 109 مەدال جيىنتىعىن ساراپقا سالادى. وليمپيادا باعدارلاماسىنا ەنگەن سپورت تۇرلەرى – بياتلون, بوبسلەي (بوبسلەي, سكەلەتون), كەرلينگ, كونكي سپورتىنىڭ تۇرلەرى (كونكي جارىسى, مانەرلەپ سىرعاناۋ, شورت-ترەك), شاڭعى سپورتىنىڭ تۇرلەرى (تاۋ-شاڭعى جارىسى, شاڭعى قوسسايىسى, شاڭعى جارىسى, تۇعىردان سەكىرۋ, فريستايل, سنوۋبورد), شانا سپورتى, شايبالى حوككەي. سونداي-اق بيىلعى اق وليمپياداعا 7 جاڭا جارىس ءتۇرى قوسىلدى. ولار: ايەلدەردىڭ جەكەلەي بوبسلەيى, ەرلەر مەن ايەلدەر اراسىنداعى شاڭعى بيگ-ەيرى, شورت-ترەكتەگى ارالاس ەستافەتا, تۇعىردان سەكىرۋ, فريستايل جانە سنوۋبورد-كروسس بويىنشا ارالاس كوماندالىق جارىستارى. بولجام بويىنشا, بيىلعى اق قار, كوك مۇز ۇستىندەگى جارىسقا 4 مىڭنان اسا سپورتشى قاتىسادى.
تۇڭعىش رەت قىسقى وليمپيا ويىندارى تاريحىندا ەرلەر مەن ايەلدەر سانى ءبىرشاما تەڭەستى. بەيجىڭدە ايەلدەر قاتىساتىن جارىس الدىڭعى وليمپيادالارمەن سالىستىرعاندا الدەقايدا كوپ بولماق. ياعني قاتىسۋشىلاردىڭ 45 پايىزىن ايەلدەر قۇرايدى. حالىقارالىق وليمپيادا كوميتەتى بىلتىر توكيودا وتكەن جازعى وليمپيا ويىندارىندا دا جولدامالاردىڭ 51 پايىزىن ەرلەرگە, 49 پايىزىن ايەلدەرگە ۇلەستىرگەن ەدى.
قازاقستاننىڭ ۇلتتىق وليمپيادا كوميتەتىنىڭ دەرەگى بويىنشا, قىتايداعى قىسقى ويىندار «تازا مۇز بەن قارداعى قۋانىشتى كۇن» ۇرانىمەن وتەدى. ۇيىمداستىرۋشىلار بەيجىڭ-2022 دوداسى ميلليونداعان قىتايلىقتىڭ قىسقى سپورت تۇرلەرىنە قىزىعۋعا شابىتتاندىرادى دەپ ۇمىتتەنەدى.
جارىستار ءۇش قالادا وتەدى
وليمپيا ويىندارى بەيجىڭ مەن ونىڭ ماڭايىنداعى يانتسين جانە چجانتسزياكوۋ قالارىندا ۇيىمداستىرىلادى. 2008 جىلعى جازعى وليمپياداعا ارناپ سالىنعان سپورت نىساندارىندا ەندى قىسقى وليمپيادانىڭ كەرلينگ, حوككەي, كونكيمەن جۇگىرۋ سپورتى, سونداي-اق ەرلەر مەن ايەلدەر اراسىنداعى سنوۋبوردينگ پەن شاڭعى فريستايلىنداعى بيگ-ەير سەكىلدى جارىستار وتكىزىلەدى.
يانتسين – استانانىڭ قالا ماڭىنداعى اۋدانى, بەيجىڭنەن سولتۇستىك-باتىسقا قاراي 80 شاقىرىم جەردە ورنالاسقان. وندا شاڭعى, بوبسلەي, سكەلەتون جانە شانا سپورتىنىڭ جۇلدەلەرى ساراپقا سالىنادى.
