قازىرگى تاڭدا مينيسترلەر كابينەتى قۇرامىندا 16 مينيستر بار. ءبىر قىزىعى, سونىڭ تەڭ جارتىسى ايەل. قىركۇيەكتە وتكەن سايلاۋدا جەڭىسكە جەتكەن SDP اتىنان 7 مينيستر تاعايىندالسا, 5 لاۋازىم «جاسىلدار» پارتياسىنا بۇيىردى. ەركىن دەموكراتتار (FDP) اتىنان 4 مينيستر بەكىتىلدى.
ەستەرىڭىزدە بولسا, قىركۇيەكتە گەرمانيادا پارلامەنتتىك سايلاۋ وتكەن بولاتىن. داۋىس ساناۋ ناتيجەسى بويىنشا سولشىل باعىتتاعى سوتسيال-دەموكراتيالىق پارتيا (SDP) جەڭىسكە جەتتى. بۇعان دەيىن بيلىكتە باسىم داۋىسقا يە بولىپ كەلگەن حريستيان-دەموكراتيالىق وداعى (CDU) ەكىنشى ورىنعا تۇراقتادى.
سوتسيال-دەموكراتتارعا ەلەكتوراتتىڭ 25,7 پايىزى داۋىس بەردى. ەكىنشى ورىنداعى حريستيان-دەموكراتيالىق پارتياسىن حالىقتىڭ 24,1 پايىزى قولداعان. وسىلايشا, 16 جىل بويى بۋندەستاگتا كوپشىلىك مانداتتى يەلەنىپ كەلگەن CDU جەڭىلىسكە ۇشىرادى.
ءۇشىنشى ورىن «جاسىلدار» پارتياسىنا بۇيىردى. ولاردىڭ ەنشىسىنە بيۋللەتەندەردىڭ 14,8 پايىزى تيەسىلى. بۇعان دەيىنگى سايلاۋعا قاراعاندا, اتالعان پارتيا كوبىرەك داۋىس جينادى. ءسويتىپ بۋندەستاگتاعى ماندات سانىن ەكى ەسەگە كوبەيتە الدى. بۇل نەمىس حالقىنىڭ قورشاعان ورتاعا الاڭداي باستاعانىن كورسەتەدى.
سونىمەن ءۇش ايعا سوزىلعان كەلىسسوزدەر ناتيجەسىندە كانتسلەر سايلانىپ, مينيسترلەر كابينەتى بەكىتىلدى. وسىلايشا, ولاف شولتس باستاعان ساياساتكەرلەر الداعى ۋاقىتتا گەرمانيانى العا جەتەلەي بەرمەك.
ول بۇعان دەيىن گامبۋرگتىڭ مەرى قىزمەتىن اتقاردى. سونداي-اق مەركەل ۇكىمەتى كەزىندە قارجى ءمينيسترى بولىپ ەڭبەك ەتتى. ەكەۋى ەكى پارتيانىڭ وكىلى ەكەنىنە قاراماستان, و.شولتس قىزمەت جولىندا مەركەلدىڭ كوشباسشىلىق ءستيلىن بويىنا ءسىڭىردى دەسەك ارتىق ايتقاندىق ەمەس. ول ءوز ءىسىن جەتىك بىلەتىن قاراپايىم پراگماتيك رەتىندە تانىلدى.
و.شولتس مىرزا ا.مەركەلدىڭ شىن ءىزباسارى ەكەنىن ماراپاتتاۋ راسىمىندە سويلەگەن سوزىندە انىق اڭعارتتى. ول ءوزىنىڭ دە, ا.مەركەلدىڭ دە گەرمانيانىڭ سولتۇستىگىنەن ەكەنىن اتاپ ءوتتى. جاڭا كانتسلەردىڭ بۇعان ەكپىن بەرۋىنىڭ سىرى مىنادا. ادەتتە گەرمانيانىڭ سولتۇستىگىن مەكەندەگەندەر وڭتۇستىكتەگى وتانداستارىنا قاراعاندا مىنەزى بىركەلكى ەكەنى بەلگىلى. «مەن وسى ۋاقىتقا دەيىن باعىتىمىزدى ايقىنداعان سولتۇستىك-شىعىس نەمىس مەنتاليتەتىن جالعاستىرعىم كەلەدى. ساياساتىمىزدا كوپ وزگەرىس بولمايدى», دەدى و.شولتس. ول سونداي-اق قىزمەتتە بولعان كەزىندە كوپتەگەن ءىرى داعدارىستى ەڭسەرگەن ا.مەركەلگە قۇرمەتىن جەتكىزدى.
پرەزيدەنتتىڭ بەللەۆيۋ سارايىنداعى رەزيدەنتسياسىندا وتكەن سالتاناتتى ءىس-شارادا گەرمانيا باسشىسى فرانك-ۆالتەر شتاينمايەر جاڭا مينيسترلەرگە الدا قيىن مىندەت كۇتىپ تۇرعانىن جەتكىزدى. «سىزدەر قازىر ەلىمىز ءۇشىن جانە 82 ميلليوننان استام تۇرعىننىڭ جاۋاپكەرشىلىگىن مويىندارىڭىزعا الاسىزدار. سايلاۋدا جاۋاپكەرشىلىكتى باسىم باعىت ەتىپ بەلگىلەدىڭىز. وسىنداي مىندەتتەرىڭىز قيىن ۋاقىتقا تاپ كەلدى. پارلامەنتتەگى كواليتسيا كوپ پروگرەسكە, كوپ رەفورماعا جانە كوپ وزگەرىستەرگە جەتۋگە نيەتتى ەكەنىن قولدايمىن.
كۇمانسىز, گەرمانيا كليماتتىڭ وزگەرۋى نەمەسە تسيفرلاندىرۋ, حالىقارالىق باسەكە نەمەسە كوشى-قون سياقتى ۇلكەن قيىندىقتارمەن بەتپە-بەت كەلىپ وتىر. سىزدەردىڭ الداعى ۋاقىتتا اتقاراتىن جۇمىستارىڭىز ەلىمىزدىڭ بولاشاق كەلبەتىن قالىپتاستىرادى», دەدى ف.شتاينمايەر.
ءىس-شارادان كەيىن گەرمانيا مينيسترلەر كابينەتىنىڭ مۇشەلەرى بەكىتىلدى. ۆيتسە-كانتسلەر ءارى ەكونوميكا جانە قورشاعان ورتانى قورعاۋ ءمينيسترى بولىپ «جاسىلدار» پارتياسىنىڭ وكىلى روبەرت حابەك تاعايىندالدى. اتالعان پارتيانىڭ جەتەكشىسى اننالەنا بەربوك ەندىگى جەردە سىرتقى ىستەر ءمينيسترى قىزمەتىن اتقارادى. ەركىن دەموكراتتار پارتياسىنىڭ جەتەكشىسى كريستيان ليندنەر قارجى ءمينيسترى بولدى.
