قۇراماعا مىقتىلار عانا قابىلدانادى

جاستاردىڭ

قارقىنى جاقسى

سەربيادا وتكەن الەم چەمپيو­ناتىنىڭ جەڭىمپازدارى تەمىرتاس ءجۇسىپوۆ (48 كگ) پەن ساكەن بيبو­سىنوۆ (51 كگ), كۇمىس جۇلدەگەر سا­بىرحان ماحمۇد (54 كگ) پەن سە­رىك تەمىرجانوۆ (57), ۇزدىك ۇش­تىكتەن كورىنگەن ابىلايحان ءجۇ­سىپوۆ (67) جانە جاھان جارى­سىندا ماڭىزدى كەزدەسۋلەر وتكىزگەن اس­لانبەك شىم­بەرگەنوۆ (71 كگ) ۇلتتىق قۇرا­مانىڭ كوش­باس­­شى­لارى ەكەندىگى ءسوزسىز. سون­دىقتان اتالعان بوكس­شىلاردى الەم­دىك دودادان كەيىن قازاقستان بى­رىن­شىلىگىنە قاتىسۋدان بوساتقان ەدىك. سوعان قاراماستان, العاشقى كۇندەردەن باستاپ چەم­پيو­ناتتاعى جەكپە-جەك­تەر وتە تار­تىستى ءوتتى. بىرىنشىلىككە تاجى­ريبەلى بوكسشىلارمەن قاتار جاستار اراسىندا ۇزدىك ناتيجەگە قول جەتكىزگەندەر دە قاتىستى. وسى ءساتتى پايدالانىپ, ءتۋرنيردى جوعارى دەڭگەيدە وتكىزگەن قازاقستان بوكس فە­دەرا­تسياسى باسشىلىعىنا, جارىستى ۇيىمداستىرۋعا قاتىسقان ءار­بىر ازاماتقا العىس ايتقىم كە­لەدى.

فينالدىق ايقاستارعا كەلسەك, 48 كيلو سالماقتا جاستار ارا­سىندا ازيا جانە الەم چەمپيو­نى سانجار تاشكەنباي مەن ەرەسەكتەر اراسىندا 2020 جىلعى قازاق­ستان چەمپيونى, ازيا چەمپيو­ناتىنىڭ ءفيناليسى دانيال ءسابيت اراسىنداعى كەزدەسۋ وتە تارتىستى ءوتتى. ەكەۋى دە جەڭىسكە لايىق بوكس­شىلار. ايتسە دە جەكپە-جەكتە سانجار تاشكەنباي 4:1 ەسەبىمەن جەڭىسكە جەتتى. جارىستىڭ «ۇزدىك بوكس­شىسى» اتاعىنا دا سانجار تاشكەنباي يە بولدى.

51 كيلو سالماق دارەجەسىندەگى نۇر­سۇلتان نۋريددينوۆ پەن دامير ابدىقادىر اراسىنداعى فينالدىق ايقاستا باسەكە كۇشتى ەكەنىن كورسەتتى. ناتيجەسىندە, اسكەريلەر اراسىندا رەسەيدە وتكەن الەم چەمپيو­ناتىنىڭ ءفيناليسى دامير اب­دىقادىر قارسىلاسىن 5:0 ەسە­بىمەن جەڭىپ, تۇڭعىش رەت قا­زاقستان چەمپيونى اتاندى.

54 كيلو سالماقتاعى ولجاس باي­نيازوۆ پەن تالعات سىرىمبەتوۆ ارا­سىنداعى ايقاس ءبىرىنشى سەكۋندتان باستاپ تەڭ دارەجەدە ءوتتى. ولجاس تا اسكەريلەر اراسىندا الەم چەمپيونى اتانعان بوكسشى. تورەشىلەر ەكى راۋندتا جەڭىستى تالعات سىرىم­بەتوۆكە بەرسە, ءبىر راۋند­تا جە­ڭىستى ول­جاس باينيازوۆقا بەردى. قو­رى­تىندىسىندا تالعات قار­سىلا­سىنان 3:2 ەسەبىمەن باسىم ءتۇستى.

 ورتا سالماقتا باسەكە وتە جوعارى

57 كيلو سالماقتاعى ورازبەك اسىلقۇلوۆ پەن ايدوس اراپوۆ اراسىنداعى كەزدەسۋ دە وتە تار­تىس­تى ءوتتى. جەڭىسكە ەكى بوكس­شى دا لايىق ەدى. تورەشىلەر ەكى راۋند­تا اسىلقۇلوۆتى جەڭىسكە جەت­تى دەسە, ءبىر راۋندتا اراپوۆتىڭ باسىمدىلىعىن جوعارى باعالادى. قورىتىندىسىندا 3:2 ەسەبىمەن اسىلقۇلوۆ قازاقستان چەمپيو­نى اتاندى. 60 كيلو سالماقتا دا تاجىريبەلى بوكسشىلاردىڭ قاتارى كوپ بولدى. فينالدىق ايقاستا ادىلەت قۇرمەتوۆ ءبىرىنشى راۋندتا جەڭىسكە جەتتى. ال ەكىنشى-ءۇشىنشى راۋندتا ونىڭ قارسىلاسى ۆاسيلي سامچۋك بەلسەندىلىك تانىتتى. ءۇش راۋندتىڭ قورى­تىندىسى بويىنشا بارلىق تو­رەشى سامچۋكتى جەڭىسكە لايىق دەپ تانىدى.

