اياگوز قالالىق پب كوشى-قون قىزمەتى بولىمىنە جەكە سوت ورىنداۋشىسىنىڭ ءوز بالالارىن اسىراپ-باعۋعا اليمەنت تولەمەي جۇرگەن 47 جاستاعى بورىشكەرگە ىزدەۋ جاريالاۋ تۋرالى قاۋلىسى كەلىپ ءتۇستى.
«ىزدەستىرۋ ءىس-شارالارى بارىسىندا اياگوز اپب كوشى-قون قىزمەتىنىڭ قىزمەتكەرلەرى 24 ساعات ىشىندە ىزدەۋ ءىسىن اشپاستان اليمەنت تولەۋدەن جالتارىپ جۇرگەن ازاماتتىڭ جۇرگەن جەرىن انىقتاعان. بەلگىلى بولعانداي, ەر ادام ءبىر جىلدان استام ۋاقىتتان بەرى ءوزىنىڭ ءتورت بالاسىنا قارىزى 400 مىڭ تەڭگەگە جەتكەن. ەندى قارىزدى ءوندىرىپ الۋمەن سوت ورىنداۋشىلارى اينالىسادى», دەدى كوشى-قون قىزمەتى باسقارماسىنىڭ باستىعى ەربول بەكپاەۆ.
شقو پد كوشى-قون قىزمەتى اتقارۋ قۇجاتىن ورىنداماعانى ءۇشىن قر اقبتك-ءنىڭ 669-بابى (سوت ۇكىمىن, سوت شەشىمىن نەمەسە وزگە دە سوت اكتىسى مەن اتقارۋ قۇجاتىن ورىنداماۋ) جانە قر قك-ءنىڭ 139-بابى (بالالاردى اسىراۋعا قاراجات تولەۋ جونىندەگى مىندەتتەردى ورىنداماۋ, ەڭبەككە جارامسىز اتا-اناسىن, ەڭبەككە جارامسىز جۇبايىن (زايىبىن) اسىراۋعا قاراجات تولەۋدەن جالتارۋ) بويىنشا اكىمشىلىك جاۋاپكەرشىلىك كوزدەلگەنىن ەسكەرتەدى.
