نۇرلان نىعماتۋلين بيىلعى جىل ەلىمىز ءۇشىن ايتۋلى كەزەڭ – قازاقستان تاۋەلسىزدىگىنىڭ 30 جىلدىعى ەكەنىن اتاپ ءوتىپ, بۇگىندە مەملەكەت باسشىسى قاسىم-جومارت توقاەۆتىڭ باستاماسىمەن ەلىمىزدە بولىپ جاتقان ساياسي جۇيەنى رەفورمالاۋ, ازاماتتىق قوعامدى دامىتۋ ماسەلەلەرى تۋرالى ايتتى.
ءماجىلىس سپيكەرى پارلامەنتارالىق وداقتىڭ قىزمەتىن قولدايتىنىن جانە ۇيىممەن بەلسەندى ءوزارا ءىس-قيمىلدى جالعاستىرۋعا دايىن ەكەنىن العا تارتتى. سونىمەن قاتار, پارلامەنتارالىق وداقتىڭ ءىس-شارالارى پارلامەنتتىك ديپلوماتيانى ىلگەرىلەتۋدىڭ ماڭىزدى قۇرالى ەكەنىن جانە پارلامەنت وكىلدەرى اراسىنداعى ديالوگتى نىعايتۋعا ىقپال ەتەتىنىن جانە ولارعا قازاقستان پارلامەنتىنىڭ دەپۋتاتتارى تۇراقتى تۇردە قاتىساتىنىن اتاپ ءوتتى. پالاتا توراعاسى مارتەبەلى مەيماننىڭ قازاقستانعا ساپارى پارلامەنتارالىق ديالوگتى ودان ءارى نىعايتۋعا جانە قازاقستان پارلامەنتى مەن پارلامەنتارالىق وداق اراسىنداعى ىنتىماقتاستىقتى دامىتۋعا ەلەۋلى سەرپىن بەرەتىنىنە ءمان بەردى.
ءوز كەزەگىندە, د.پاشەكۋ پارلامەنتارالىق وداقتىڭ قازاقستان پارلامەنتىمەن ىنتىماقتاستىعىن ودان ءارى نىعايتا تۇسەتىنىنە سەنىم ءبىلدىرىپ, قازاقستان ەۋرازيا قۇرلىعىنداعى مەملەكەت رەتىندە, پارلامەنتارالىق وداقتىڭ مۇشەسى رەتىندە وتە ماڭىزدى ەل ەكەنىنە نازار اۋداردى.
سونداي-اق نۇرلان نىعماتۋلين قازىرگى تاڭدا پارلامەنتتە ۋاكىل ينستيتۋتىن دامىتۋ ارقىلى ادام جانە ازاماتتىڭ قۇقىقتارى مەن بوستاندىقتارىن قورعاۋ سالاسىنداعى زاڭنامانى جەتىلدىرۋ, سىبايلاس جەمقورلىققا قارسى ءىس-قيمىل, ازاماتتاردىڭ قۇقىقتارىن قورعاۋ, ءولىم جازاسى, بالالاردى قورعاۋ, ۆولونتەرلىك قىزمەت جانە ت.ب سالالارداعى زاڭنامانى جەتىلدىرۋ بويىنشا جۇرگىزىلىپ جاتقان جۇمىستارعا توقتالدى.