63,5 كيلو سالماقتا ءدىلمۇرات ميجيتوۆ ۇزدىك اتاندى. فينالدا ول ابزال سەرىكتەن 1-2 راۋندتاردا 2:3 ەسەبىمەن جەڭىلىپ تۇرعان. الايدا جەڭىلىپ جاتقانىن بىلگەن ميجيتوۆ ءۇشىنشى راۋندتا بارىن سالىپ, 5:0 ەسەبىن تىركەدى. ناتيجەسىندە, 3:2 ەسەبىمەن مي­جي­توۆ جەڭىسكە جەتتى. 67 كيلو سالماقتا دۋلات بەكباۋوۆ دارحان دۇيسەبايدى 5:0 ەسەبىمەن تازا جەڭىپ, ءوزىنىڭ مىقتى ەكەنىن دا­لەلدەدى.

كىشىگىرىم سەنساتسيا تىركەلدى

71 كيلودا فينالعا جەتكەن ەرماحان جاقپەكوۆ پەن قۋان قۋاتوۆ ەكەۋى دە تاجىريبەلى بوكس­شىلار. تارتىستى وتكەن كەزدەسۋدە تورەشىلەر جەڭىستى ءبىرىنشى راۋندتا – جاقپەكوۆكە, ەكىنشى راۋندتا – قۋاتوۆقا, ال ءۇشىنشى راۋندتا قايتادان جاقپەكوۆكە بەردى. ال 75 كيلو سالماقتا رينگكە شىققان نۇرقانات رايىس پەن اياتۋللا تا­كي­جانوۆ اراسىنداعى جەكپە-جەك جوعارى باعالاۋعا لايىق. بۇل سىندا ءسال عانا باسىم­دىقپەن (3:2) نۇرقانات رايىس الدا بولدى.

80 كيلو سالماقتا فينالعا دەيىن جەتكەن جانىبەك قارتباەۆ چەم­پيوناتتا كىشىگىرىم سەنساتسيا جاسادى. ول تۋرنير بارىسىندا قۇرامانىڭ ۇزدىك دەگەن ەكى بوكسشىسىن جارىس جولىنان شىعاردى. الايدا فينالدا نۇربەك ورالبايدان 0:5 ەسە­بىمەن جەڭىلىس تاپتى. الداعى ۋا­قىتتا جانىبەكتى حالىقارالىق جارىستارعا قوسۋعا ابدەن بولادى. 86 كيلو سالماقتا ساعىندىق توعامبايعا تەڭ كەلەر ەشكىم بول­عان جوق. ونىمەن فينالدا جولى تۇيىسكەن جاس بوكسشى ءمادي ءامى­روۆ تاجىريبەلى قارسىلاسپەن جۇدىرىقتاسۋعا ءالى دايىن ەمەس ەكەنىن بايقاتتى.

 رينگكە شىقپاي-اق قولا جۇلدەگەر اتاندى

92 كيلو سالماقتا حالىق­ارالىق دارەجەدەگى سپورت شەبەر­لەرى ايبەك ورالباي مەن ابزال قۇتتىبەكوۆ اراسىنداعى جەكپە-جەك وتە تارتىستى ءوتتى. ايبەك بىلتىرعى قازاق­ستان چەمپيوناتىندا جەڭىمپاز اتان­سا, ابزال قولا جۇلدەگەر يەسى. بۇل جەكپە-جەكتە جانكۇيەرلەردىڭ كوڭىلىنەن شىعاتىن سوققىلار وتە كوپ بولدى. ءبىرىنشى راۋندتا اي­بەك باسىمدىق تانىتتى. ەكىن­شى راۋندتا ابزال تارازى باسىن تەڭەستىردى. شەشۋدى كە­زەڭدە ءسال عانا باسىمدىقپەن اي­­بەك جەڭىسكە جەتتى. 92 كيلودان جوعارى سالماقتا فينالعا شىق­قان نۇرلان ساپارباي مەن امانات سابىرعاليدىڭ بوكس مانەرىنە كوڭىلىمىز تولعانىمەن, الداعى ۋاقىتتا ولاردىڭ شەبەر­لىگىن شىڭداۋ بارىسىندا كوبىرەك جۇمىس ىستەۋگە تۋرا كەلەدى. ەكى بوكس­شى دا جوعارى دەڭگەيدە ونەر كور­سەتكەنىمەن, جەتىلدىرەتىن تۇس­تارى بار. بۇل سىندا نۇرلان ساپار­باي باسىم ءتۇستى.

بارلىعىن قوسقاندا الداعى ۋاقىتتا ۇلتتىق قۇراما ساپىنا 52 بوكسشى شاقىرىلادى. كەيبىر سالماقتاردان قۇراماعا 2-3 بوكس­شى عانا الىنادى. مىسالى, 92 كيلودا بەس-اق بوكسشى ونەر كور­سەتتى. اراسىندا بەكسۇلتان ورىنباي رينگكە شىقپاي-اق قولا جۇلدەگەر اتاندى. ولاردىڭ اراسىنان قالاي ءبىز ءتورت بوكسشىنى قۇراما ساپىنا قوسامىز؟! سول سەبەپتى باپكەرلەر القاسى اقىلداسا كەلىپ, ءاربىر سالماقتا مىقتى دەگەن بوكسشىلاردى قۇ­راماعا شاقىراتىن بولادى.