«بارىس» ءوز ايدىنىنداعى كەيىنگى ويىندا نيجنەكامسكىنىڭ «نەفتەحيميگىنەن» 1:3 ەسەبىمەن جەڭىلىپ قالعان سوڭ, «ۋرالەتس» ارەناسىنداعى باسەكەدە جەڭىس ءۇشىن بارىن سالدى. ەكاتەرينبۋرگتەگى كەزدەسۋدىڭ ءبىرىنشى كەزەڭىندە ەسەپ اشىلمادى. ۇزىلىستەن كەيىن «بارىس» حوككەيشىلەرى ويىن تىزگىنىن ءوز قولدارىنا الىپ, كەزدەسۋدىڭ ەسەبىن اشتى. داررەن ديتس كوماندادان كەتكەننەن كەيىن كاپيتاندىق مىندەتتى وزىنە العان شابۋىلشى رومان ستارچەنكو 34-مينۋتتا قوناقتاردى ەسەپتە العا شىعاردى.
ءۇشىنشى كەزەڭدە «اۆتوموبيليست» ويىنشىلارى تارازى باسىن تەڭەستىرۋگە قانشا تىرىسقانىمەن, ورتيو قورعاعان قاقپادان ساڭىلاۋ تابا المادى. ءبىر ايتا كەتەرلىگى, يوني كەشەگى ويىندا قاقپاعا باعىتتالعان 32 سوققىنى قايتاردى. ماتچتىڭ اياقتالۋىنا 40 سەكۋند قالعاندا ليندەن ۆەي بوس قالعان قاقپانى ءدال كوزدەپ, كەزدەسۋدىڭ نۇكتەسىن قويدى – 2:0.
ەلوردا كلۋبى بۇل جەڭىسىنەن كەيىن 40 ۇپايمەن جەتىنشى ورىنعا كوتەرىلىپ الدى. ەندى جەرلەستەرىمىز كەلەسى ويىنىن بۇگىن قازاندا «اك بارسپەن» وتكىزەدى.
