جازۋشى بيىل 85 جاسقا قاراعان شاعىندا ومىردەن وزدى. جازۋشىنى ەسكە الۋ ماقساتىندا قىرىق جىلدان استام تۇرعان جامبىل كوشەسى, 163-ۇيگە ەسكەرتكىش تاقتا ورناتىلدى. بۇل ۇيدە جازۋشىنىڭ قازاق ادەبيەتىنىڭ التىن قورىنا ەنگەن شوقتىعى بيىك تۋىندىعا اينالعان قۇندى مۇرالارى ومىرگە كەلدى. وقىرمان قاۋىم جازۋشىنىڭ «تاعدىر» رومانى ارقىلى شەتەلگە اۋعان قانداستار تاعدىرىن تانىسا, «سوڭعى كوش» ديلوگياسى, «دارابوز» تاريحي رومانى مەن كوپتەگەن اڭگىمە, پوۆەستەرى الىس-جاقىن شەتەلدەردەگى وقىرماندار ورتاسىنا كەڭىنەن تانىلعان.
شىڭجاڭ ولكەسى, تارباعاتاي ايماعى, شاۋەشەك اۋدانىندا دۇنيەگە كەلگەن جازۋشىنىڭ تىرناق الدى تۋىندىلارى شاۋەشەك گيمنازياسىندا وقىپ جۇرگەندە باستالىپ, «شىڭجاڭ گازەتىندە» العاشقى ولەڭدەرى جارىق كورگەن-ءدى.
جيىندى قازاقستان جازۋشىلار وداعىنىڭ توراعاسى ۇلىقبەك ەسداۋلەت اشىپ, جازۋشى مۇراسى حاقىندا ءسوز سويلەدى.
سالتاناتتى جيىندا جازۋشىنىڭ جۇبايى ساۋلە اۋكەنقىزى وسى شارانى ۇيىمداستىرعان الماتى قالاسىنىڭ اكىمدىگىنە ريزاشىلىعىن بىلدىرە كەلىپ: «بۇگىن وتباسىمىزدا قۋانىشتى, تاريحي وقيعا بولىپ جاتىر. قاباڭا ارناپ ەسكەرتكىش تاقتا ورناتىلدى. قاباڭ وتە شىنشىل, شىنايى, ءادىل ادام ەدى. ويلاماعان جەردەن كەتىپ قالدى...», دەپ اتاپ وتسە, بۇل كۇندى جينالعان كوپشىلىك «كلاسسيكتى ەسكە الاتىن كورنەكى قۇرالداردىڭ باستاماسى» دەگەن پىكىر ءبىلدىردى.
قالامگەر قاۋىم مەن ادەبيەت سۇيەر وقىرمان قاتىسقان جيىندى قازاقستان جازۋشىلار وداعى باسقارما توراعاسىنىڭ ورىنباسارى باۋىرجان جاقىپ جۇرگىزدى. جيىن بارىسىندا اقىن تەمىرحان مەدەتبەك, جازۋشى-جۋرناليست جۇسىپبەك قورعاسبەك, فيلوسوفيا عىلىمىنىڭ دوكتورى, پروفەسسور
ۇلىقپان سىدىقوۆ ءسوز سويلەپ, اقىن قاسىمحان بەگمانوۆ جازۋشى رۋحىنا ارناعان ولەڭىن وقىدى.
الماتى