چجانتسزياكوۋ – بەيجىڭنىڭ سولتۇستىك-باتىسىنداعى كورشىلەس حەبەي پروۆينتسياسىنا جاقىن ورنالاسقان قالا. مۇندا سنوۋبوردينگ, شاڭعى سپورتىنىڭ بارلىق ءتۇرى جانە بياتلون جارىستارى وتكىزىلەدى.
الەمدەگى «وندىققا» ەنەتىن 10 سپورتشى
قازاقستان ۇلتتىق وليمپيادا كوميتەتى (ۇوك) حالىقارالىق قاتىناستار دەپارتامەنتىنىڭ ديرەكتورى ءالىمجان اقاەۆتىڭ ايتۋىنشا, قازاقستاندىق سپورتشىلار بەيجىڭ دوداسىندا ءساتتى ونەر كورسەتۋگە دايىن.
«سپورتشىلارىمىزدىڭ كوبى ۆاكتسينا الدى جانە قازىرگى دايىندىعىمىز جوعارى دەڭگەيدە. قازىر ءبىراز سپورتشىمىز وقۋ-جاتتىعۋ جيىنىندا ءجۇر, ءبىرازى ليتسەنزيا الۋ ءۇشىن جارىستارعا قاتىسۋدا. ليتسەنزيالىق تۋرنيرلەر قاڭتاردىڭ ورتاسىنا دەيىن جالعاسادى. سودان كەيىن عانا وليمپياداعا قاتىساتىن سپورتشىلار سانىن ناقتى ايتامىز» دەيدى دەپارتامەنت ديرەكتورى.
ۇوك وكىلى اتاپ وتكەندەي, ءدال قازىر قازاقستان قورجىنىندا 60 ليتسەنزيا بار. قازاقستاندىقتار ليتسەنزيا العان سپورت تۇرلەرى قاتارىندا – شاڭعى جارىسى, ترامپليننەن شاڭعىمەن سەكىرۋ, شاڭعى قوسسايىسى, فريستايل (موگۋل, اكروباتيكا), تاۋ شاڭعىسى, شورت-ترەك جانە كونكيمەن جۇگىرۋ باسەكەسى بار. سونداي-اق بياتلون سپورتى بويىنشا دا 4-5 وكىلىمىز وليمپياداعا بارۋى مۇمكىن. جانكۇيەرلەر شورت-ترەكشى جىگىتتەردەن دە زور ءۇمىت كۇتەدى. كونكي جارىسىنا شىعاتىن قىز-جىگىتتەر دە تاجىريبەلى سپورتشىلار. ولاردىڭ ناعىز ءوز مۇمكىندىكتەرىن كورسەتەتىن ءساتى كەلدى. ۇلتتىق وليمپيادا كوميتەتى ليتسەنزيا تۇرعىسىنان پحەنچحانداعى جەتىستىكتى قايتالاۋعا مۇمكىندىگىمىز جەتەدى دەپ ەسەپتەيدى.
«پحەنچحان وليمپياداسىنا 91 ليتسەنزيا جەڭىپ العان 46 سپورتشى قاتىستى. قازىر «بەيجىڭگە 48 سپورتشى بارادى, ولار 95 ليتسەنزيا ۇتىپ الادى» دەپ جوسپارلاپ وتىرمىز. بۇگىندە 60 ليتسەنزياعا يە بولعانىمىزبەن, ونى ءالى دە بەكىتۋ قاجەت. ياعني سپورتشىلار جارىستارعا قاتىسىپ, ليتسەنزياعا لايىق ەكەنىن دالەلدەۋى ءتيىس», دەيدى ۇوك سپورت ديرەكتسياسىنىڭ ديرەكتورى ەلسيار قاناعاتوۆ.
