ايماقتار • 13 جەلتوقسان، 2021

«كەرۋەن ساراي» – تاريحتىڭ كىلتى

236 رەت كورسەتىلدى

ادام ءبارىبىر بابالار تاريحىن اڭساپ تۇرادى. سول زامانعا ءبىر ورالعىسى كەلەدى. تىم قۇرىسا بىرەر مەزەتكە. ەجەلگى باھادۇرلەرمەن قاۋىشۋ، ولار جاساعان نىعمەتتەردى كوزبەن كورۋ، ولاردىڭ رۋحى مەن قۇدىرەتىن سەزىنۋ – بويىڭا ايىرىقشا كۇش سىيلايتىنىن ايتقىزباي تۇسىنەسىڭ. مىنە، وسىنداي عاجايىپتى كيەلى تۇركىستاندا، سونىڭ ىشىندە «كەرۋەن سارايعا» بارىپ سەزىنۋگە بولادى.

ورتالىق ازياداعى ەڭ ءىرى تۋريستىك كەشەن سانالاتىن «كەرۋەن سارايدىڭ» جالپى اۋماعى 20،5 گەكتار جەردى الىپ جاتىر. مۇندا ادام جانىنا كەرەكتىنىڭ ءبارى دە بار. زاماناۋي دۇكەندەر مەن ويىن-ساۋىق ورتالىقتارى، ورتا عاسىر ستيلىندەگى سارايلار مەن «ۇشاتىن تەاتر» كوزدىڭ جاۋىن الادى. كەشەننىڭ ماركەتولوگى بەلاسار ەسەنبەكتىڭ ايتۋىنشا، «كەرۋەن ساراي» كادۋىلگى كىلت پىشىنىندە سوعىلعان. توبەسىنەن قاراساڭىز تاپ سولاي. كىلتتىڭ ۇشى (كەشەننەن شىعىپ كەتەتىن تۇسى) قوجا احمەت ياساۋي ماۆزولەيىنە بارىپ تىرەلەدى. ياعني، تۋريست سارايمەن تولىق تانىسىپ بولعان كەزدە تاريحىمىز تۋرالى ءبىلىم جيىپ، ياساۋي بابامىزدىڭ كىم بولعانىنان جەتكىلىكتى ماعلۇمات الادى. ءسويتىپ، ءارى قاراي ماۆزولەيدى ارالاۋعا رۋحاني تۇرعىدان دايىن بولادى.ە

«كەشەننىڭ كىرە بەرىسىندە جانە شىعا بەرىسىندە بەسجۇلدىزدى قوناقۇي ورنالاسقان. جالپى، كەشەننىڭ كونتسەپتسياسى مىناداي: ادام قىدىرىپ كەلىپ، قوناقۇيگە ورنالاسادى، ودان كەيىن سۋ ۇستىندەگى شوۋدى كورەدى، ول جەردە «قىز جىبەك – تولەگەن» فونتان شوۋى قويىلادى. ودان شىعىپ اتتار شوۋىن كورۋ ءۇشىن امفيتەاترعا بارادى. ودان بولەك ءتۇرلى كونتسەرتتەر بار. ساۋدا جاسايمىن دەگەندەرگە دە ەرەكشە جاعداي جاسالعان. «ۇشاتىن تەاتر» دا ادامعا بۇرىن-سوڭدى سەزىنبەگەن اسەر سىيلايدى. ءبارىن اياقتاعان سوڭ مەيرامحاناعا نەمەسە فۋد-كورتقا بارىپ تاماقتانا الادى. «كەرۋەن ساراي» كەشەنىنىڭ ەرەكشەلىگى – ەسكى تاريحىمىزدى جاڭا زاماناۋي تەحنولوگيالارمەن ۇيلەستىرە وتىرىپ حالىققا جاڭا فورماتتا كورسەتەدى»، - دەيدى ول.ن

Altyn Samuryk «ۇشاتىن تەاترىنىڭ» عاجابىن سوزبەن سيپاتتاپ جەتكىزۋ ءتىپتى قيىن. كەشەن ۇيىمداستىرۋشىلارى بۇل جوبانى 8D سوڭعى تەحنولوگياسىمەن جاراقتالعان ورتالىق ازياداعى بىرەگەي تەاتر دەپ باعالايدى. ارنايى كرەسلوعا وتىرعان سوڭ-اق التىن سامۇرىق ءسىزدى كونە تاريح تەرەڭىنە تارتىپ اكەتەدى. بايىرعى تاريحي شاھارلاردى ارالاتىپ، ودان زاماناۋي نۇر-سۇلتان شاھارىنىڭ توبەسىمەن ۇشىرىپ، سوڭىندا تۇرىك دۇنيەسىنىڭ تەمىرقازىعىنا اينالعان تۇركىستان قالاسىنا قايتىپ الىپ كەلەدى.ش

كەشەندەگى شوۋلاردى ۇيىمداستىرۋ جانە دامىتۋ بويىنشا جەتەكشى الەكسەي حرامەنكوۆتىڭ ايتۋىنشا، اتتار شوۋى قويىلاتىن «ارەنا» سارايى 1500 ورىنعا لايىقتالىپ سالىنعان.ي

قازاقستانداعى ەڭ ۇلكەن LED ەكران دا وسى جەردە قويىلعان. اتتار جاتتىعۋدى وسى كەشەن ىشىندە جاسايدى. بارلىعى دا شەتەلدەن الدىرىلعان جانۋارلار. اتقوراداعى ات سانى – 18. اتتار قويىلىمىنىڭ جوباسىن فرانتسيالىق كاسكادەر جانە باپكەر ماريو ليۋراشي جاساپ بەرگەن. قازىر Nomad كاسكادەرلەر توبى اينالىسادى.ي

كوز تارتار كەشەن قۇرىلىسىنا «قازاقستاننىڭ دامۋ بانكى» اق قولداۋ كورسەتكەن. جوبا قۇنى – 87 ملرد تەڭگە.

