بۇگىندە قازاقستاندا ەپيدەميالىق احۋال تۇراقتى. ەل ىشىندە «قىزىل ايماقتا» تۇرعان ءوڭىر جوق. «سارى ايماقتا» نۇر-سۇلتان قالاسى, پاۆلودار, سولتۇستىك قازاقستان وبلىستارى تۇر, قالعانى – «جاسىل ايماقتا». كەيىنگى ەكى اپتادا ەلىمىزدە سىرقاتتانۋ كورسەتكىشى 31%-عا ازايعان. ال ءتورت ايدا سىرقاتتانۋ دەڭگەيى 16 ەسە تومەندەدى.
دەگەنمەن ارقانى كەڭگە سالۋعا بولمايدى. ۇيرەنشىكتى «جاۋىمىزعا» اينالعان كوروناۆيرۋس جاڭا ايلا تاۋىپ, شابۋىلداۋىن توقتاتار ەمەس. جاڭا شتامم دا جاعدايدى شاتقاياقتاتىپ جىبەرۋى مۇمكىن. مۇنى پرەمەر-ءمينيستردىڭ ورىنباسارى ەرالى توعجانوۆ تا ەسكەرتىپ, مەملەكەتتىك شەكارادان ءوتۋ پۋنكتتەرىندە باقىلاۋدى كۇشەيتۋ قاجەت ەكەنىن ايتتى.
«وميكرون» شتامىنىڭ بەلگىلەرى باس اۋرۋى مەن قاتتى شارشاۋ, دەنەنىڭ قۇرىسىپ, سىرقىراپ اۋرۋى ەكەن. قازىر جەر-جاھاندى ابىگەرگە سالىپ جاتقان جاڭا شتامعا بايلانىستى ددۇ الەم جۇرتىن روجدەستۆولىق جانە جاڭا جىلدىق جوسپارلاردان باس تارتۋعا جانە مەرەكەلەردى كەيىنگە قالدىرۋعا شاقىردى. اقش-تا «وميكرون» شتامىن جۇقتىرعانداردىڭ سانى ەكى كۇن سايىن ەسەلەپ ارتۋدا. بۇل ەلدە جاڭا شتامدى جۇقتىرۋ سانى ءبىر اپتادا 8-10%-دان 73%-عا دەيىن ءوستى. ال ەۋروپالىق وداق ەلدەرىنىڭ ۇكىمەتتەرى «وميكرون» شتامىنىڭ تەز تارالۋىنا بايلانىستى شەكتەۋ شارالارىن ەنگىزۋدە. اسىرەسە, ۇلىبريتانيا استاناسىندا كۇنىنە شامامەن 25 مىڭ ينفەكتسيا جۇقتىرۋ دەرەكتەرى انىقتالۋدا. لوندوندا توتەنشە جاعداي رەجىمى ەنگىزىلدى. وسى ۋاقىتتا فرانتسيا مەن گەرمانيا بريتاندىقتاردىڭ ءوز مەملەكەتتەرىنە كىرۋىنە تىيىم سالدى, ال نيدەرلاند ولار ءۇشىن مىندەتتى ون كۇندىك كارانتين ەنگىزدى. بۇگىنگى تاڭدا ۇلىبريتانيا ازاماتتارى ءۇشىن 40-تان استام ەل جابىلدى.
سوندىقتان قاۋىپ قىر استىندا تۇرعاندا, قامسىز ءجۇرىپ قاپى قالمايىق!