ە.قاناعاتوۆتىڭ ايتۋىنشا, 2022 جىلدىڭ 16 قاڭتارىندا وليمپياداعا قاتىساتىن سپورتشىلاردىڭ اتى-ءجونى تولىق بەلگىلى بولادى. بيىل قىسقى سپورت تۇرلەرىنىڭ دايىندىعى ءۇشىن 2,9 ملرد تەڭگە بولىنگەن. بۇل – الدىڭعى جىلدارمەن سالىستىرعاندا اجەپتاۋىر كوپ قاراجات. ۇوك وكىلىنىڭ سوزىنە سەنسەك, ءدال قازىرگى ساتتە الەمدەگى ۇزدىك وندىق قاتارىنا ەنەتىن 10 سپورتشىمىز بار. سونىڭ ىشىندە كوميتەت يۋليا گالىشەۆانى اتاپ وتەدى. ارينە, مەدال الۋدان ءۇمىتتى سپورتشىلار ءتىزىمى يۋليامەن شەكتەلمەيدى. كونكيشى, شورت-ترەكشى قىز-جىگىتتەردەن دە جانكۇيەرلەر جۇلدە كۇتەدى.
جەتى وليمپيادانىڭ جەتىستىگى
قىسقى وليمپيا ويىندارىنىڭ تاريحىنا كوز جۇگىرتەر بولساق, ەلىمىز تəۋەلسىز مەملەكەت رەتىندە 1994 جىلدان بەرى اق وليمپياداعا تۇراقتى تۇردە قاتىسىپ كەلەدى. قازاقستان ۇلتتىق قۇراماسىنىڭ مۇشەلەرى بيىل قىسقى وليمپياداعا سەگىزىنشى رەت قاتىسپاق. بۇعان دەيىنگى جەتى وليمپيا ويىندارىندا ەلىمىزدىڭ سپورتشىلارى سەگىز مەدال جەڭىپ العان. تارقاتىپ ايتار بولساق, 1994 جىلى نورۆەگيانىڭ ليللەحامەر قالاسىندا وتكەن تورتجىلدىقتىڭ باستى بəسەكەسىندە شاڭعىشى – ۆلاديمير سميرنوۆتىڭ جالعىز ءوزى ءبىر التىن جəنە ەكى كۇمىس مەدال يەلەنىپ, ايدى اسپانعا ءبىر-اق شىعاردى.
جاپونيانىڭ ناگانو قالاسىندا جالاۋى جەلبىرەگەن كەلەسى تورتجىلدىقتىڭ باستى دوداسىندا وتانداستارىمىز ەكى قولا مەدالدى قاناعات تۇتتى. ءبىرىن ۆلاديمير سميرنوۆ ولجالاسا, ەكىنشى قولا مەدالدى كونكيمەن جۇگىرۋ سپورتىنىڭ وكىلى ليۋدميلا پروكاشەۆا يەلەندى. مۇنان كەيىنگى ەكى وليمپيادادا (2002 جىل, سولت-لەيك-سيتي (اقش), 2006 جىل, تۋرين (يتاليا) سپورتشىلارىمىز ەلگە جۇلدەسىز ورالدى. ال 2010 جىلى ۆانكۋۆەردە (كانادا) وتكەن كەزەكتى وليمپيادادا كۇللى قازاقستان ەلەنا حرۋستالەۆانىڭ (بياتلون) كۇمىسىن قاناعات تۇتسا, 2014 جىلعى سوچي وليمپياداسىندا دەنيس تەن (مəنەرلەپ سىرعاناۋ) مەن 2018 جىلعى پحەنچحاندا يۋليا گالىشەۆانىڭ (موگۋل) جالعىز قولاسى قازاقستان قۇراماسىن جۇلدەسىز قايتۋدان قۇتقارىپ قالدى.
الداعى بەيجىڭ وليمپياداسىنان دا جەرلەستەرىمىزدەن ايرىقشا ءۇمىت كۇتەمىز. 2008 جىلى قىتايدا وتكەن جازعى وليمپيادا جەرلەستەرىمىز ءۇشىن ءساتتى بولىپ, 2 التىن, 3 كۇمىس جانە 4 قولا مەدال جەڭىپ العان ەدى. بۇل جولعى بەيجىڭ وليمپياداسى دا سپورتشىلارىمىزعا ءساتتى بولىپ, اراعا 28 جىل سالىپ ەل قورجىنىنا التىن جۇلدە سالادى دەگەن سەنىمدەمىز.
