سەسسيا جۇمىسىنا قازاقستان رەسپۋبليكاسىنىڭ ەكولوگيا, گەولوگيا جانە تابيعي رەسۋرستار ۆيتسە-ءمينيسترى س.قوجانيازوۆ, وزبەكستان رەسپۋبليكاسىنىڭ ەكونوميكالىق دامۋ جانە كەدەيلىكتى ازايتۋ ءمينيسترىنىڭ ورىنباسارى ب.ءابدىنازاروۆ, وزبەكستان رەسپۋبليكاسىنىڭ ەكولوگيا جانە قورشاعان ورتانى قورعاۋ جونىندەگى مەملەكەتتىك كوميتەتى توراعاسىنىڭ ورىنباسارى ج.قازبەكوۆ, سونداي-اق ەكى تاراپتىڭ مۇددەلى مەملەكەتتىك ورگاندارىنىڭ وكىلدەرى قاتىستى.
پانەلدىك سەسسيا بارىسىندا سىرداريا وزەنى سۋلارىنىڭ ساپاسىنىڭ جاي-كۇيى, ترانسشەكارالىق اعىنداردىڭ سۋ ەكوجۇيەلەرىنە اسەرى, ارال تەڭىزىنىڭ قۇرعاعان تۇبىندە قازاقستان مەن وزبەكستاننىڭ بىرلەسكەن ءىس-قيمىلدارى جانە ت.ب. ماسەلەلەر تالقىلاندى.
پانەلدىك سەسسيانىڭ قورىتىندىسىندا قازاقستان تاراپى سىرداريا وزەنى بويىنشا ەكولوگيالىق سۋ جىبەرۋ ۇعىمىن زاڭنامالىق دەڭگەيدە انىقتاۋدى; سىرداريا وزەنى باسسەينىنىڭ قورشاعان ورتانى قورعاۋ جانە سۋ ساپاسى ماسەلەلەرى بويىنشا قازاقستان-وزبەكستان بىرلەسكەن جۇمىس توبىنا سىرداريا وزەنىنىڭ جوعارعى اعىسىندا ورنالاسقان ەلدەردى (قىرعىزستان جانە تاجىكستان رەسپۋبليكالارى) تارتۋ جونىندەگى جۇمىستى مەملەكەتارالىق دەڭگەيدە جانداندىرۋدى; سىرداريا وزەنى باسسەينىن لاستاۋعا اسەر ەتەتىن كوزدەردى تۇگەندەۋ جونىندە جۇيەلى ءىس-شارالاردى جاساقتاۋدى ۇسىندى.
ء«بىز ورتاق قۇقىقتىق ۇستانىمدار, ءوزارا قۇرمەت پەن مۇددەلەردى ساقتاۋ نەگىزىندە ءوڭىر ەلدەرىنىڭ كۇش-جىگەرىن بىرىكتىرىپ قانا وڭىرلىك تۇراقتىلىقتى, ترانسشەكارالىق وزەندەردىڭ سۋ رەسۋرستارىن كەلىسىپ باسقارۋ مەن لاستانۋدان قورعاۋ پروبلەمالارىن شەشۋدى قامتاماسىز ەتۋگە جانە سول ارقىلى قازىرگى پروبلەمالاردى تابىستى شەشۋگە بولادى دەپ سانايمىز», دەپ تۇيىندەدى ۆيتسە-مينيستر س.قوجانيازوۆ.
وزبەكستان تاراپى ءوز اۋماعىندا جۇرگىزىلىپ جاتقان جۇمىستار تۋرالى, اتاپ ايتقاندا, سەكسەۋىل وتىرعىزۋ, ارال تەڭىزىنىڭ قۇرعاعان تۇبىندە ترانسشەكارالىق تابيعي رەزەرۆاتتار قۇرۋ, سونداي-اق «ارالقۇم» ۇلتتىق پاركىن قۇرۋ تۋرالى حاباردار ەتتى.
تاراپتار وسى باعىتتا بىرلەسكەن جۇمىستى جانە تاجىريبە الماسۋدى جالعاستىرۋعا كەلىستى.