«سونىڭ ىشىندە ينۆەستورلاردىڭ جەكە قارجىسى 47 ملرد تەڭگەنى قۇرايدى. قازاقستاننىڭ دامۋ بانكى 40 ملرد تەڭگە كولەمىندە قارجى قۇيدى. جوبا 115 بولمەلى ەكى قوناقۇي، ويىن-ساۋىق ورتالىعىن سالۋدى قامتىدى. قازىرگى ۋاقىتتا جوبا ءساتتى جۇمىس ىستەۋدە»، - دەيدى دامۋ بانكىنىڭ كليەنتتەرمەن جۇمىس جونىندەگى ديرەكتسيانىڭ اعا بانكيرى سەرىك احمەتوۆ.پ

تۋريستەرگە قولايلى بولۋ ءۇشىن كەشەن اۋماعىندا بىرنەشە ەلەكتروكار جۇمىس ىستەيدى. ازىرگە «كەرۋەن ساراي» كەشەنىن تولىققاندى كوممەرتسيالىق جوبا دەپ اتاۋ قيىن. دەسە دە الەكسەي حرامەنكوۆ جوبانىڭ تارتىمدىلىعىن ارتتىرۋ ءۇشىن جوسپارىمىز كوپ دەيدى. ويتكەنى تۇركىستانداعى اۋليە-امبيەلەردىڭ باسىنا ءتاۋ ەتۋ ءۇشىن كەلەتىن ادام سانى ءبىرشاما. ەندى سولاردى تۋريستىك نىساندار مەن جوبالارعا ءساتتى تارتا ءبىلۋ قاجەت. قازىر قىس ماۋسىمى بولعاندىقتان كەلۋشىلەردىڭ قاراسى قالىڭ ەمەس. ال بيىل جاز كەزىندە سۋداعى شوۋدى كورۋدىڭ وزىنە ساعاتىنا 13 مىڭ ادام جيىلعان.

«ستاتيستيكا بويىنشا نەگىزىنەن بىزگە قىزىلوردا، شىمكەنت، الماتى قالالارىنان جانە تۇركىستان وبلىسىنىڭ وزىنەن ادامدار كوپ كەلەدى. شەتەلدىك تۋريستەر – نەگىزىنەن تۇركيا، فرانتسيا جانە باسقا دا ەۋروپا ەلدەرىنەن كەلۋشىلەر. قازاقتىڭ سالت-داستۇرىنە قىزىعۋشىلىق تانىتقان قىتايلىق تۋريستەر دە كوپ بولدى. شەتەلدىك تۋريستەر ءۇشىن ءبىز ءۇش تىلدە (قازاق، ورىس، اعىلشىن) ەركىن سويلەي الاتىن گيدتەردى دە دايىنداپ قويدىق. تۇرىك تىلىندە ەركىن سويلەسەتىن قىزمەتكەرلەرىمىز دە بار. ماۋسىمنىڭ قىزعان كەزىندە كۇنىنە 20 مىڭعا دەيىن ادام كەلدى»، - دەيدى بەلاسار ەسەنبەك.

كەشەن تۋريستەر ءۇشىن تىنىعىپ، دەمالىپ، كوڭىل كوتەرەتىن مەكەن بولسا، كاسىپكەرلەر ءۇشىن – تابىستىڭ كوزى. اسىرەسە، جاز ماۋسىمى كەزىندە بۇل جەردە كۇنىنە مىڭ دوللاردان اسىرىپ ساۋدا جاساۋعا بولادى. بەلاسار ەسەنبەكتىڭ ايتۋىنشا، كەشەن ىشىندە اشىق جانە جابىق بازارلار ۇيىمداستىرىلعان. ول جەردە ءار اپتا سايىن ءار اۋداننىڭ كاسىپكەرلەرى كەلىپ، ءوز ونىمدەرى مەن تاۋارلارىن ساتىلىمعا شىعارا الادى. ءارى بۇل ءۇشىن ولاردان ءبىر تيىن اقى الىنبايدى.ن

تۋريستىك ورتالىق اۋماعىن ارالاي ءجۇرىپ الەمدىك برەندتەردىڭ ساۋدا جەلىلەرىنە باس سۇعىپ، ۇلتتىق تاعامدار ازىرلەنەتىن مەيرامحانالاردان اس ىشۋگە دە بولادى. ناۋرىز ايىنان باستاپ ەستەن كەتپەس اسەرلى شوۋلار قايتا باستالماق. ويىن-ساۋىق جوبالارىنىڭ بارلىعى دەرلىك كەلۋشىلەردىڭ ەجەلگى تاريحپەن، بابالار جولىمەن، قازاقتىڭ قاسيەتتى سالت-داستۇرىمەن تانىستىرۋ ماقساتىندا جاسالعان.

سوڭعى جاڭالىقتار

اقجايناق استانا

ەلوردا • كەشە

ديماش پەن دجەكسون

ونەر • كەشە

ۇقساس جاڭالىقتار